ახალი ამბები

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის ორგანიზებით, სეზონური სკოლა „სკოლამდელი განათლების საბაკალავრო საგანმანათლებლო პროგრამის სასწავლო და პრაქტიკული კომპონენტების განვითარება“ გაიხსნა. ერთკვირიანი სეზონური სკოლა მიზნად ისახავს, ხელი შეუწყოს საქართველოს სახელმწიფო უნივერსიტეტებში სკოლამდელი განათლების საბაკალავრო საგანმანათლებლო პროგრამების შინაარსობრივ და მეთოდოლოგიურ განვითარებას. ღონისძიება აჭარის ა.რ. განათლების, კულტურისა და სპორტის სამინისტროს პროგრამის „უმაღლესი განათლების“ ქვეპროგრამის „უმაღლესი განათლების ხელშეწყობა“ ფარგლებში იმართება და მისი მხარდამჭერია გაეროს ბავშვთა ფონდი.

ბათუმის შოთა რუსთაველის სახელმწიფო უნივერსიტეტში ტოლერანტობის საერთაშორისო დღისადმი მიძღვნილი ფოტო-ნახატების ონლაინ გამოფენა „ჩემი თვალით დანახული ტოლერანტობა“ გაიმართა. ღონისძიება ევროსაბჭოს, ანტიდისკრიმინაციული დეპარტამენტის DG-II-ის პროექტის „დისკრიმინაციის, სიძულვილით მოტივირებული დანაშაულისა და სიძულვილის ენის წინააღმდეგ ბრძოლა საქართველოში“ ხელშეწყობით, კამპანიის „მე ვირჩევ თანასწორობას“ ფარგლებში ბსუ-ს ზუსტ მეცნიერებათა და განათლების ფაკულტეტის ორგანიზებით ჩატარდა.

USAID-ის საბაზისო განათლების პროგრამის ფარგლებში, ლიდერ მასწავლებელთა ტრენინგები დაიწყო. ბსუ-ს პროფესიული პროგრამების მართვისა და უწყვეტი განათლების ცენტრის ტრენერები სწავლების მონაწილეებს ახალი სკოლის მოდელს, მოსწავლეზე ორიენტირებული სწავლების პრინციპებს, სპეციალური საჭიროების მქონე მოსწავლეების განათლების ძირითად საკითხებსა და სხვა აქტუალურ სიახლეებს გააცნობენ. ლიდერ მასწავლებლთა ტრენინგებში აჭარისა და გურიის რეგიონებიდან 326 დირექტორი და 978 მასწავლებელი არის ჩართული.

ბსუ-ს ტექნოლოგიური ფაკულტეტის აგრარული მიმართულების სტუდენტებმა, ქალთა საფეხბურთო კლუბ „ლანჩხუთის“ წევრებმა ნინი გუჯაბიძემ, მარიამ გოგეშვილმა და ნინო ჩხრტიშვილმა წარმატებულად იასპარეზეს უეფას ქალთა ჩემპიონატის ლიგის საკვალიფიკაციო ეტაპზე. ქართველმა სპორტსმენებმა შიმკენტში გამართულ ჩემპიონთა ლიგის 2020-21 წლების პირველ საკვალიფიკაციო ეტაპზე ყაზახურ ოკჟეტპესს დამატებით დროში 2:1 სძლიეს. კლუბი „ლანჩხუთი“ ქართული ფეხბურთის ისტორიაში პირველი გუნდი გახდა, რომელმაც უეფას ქალთა ჩემპიონთა ლიგის მეორე საკვალიფიკაციო ეტაპის საგზური მოიპოვა. „ლანჩხუთი“ უეფას ჩემპიონთა ლიგის მეორე საკვალიფიკაციო ეტაპის შეხვედრას 18/19 ნოემბერს ჩაატარებს და ქსკ „ოლიმპია კლუჟს“ რუმინეთში დაუპირისპირდება.

ბსუ-ში საქართველოს განათლების, მეცნიერების, კულტურისა და სპორტის სამინისტროს რეკომენდაციითა და საბუნებისმეტყველო მეცნიერებათა და ჯანდაცვის ფაკულტეტის ორგანიზებით 5-7 ნოემბერს ონლაინ ტრენინგ-კურსი „ახალი კორონავირისული დაავადება COVID-19 - ადაპტირებული სწავლების კურსი სტუდენტებისთვის’’ ჩატარდა. კურსის პროგრამა ბსუ-ს პროფესორმა სოფიო ბერიძემ მოამზადა. ტრენინგი მედიცინის დამამთავრებელი კურსის სტუდენტების გადამზადებას, სამედიცინო პერსონალის რეზერვის შექმნას და საჭიროების შემთხვევაში სამედიცინო პერსონალის COVID-19-ით გამოწვეული დაავადების მართვაში დახმარებას ითვალისწინებდა.