ახალი ამბები

პოტსდამის უნივერსიტეტს ოთხდღიანი სამუშაო ვიზიტით ბათუმის შოთა რუსთაველის სახელმწიფო უნივერსიტეტის განათლებისა და მეცნიერებათა ფაკულტეტის დეკანი, ასოცირებული პროფესორი მარინა ქორიძე, სასწავლო პროცესის მართვის დეპარტამენტის უფროსი, პედაგოგიკის დოქტორი მადონა მიქელაძე და ევროპეისტიკის დეპარტამენტის ასისტენტ პროფესორი ნელი ახვლედიანი ეწვივნენ. ვიზიტი მიზნად ისახავდა ორ უმაღლეს საგანმანათლებლო დაწესებულებას შორის თანამშრომლობის გაღრმავებას, ერთობლივი სასწავლო-სამეცნიერო პროექტების დაგეგმვასა და განხორციელებას. ქართველმა და გერმანელმა კოლეგებმა შეხვედრებზე ისეთ მნიშვნელოვან საკითხებზე იმსჯელეს, როგორიცაა: პროფესორ-მასწავლებელთა და სტუდენტთა გაცვლითი პროგრამების ამოქმედება, კვლევების წარმოება განათლების მიმართულებით, პედაგოგიური პრაქტიკა ქართველი და გერმანელი პროფესორების თანახელმძღვანელობით, განათლების მიმართულების პროგრამების ექსპერტიზა და ენების ცენტრის შექმნა. პოტსდამის უნივერსიტეტის დელეგაცია ბათუმს საპასუხო ვიზიტით 2013 წელს ეწვევა.

საქართველოში ამერიკის საელჩოსა და საერთაშორისო განათლების ცენტრის ორგანიზებით ბათუმის შოთა რუსთაველის სახელმწიფო უნივერსიტეტში ამერიკული განათლების დღე აღინიშნა. საქართველოში ამერიკის საელჩოს კულტურის ატაშემ ლოლა პეტროვამ, ინგლისური ენის ექსპერტმა კარლა მორტენსინმა, საერთაშორისო განათლების ცენტრისა და დიპლომატიური კორპუსის წარმომადგენლებმა ნინო ინაიშვილმა, თეა კუჭუხიძემ, თამარ ქარჩავამ სტუდენტებს აშშ-ის მთავრობის მიერ დაფინანსებული გაცვლითი პროგრამები გააცნეს. წარდგინების დასასრულს პროგრამების „მშვიდობის კორპუსის“, „ისწავლე და ასწავლე საქართველოსთვის“ მოხალისეებისა და ამერიკული უნივერსიტეტების კურსდამთავრებულების მონაწილეობით დისკუსია გაიმართა თემაზე: „სტუდენტური ცხოვრება ამერიკაში“.

კონკურსი საუკეთესო ესეის გამოსავლენად ეწყობა მსოფლიო ბანკში საქართველოს გაწევრიანების 20 წლის აღსანიშნავად. დამამთავრებელი კურსისა და მაგისტრატურის სტუდენტებს ქვეყნის მასშტაბით ეძლევათ უნიკალური შესაძლებლობა, იმსჯელონ საქართველოს განვითარების პერსპექტივებზე. კონკურსის მიზანია, ჩართოს სტუდენტები ინტელექტუალურ დისკუსიაში საქართველოს წინაშე არსებული გამოწვევების შესახებ.კონკურსში მონაწილეობას იღებს ყველა უმაღლესი სასწავლებელი. მონაწილე უნივერსიტეტი უზრუნველყოფს წარდგენილი ნაშრომების პირველად შეფასებას მსოფლიო ბანკის მიერ დადგენილი საკონკურსო წესების მიხედვით. საუკეთესო ესეიები წარედგინება მსოფლიო ბანკის კომისიას საბოლოო გადაწყვეტილების მისაღებად.

ბათუმის შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტსა და გრაცის უნივერსიტეტის სამართლის ფაკულტეტს შორის მემორანდუმი გაფორმდა. თანამშრომლობა ხელს შეუწყობს სამართლებრივი კვლევების პოპულარიზაციას, სტუდენტებისა და იურისტების პროფესიულ განვითარებას, ერთობლივი სასწავლო და საგანმანათლებლო პროგრამების განხორციელებას. მხარეები ასევე სასწავლო, სამეცნიერო და მეთოდოლოგიური ლიტერატურის ურთიერთგაცვლაზე, ერთობლივი კონფერენციების, სემინარების, ვორქშოფების ჩატარებასა და ბიბლიოთეკების გამოყენებაზე შეთანხმდნენ. მემორანდუმის ფარგლებში დაიგეგმა ბსუ-ს ბაზაზე „ევროპული სამართალი“-ს თემაზე საზაფხულო სკოლის ჩატარება.

თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტსა და იუნუს ემრეს ინსტიტუტს შორის. ხელშეკრულება ითვალისწინებს უმაღლესი საგანმანათლებლო დაწესებულებების ერთობლივი სასწავლო-სამეცნიერო პროექტებისა და გაცვლითი პროგრამების განხორციელებას. მემორანდუმი ხელს შეუწყობს განათლებისა და მეცნიერებათა ფაკულტეტის თურქული ენისა და ლიტერატურის მიმართულებისათვის თურქეთიდან მაღალკვალიფიციური კადრების მოწვევას, პროფესორ-მასწავლებლების უცხოეთში სტაჟირებას, კაბინეტების მატერიალურ-ტექნიკური ბაზის გაუმჯობესებასა და ლიტერატურის მიწოდებას.