ახალი ამბები

ზვიად ჭუმბურიძის წიგნის „ათონი პატრიარქის გაზაფხული“ წარდგენა გაიმართა ბათუმის შოთა რუსთაველის სახელმწიფო უნივერსიტეტში. ავტორმა სტუდენტებსა და პროფესორ-მასწავლებლებს წიგნზე მუშაობის ისტორია და ისტორიული ვიზიტის დეტალები გააცნო. ნაშრომი უწმიდესის და უნეტარესის, სრულიად საქართველოს კათოლიკოს-პატრიარქის ილია II-ის 2004 წლის მაისის ათონის მთის ვიზიტს მიეძღვნა. ათონის მთას ქრისტიანულ მართმადიდებლურ რელიგიაში განსაკუთრებული მნიშვნელობის ადგილი უკავია. ივერიის ქართველთა მონასტერი X-XVI საუკუნეებში ქართული მეცნიერებისა და კულტურის ცენტრი იყო.

უნგრეთის საგანგებო და სრულუფლებიანი ელჩი საქართველოში ვიქტორია ჰორვატი მოადგილესთან ანიკო ფარკაშთან ერთად, ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს, რექტორის მოადგილეს თამარ სირაძეს, სტრატეგიული განვითარებისა და საგარეო ურთიერთობათა დეპარტამენტის უფროსს გიორგი თავამაიშვილს შეხვდა. დიპლომატებმა შეხვედრაზე უნგრეთის უმაღლეს საგანმანათლებლო დაწესებულებებთან თანამშრომლობის მემორანდუმის გაფორმებასა და ერთობლივი პროექტების განხორციელების მნიშვნელობაზე ისაუბრეს. მხარეთა შეთანხმებით, დაიგეგმა სამეცნიერო კონფერენციის ჩატარება და უნგრული ხელოვნების ამსახველი გამოფენის მოწყობა. ვიზიტის ფარგლებში დიპლომატიური კორპუსის წარმომადგენლები სტუდენტებს შეხვდნენ და გაცვლითი პროგრამები გააცნეს.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის ბიზნესის ადმინისტრირების საბაკალავრო საგანმანათლებლო პროგრამამ (ფინანსები, მარკეტინგი, მენეჯმენტი, საბუღალტრო და საგადასახადო საქმე) წარმატებით გაიარა პროგრამული აკრედიტაცია. ვულოცავთ ფაკულტეტის სტუდენტებსა და პროფესორ-მასწავლებლებს ამ მნიშვნელოვან გამარჯვებას.

იტალიის საგანგებო და სრულუფლებიანი ელჩი საქართველოში ანტონიო ენრიკო ბარტოლი ბათუმის შოთა რუსთაველის სახელმწიფო უნივერსიტეტს ეწვია. დიპლომატიური კორპუსის წარმომადგენელმა ბსუ-ს რექტორთან მერაბ ხალვაშთან გამართულ შეხვედრაზე ორ ქვეყანას შორის არსებულ კულტურულ-საგანმანათლებლო ურთიერთობებსა და იტალიური ენის საგანმანათლებლო პროგრამაში შეტანის მნიშვნელობაზე ისაუბრა. მხარეთა შეთანხმებით, დაიგეგმა სასწავლო და სამეცნიერო პროექტების ერთობლივად განხორციელება. ვიზიტის ფარგლებში იტალიის საგანგებო და სრულუფლებიანი ელჩი საქართველოში ანტონიო ენრიკო ბარტოლი სტუდენტებს შეხვდა.

შავი ზღვის დაცვის საერთაშორისო დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. საბუნებისმეტყველო მეცნიერებათა და ჯანდაცვის ფაკულტეტის ორგანიზებით ბსუ-ს ლექტორმა, ასოციაციის „მწვანე სექტორის“ ექსპერტმა რამაზ მიქელაძემ საჯარო ლექცია წაიკითხა შავი ზღვის პრობლემებზე და ეკოტური მოეწყო ბათუმის ზღვისპირა ზოლის ეკოლოგიური მდგომარეობის გასაცნობად. მომხსენებელმა სტუდენტებს შავი ზღვის დაბინძურებისა და ბიომრავალფეროვნების შემცირების პრობლემები გააცნო.