ახალი ამბები

საქართველოს ახალგაზრდული პარლამენტის იურიდიული კომიტეტის ორგანიზებით ბათუმის შოთა რუსთაველის სახელმწიფო უნივერსიტეტში დისკუსია გაიმართა თემაზე: „სტუდენტთა სტაჟირება და დასაქმება - სოციალური გამოწვევა“. სოციალურ, ბიზნესისა და სამართალმცოდნეობის ფაკულტეტის სტუდენტები აჭარის დასაქმების სააგენტოს, აჭარის სპორტისა და ახალგაზრდულ საქმეთა დეპარტამენტისა და არასამთავრობო ორგანიზაციების წარმომადგენლებთან ერთად აქტუალურ საკითხზე რამდენიმე საათის განმავლობაში მსჯელობდნენ. დისკუსიაზე წარმოდგენილი დასკვნები და მოსაზრებები საქართველოს ახალგაზრდული პარლამენტის იურიდიული კომიტეტის კანონ-პროექტში აისახება, რომელიც განსახილველად საქართველოს პარლამენტს გადაეცემა.

ბათუმის შოთა რუსთაველის სახელმწიფო უნივერსიტეტსა და ნახჭევანის სახელმწიფო უნივერსიტეტს შორის გაფორმებული მემორანდუმის ფარგლებში განათლებისა და მეცნიერებათა ფაკულტეტის თურქული და ინგლისური ფილოლოგიის სპეციალობის ოთხმა სტუდენტმა ნახჭევანში ერთსემესტრიანი საგანმანათლებლო პროგრამები გაიარა. გაცვლითი პროგრამა ერთი წელია მოქმედებს და მიზნად ისახავს პარტნიორ უმაღლესი საგანმანათლებლო დაწესებულებების ერთობლივი სასწავლო, სამეცნიერო და საგანმანათლებლო პროექტების განხორციელებას. სექტემბრიდან ბსუ სხვადასხვა სპეციალობის აზერბაიჯანელ სტუდენტებს უმასპინძლებს.

ბათუმის შოთა რუსთაველის სახელმწიფო უნივერსიტეტში მწერლისა და საზოგადო მოღვაწის, მედიკოსის, პუბლიცისტის, მედიცინის მეცნიერებათა დოქტორის, პროფესორ რამაზ სურმანიძის დაბადებიდან 80 წლისადმი მიძღვნილი საიუბილეო საღამო გაიმართა. ცნობილ მკვლევრს იუბილე მიულოცეს, დიპლომები და სამახსოვრო საჩუქრები გადასცეს უნივერსიტეტის რექტორმა, პროფესორმა ალიოშა ბაკურიძემ, აჭარის ა.რ. განათლების, კულტურისა და სპორტის მინისტრმა გიორგი თავამაიშვილმა, აჭარის ა.რ. შრომის, ჯანმრთელობისა და სოციალური დაცვის მინისტრმა ნუგზარ სურმანიძემ, მთავრობის წევრებმა, აჭარის მწერალთა კავშირის თავმჯდომარემ დავით თედორაძემ, საზოგადოება „ჭვანელის“ ერთ-ერთმა დამფუძნებელმა აკაკი ზოიძემ, ბსუ-ს ემერიტუსებმა, პროფესორ-მასწავლებლებმა, მწერლებმა და საზოგადოების წარმომადგენლებმა.

თამარ მეფის ხსენების დღეს მიეძღვნა “ ბათუმის შოთა რუსთაველის სახელმწიფო უნივერსიტეტში გამართული შემოქმედებითი საღამო „თამარობა 800“. განათლებისა და მეცნიერებათა ფაკულტეტის ისტორიისა და თურქეთისმცოდნეობის სპეციალობის მეორე კურსის სტუდენტებმა თეატრალური წარმოდგენით კიდევ ერთხელ გაიხსენეს თამარ დედოფლის ცხოვრება, მოღვაწეობა და საქართველოს ისტორიის უმნიშვნელოვანესი პერიოდი. უწმინდესისა და უნეტარესის, სრულიად საქართველოს კათოლიკოს-პატრიარქის ილია II-ის ლოცვა-კურთხევით 2013 წელი თამარ მეფის წლად გამოცხადდა.

შოთა რუსთაველის დარბაზში პროფესორ თინა შიოშვილის წიგნის „იესო ქრისტე ქართულ ფოკლორში“ წარდგინება გაიმართა. მონოგრაფია ეძღვნება მაცხოვრის ვერბალური ხატის შესწავლას ქართულ ფოლკლორულ შემოქმედებაში. წიგნში გაანალიზებულია მაცხოვრის შობის, სოფლიური მოღვაწეობის, ჯვარცმისა და აღდგომის ციკლის სასულიერო-რელიგიური ზეპირსიტყვიერების ნიმუშები. ნაშრომი განკუთვნილია ჰუმანიტარული დარგის სპეციალისტებისათვის, სტუდენტებისათვის, რელიგიისა და კულტურის ისტორიით დაინტერესებული მკითხველისათვის.