ახალი ამბები

ბათუმის შოთა რუსთაველის სახელმწიფო უნივერსიტეტის სამეცნიერო კვლევების სამსახურმა 25-31 ოქტომბერს საინფორმაციო შეხვედრები გამართა ბსუ-ს აკადემიურ და სამეცნიერო პერსონალთან. შეხვედრის მიზანი იყო „მტაცებლური ჟურნალები“ -ს შესახებ ინფორმაციის მიწოდება. მეცნიერთა მაღალ ინტერესს უარყოფითად იყენებენ რიგი გამომცემლები და ბიზნეს ორგანიზაციები. ღია წვდომის ჟურნალები ხშირად სთავაზობენ მეცნიერებს სტატიების გამოქვეყნებას, რის შედეგადაც სამეცნიერო კვლევის რელევანტურობა დგას კითხვის ნიშნის ქვეშ, ხოლო მეცნიერის იმიჯს ადგება ჩრდილი. საინფორმაციო შეხვედრები ითვალისწინებდა მიმართულებების მიხედვით მაღალრეიტინგულ ჟურნალთა ელექტრონული ბაზების მიწოდებას.

აჭარის შემოქმედებითი ინკუბატორის პროექტის წარდგენა გაიმართა ბათუმის შოთა რუსთაველის სახელმწიფო უნივერსიტეტში. ევროპული საგანმანათლებლო ცენტრის წარმომადგენელმა გიორგი ბენაშვილმა ეკონომიკისა და ბიზნესის ფაკულტეტის სტუდენტებს პროექტში მონაწილეობის პირობები და წესები გააცნო. აჭარის შემოქმედებითი ინკუბატორი მიზნად ისახავს წაახალისოს შემოქმედებითი, ინოვაციური ბიზნეს იდეების მქონე მოქალაქეები და მისცეს შესაძლებლობა, გარდაქმნან საკუთარი იდეები რეალურ ბიზნესად.

ბათუმის შოთა რუსთაველის სახელმწიფო უნივერსიტეტში AIESEC-ის გაცვლითი პროგრამების წარდგენა გაიმართა. ორგანიზაციის წარმომადგენლებმა თეა ვაშაყმაძემ და ხატია ცისკარაძემ სხვადასხვა ფაკულტეტის სტუდენტებს დეტალური ინფორმაცია გააცნეს საერთაშორისო ახალგაზრდული ორგანიზაციის საქმიანობის, გაცვლითი პროგრამების, სხვადასხვა აქტივობისა და დაგეგმილი ღონისძიებების შესახებ. შეხვედრა მიზნად ისახავდა სტუდენტებისა და ახალგაზრდების ჩართვას აისეკის გაცვლით პროგრამებში. 70-წლიანი გამოცდილების ორგანიზაცია 120 ქვეყნის 2200-ზე მეტ უნივერსიტეტში ფუნქციონირებს და სტუდენტებს შესაძლებლობას აძლევს, განავითარონ ლიდერის უნარ-ჩვევები.

ბსუ-ს გუნდი საქართველოს მასშტაბით გამართული ჰაკათონის გამარჯვებულია.
ტექნოლოგიური კონკურსი „ჰაკატური“ ითვალისწინებდა ინფორმაციული და ინოვაციური ტექნოლოგიებით დაინტერესებული ახალგაზრდებისთვის პროფესიული განვითარებისა და რეალიზაციის პრაქტიკული შესაძლებლობების შექმნას. ჰაკატური ერთდროულად 10 რეგიონში ონლაინ რეჟიმში მიმდინარეობდა. მასში სხვა უმაღლესი სასწავლო დაწესებულებების სტუდენტებთან ერთად ბათუმის შოთა რუსთაველის სახელმწიფო უნივერსიტეტის ორი გუნდი მონაწილეობდა. კონკურსის ფარგლებში რამდენიმე სახელმწიფო ორგანიზაციამ დასვა ამოცანა ტურიზმის სფეროს მიმართულებით, რომლის რეალიზებაც 40-ზე მეტმა გუნდმა სცადა.

საქართველოს შეიარაღებული ძალების ეროვნული გვარდიის აქტიური რეზერვის საპილოტე პროგრამაში წარმატებული მონაწილეობისათვის საქართველოს ეროვნულმა გვარდიამ ბათუმის შოთა რუსთაველის სახელმწიფო უნივერსიტეტს საპატიო ჯილდო გადასცა. საპილოტე პროგრამას საქართველოს თავდაცვის სამინისტრო 1-ლი აგვისტოდან ახორციელებს. ტერიტორიულ და სპეციალისტთა რეზერვში, პირველ ეტაპზე, 18-დან 50 წლამდე ასაკის კახეთის, აჭარისა და გურიის რეგიონებში მცხოვრები პირები, მათ შორის 18-22 წლის სტუდენტები მონაწილეობენ. სტუდენტებს სარეზერვო სამსახურის ერთი კონტრაქტის ვადის დასრულების შემდეგ სავალდებულო სამსახური მოხდილად ჩაეთვლებათ.