ახალი ამბები

ბათუმის შოთა რუსთაველის სახელმწიფო უნივერსიტეტში უმაღლესი განათლებისა და მეცნიერებათა რეფორმის ახალი კონცეფციის პროექტის განხილვა მოეწყო. შეხვედრაზე უნივერსიტეტის რექტორმა, პროფესორმა ალიოშა ბაკურიძემ, აჭარის არ განათლების, კულტურისა და სპორტის მინისტრმა გიორგი თავამაიშვილმა, პროფესორ-მასწავლებლებმა, მეცნიერებმა, საზოგადოების წარმომადგენლებმა საკუთარი მოსაზრებები და წინადადებები წარმოადგინეს. ასევე ისაუბრეს ტენუარის სისტემაზე, აკადემიური თავისუფლების, მიუკერძოებლობის და ხარისხის დამცავ მექანიზმსა და აკადემიურ თვითმმართველობაზე. კონცეფცია რამდენიმე თვის წინ განათლებისა და მეცნიერების რეფორმის კომისიის მეცნიერთა საინიციატივო ჯგუფმა პროფესორ გია დვალის ხელმძღვანელობით შეიმუშავა და მიზნად ისახავს სასწავლო-სამეცნიერო დაწესებულებების რეფორმას. პროექტის განხილვა უნივერსიტეტისა და საქართველოს განათლების მეცნიერებათა აკადემიის აჭარის განყოფილების ინიციატივით ჩატარდა.

საქართველოსა და თურქეთის ურთიერთობებს მიეძღვნა სამეცნიერო კონფერენცია თემაზე: „საქართველო-თურქეთი წარსული და თანამედროვეობა“. პროფესორ აბელ სურგულაძის აუდიტორიაში გამართულ სესიაზე ქართველმა, მაკედონელმა და თურქმა მკვლევრებმა მოხსენებები წარმოადგინეს ორი ქვეყნის ისტორიაზე, საშინაო და საგარეო პოლიტიკაზე, ეკონომიკურ ურთიერთობებზე, სამხრეთ კავკასიაში რუსეთისა და თურქეთის გეოპოლიტიკურ დაპირისპირებაზე. სამეცნიერო კონფერენცია ისტორიის, არქეოლოგიისა და ეთნოლოგიის დეპარტამენტისა და სამეცნიერო ბიბლიოთეკის ორგანიზებით ჩატარდა.

აკადემიკოს ილია ვეკუასადმი მიძღვნილი VII საერთაშორისო ოლიმპიადა გაიხსნა პროგრამირებაში. პირველობაში საქართველოს, უკრაინის, სომხეთის, აზერბაიჯანისა და თურქეთის უმაღლესი საგანმანათლებლო დაწესებულებების სტუდენტები მონაწილეობენ. საუკეთესო პროგრამისტების გამოსავლენად ტურები რამდენიმე დღის განმავლობაში ერთდროულად გაიმართება ბათუმის, ნოვოსიბირსკის, მოსკოვისა და სანკტ-პეტერბურგის სახელმწიფო უნივერსიტეტებში. ოლიმპიადაზე აკადემიკოს ილია ვეკუას თასის მფლობელის გარდა გამოვლინდება საუკეთესო გუნდები ნიკო მუსხელიშვილის, ივერი ფრანგიშვილისა და ევგენი პანკრატიევის სახელობის პრიზის მისაღებად.
საერთაშორისო ოლიმპიადა ბათუმის შოთა რუსთაველის სახელმწიფო უნივერსიტეტის, მოსკოვის სახელმწიფო უნივერსიტეტის, ნოვოსიბირსკის სახელმწიფო უნივერსიტეტის, სოხუმის სახელმწიფო უნივერსიტეტის, საქართველოს ტექნიკური უნივერსიტეტისა და პროგრამირების მხარდაჭერის ასოციაციის ორგანიზებით ტარდება.

შოთა რუსთაველის დარბაზში აბრეშუმის გზის მე-8 საერთაშორისო კონფერენცია „ტურიზმის განვითარება შავი და კასპიის ზღვების რეგიონებში“ გაიხსნა. სამი დღის განმავლობაში ქართველი, ამერიკელი, თურქი და აზერბაიჯანელი მკვლევრები ტურიზმის განვითარებისა და არსებული პრობლემების მოგვარების გზებზე იმსჯელებენ. კონფერენციაზე მოხსენებები წარმოდგენილი იქნება კულტურული ტურიზმის, განათლების ტურიზმის, სამედიცინო ტურიზმისა და ეკონომიკური ტურიზმის საკითხებზე. საერთაშორისო კონფერენცია შავი ზღვის უნივერსიტეტის, ბათუმის შოთა რუსთაველის სახელმწიფო უნივერსიტეტის, ივანე ჯავახიშვილის სახელობის თბილისის სახელმწიფო უნივერსიტეტისა და საქართველოს ტექნიკური უნივერსიტეტის ორგანიზებით ტარდება.

ხელოვნების საერთაშორისო კინოფესტივალის ,,მემკვიდრეობა“ ფარგლებში ბათუმის შოთა რუსთაველის სახელმწიფო უნივერსიტეტში სანდრო ვახტანგოვის ფილმის ,,ძმები კარბელაშვილები“ და უწმიდესისა და უნეტარესის, სრულიად საქართველოს კათოლიკოს-პატრიარქის ილია II-ისადმი მიძღვნილი თამარ თაგვაძის ფილმის ,,იქ სადაც ცა და დედამიწა ერთდება“ ჩვენება გაიმართა. სტუდენტებმა და პროფესორ-მასწავლებლებმა წარმოდგენილი ფილმების მნიშვნელობაზე ცნობილ რეჟისორთან მიხეილ კობახიძესთან და ფესტივალის ორგანიზატორთან მათე ტაკიძესთან ერთად ისაუბრეს.