ბათუმის შოთა რუსთაველის სახელმწიფო უნივერსიტეტში სახალხო დაფინანსების პლათფორმის InvestMe დამფუძნებლებმა ზურაბ კაზალიშვილმა და შალვა ოთანაძემ, ასევე USAID - ის პროგრამის G4G წარმომადგენელმა თამარ ჯულაყიძემ სტარტაპ კონკურსთან Kick Challenge დაკავშირებით სტუდენტებთან საინფორმაციო შეხვედრა გამართეს.
ბათუმის შოთა რუსთაველის სახელმწიფო უნივერსიტეტს პოეტი დავით მაღრაძე ეწვია. საქართველოს ჰიმნის ავტორმა სტუდენტებს და პროფესორ-მასწავლებლებს ახლახან გამოცემული ლექსების კრებული „უსადაურო“ წარუდგინა და მწერლობის დანიშნულებაზე ესაუბრა. შეხვედრა კითხვა-პასუხის რეჟიმში წარიმართა და პოეტმა აქტუალურ შეკითხვებს უპასუხა. დავით მაღრაძემ საუბრისას ყურადღება გაამახვილა ასევე ქვეყანაში მიმდინარე კულტურულ, საზოგადოებრივ და პოლიტიკურ მოვლენებზე.
„სოციალური პოლიტიკა საქართველოში: არსებული პრობლემები და საჭიროებები“ - თემაზე ბათუმის შოთა რუსთაველის სახელმწიფო უნივერსიტეტში საჯარო დისკუსია გაიმართა. სხვადასხვა ფაკულტეტის სტუდენტები საქართველოში არსებული სოციალური პოლიტიკის აქტუალურ საკითხებს გაეცნენ და საკუთარი მოსაზრებები წარმოადგინეს. ღონისძიების ფარგლებში „ადამიანის უფლებების სწავლებისა და მონიტორინგის ცენტრის (EMC)" კრიტიკული პოლიტიკის მიმართულების პროექტების კოორდინატორმა თამუნა ქებურიამ მოხსენება „ბუნებრივი წიაღი და მისი მოპოვება თანამედროვე დროში – წყევლა თუ გამართლება?” წაიკითხა, ხოლო EMC-ის პროექტების სამართალწარმოების იურისტმა ლელა გვიშიანმა ნაშრომი „სოციალური დაცვის სისტემაში არსებული პრობლემური საკითხები (მიზნობრივი სოციალური დახმარების მაგალითზე)” წარმოადგინა.
აკადემიკოს არნოლდ ჩიქობავას დაბადების 120 წლისადმი მიძღვნილი XXXVIII რესპუბლიკური დიალექტოლოგიური სამეცნიერო სესია გაიხსნა ბათუმის შოთა რუსთაველის სახელობის სახელმწიფო უნივერსიტეტში. ორი დღის განმავლობაში ქვეყნის სხვადასხვა სამეცნიერო ინსტიტუტისა და უმაღლესი საგანმანათლებლო დაწესებულების 50-ზე მეტი მკვლევარი და პროფესორ-მასწავლებელი სამეცნიერო მოხსენებას წარმოადგენს ქართული ენის დიალექტთა ლექსიკის სხვადასხვა აქტუალურ საკითხზე. სესია ოთხ სექციად იმუშავებს, განიხილება დიალექტოლოგიის ფუნდამენტური საკითხები, რაც ხელს უწყობს ქართველური ენებისა და დიალექტების კიდევ უფრო ღრმა შესწავლა-ანალიზს.
ბათუმის შოთა რუსთაველის სახელმწიფო უნივერსიტეტში სტუდენტთა საინიციატივო ჯგუფის ორგანიზებით 2007 წლის 8 ნოემბერის მოვლენებთან დაკავშირებით შეხვედრა გაიმართა. ღონისძიება მიზნად ისახავდა სპეცრაზმის მიერ სტუდენტებისა და პროფესორ-მასწავლებლების დარბევის ფაქტის გამოძიების დასრულებას, დამნაშავეთა დასჯას და უნივერსიტეტის ავტონომიის დაცვას. შეხვედრაზე შედგა ბსუ-ს დარბევის ამსახველი ვიდეორგოლის ჩვენება, რომლის შემდეგ თვითმხილველებმა გაიხსენეს და დაგმეს თერთმეტი წლის წინ მომხდარი ძალადობის ფაქტები.
