ახალი ამბები

ბათუმის შოთა რუსთაველის სახელმწიფო უნივერსიტეტს ესტონეთის არასამთავრობო ორგანიზაციის „ქალთა საინფორმაციო რესურს ცენტრის“ (ENUT) წარმომადგენლები ეწვივნენ. ესტონელმა ექსპერტებმა უნივერსიტეტის რექტორის მოადგილესთან თამარ სირაძესთან, პროფესორ-მასწავლებლებთან და ადმინისტრაციის თანამშრომლებთან გამართულ შეხვედრაზე ქალთა ეკონომიკური, სოციალური და პოლიტიკური გაძლიერების მეთოდებზე, მიღწევებსა და გამოწვევებზე ისაუბრეს. ღონისძიება ასოციაციის „ერთმანეთისთვის“ ორგანიზებით საერთაშორისო პროექტის „აჭარის რეგიონში ქალთა და ბავშვთა უფლებების დასაცავად“ ფარგლებში გაიმართა.

ფრანგული ინსტიტუტის დირექტორი საქართველოში ჟან-ივ ლავუარი ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს, ჰუმანიტარულ მეცნიერებათა ფაკულტეტის დეკანს მარინე გიორგაძესა და პროფესორ-მასწავლებლებს შეხვდა. ვიზიტი მიზნად ისახავდა ბსუ-ს გაწევრიანებას ფრანკოფონიის საერთაშორისო საუნივერსიტეტო სააგენტოში (AUF-Agence universitaire de la Francophonie) და საფრანგეთის უმაღლეს საგანმანათლებლო დაწესებულებებს შორის თანამშრომლობის გაღრმავებას. შეხვედრაზე დაიგეგმა რუანისა და რენის უნივერსიტეტებთან ერთად ერთობლივი პროექტებისა და პროგრამების განხორციელება.

ბათუმის პირველი სეპარაციის სტენდის გახსნაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, პროფესორ-მასწავლებლებმა და სტუდენტებმა. ღონისძიება USAID-ისა და CENN–ის „ნარჩენების მართვის ტექნოლოგიები რეგიონებში“ პროგრამის მეორე ფაზის – WMTR II – ფარგლებში გაიმართა. პროგრამა მხარს უჭერს ქვეყნის ნარჩენების მართვის სექტორის მოდერნიზებას, მდგრად განვითარებასა და ინკლუზიურ ეკონომიკურ ზრდას. პროექტი ასევე უზრუნველყოფს ნარჩენების ისეთ მართვას, რომელიც მინიმუმამდე შეამცირებს ნარჩენების მიერ ადამიანის ჯანმრთელობასა და ბუნებრივ რესურსებზე მიყენებულ ზიანს.

ბათუმის შოთა რუსთაველის სახელმწიფო უნივერსიტეტს საქართველოში კორეის რესპუბლიკის საელჩოს დელეგაცია ეწვია. საელჩოს დროებითმა რწმუნებულმა კიმ ინ ჰანიმ და საელჩოს კულტურის ატაშემ ბიონ სეუნგ ვუმ რექტორთან მერაბ ხალვაშთან გამართულ შეხვედრაზე ორი ქვეყნის ურთიერთობებსა და სამომავლო თანამშრომლობის მიმართულებებზე ისაუბრეს. დაიგეგმა ერთობლივი საგანმანათლებლო და კულტურული პროექტების განხორციელება. დელეგაციის წევრებმა ბსუ-ს საჩუქრად კორეულ ენაზე თარგმნილი „ვეფხისტყაოსანი“ და სახელმძღვანელოები გადასცეს.

2019 წლის ზაფხულში, ბათუმის შოთა რუსთველის სახელმწიფო უნივერსიტეტში იაპონია - ხმელთაშუა ზღვის XI საერთაშორისო კონფერენცია „გამოყენებითი ელექტრომგნიტური ინჟინერია - მაგნიტობის, ზეგმტარობის, მულტიფუნქციონალისა და ნანომასალებისათვის - JAPMED 11“ ჩატარდება. უმაღლეს საგანმანათლებლო დაწესებულებაში გამართულ კონფერენციის საორგანიზაციო შეხვედრაზე ბსუ-ს რექტორი მერაბ ხალვაში, აკადემიკოსი, პროფესორი ათანისიოს გეორგიუს მამალისი და პროფესორი პაატა კერვალიშვილი საერთაშორისო სესიის ჩატარების პირობებზე შეთანხმდნენ.