ახალი ამბები

ბათუმის შოთა რუსთაველის სახელმწიფო უნივერსიტეტის სამეცნიერო ცენტრის ნიკო ბერძენიშვილის სახელობის ჰუმანიტარულ-სოციალური მიმართულების ფოლკლორისა და დიალექტოლოგიის განყოფილების უფროსს, ფილოლოგიის მეცნიერებათა დოქტორს, ემერიტუს-პროფესორს, ცნობილ ენათმეცნიერს, ქალბატონ შუშანა ფუტკარაძეს დაბადებიდან 70 და სამეცნიერო-პედაგოგიური მოღვაწეობიდან 45 წელი შეუსრულდა. ცნობილ ქართველ მეცნიერს იუბილე მიულოცეს, დიპლომები და სამახსოვრო საჩუქრები გადასცეს რექტორმა, პროფესორმა ალიოშა ბაკურიძემ, აჭარის ა.რ. მთავრობის თავმჯდომარემ არჩილ ხაბაძემ, აჭარის ა.რ. განათლების, კულტურისა და სპორტის მინისტრმა გიორგი თავამაიშვილმა, მეცნიერებათა ეროვნული აკადემიის წევრ-კორესპონდენტმა გურამ ლორთქიფანიძემ, კოლეგებმა, უცხოეთიდან ჩამოსულმა სტუმრებმა და საზოგადოების წარმომადგენლებმა

ერაზმუს მუნდუსის მეორე აქტივობის პროექტის ,,WEBB - მთელი ევროპა საზღვრებს მიღმა“ კოორდინატორი, ბოლონიის უნივერსიტეტის წარმომადგენელი ფრანჩესკა მალტაურო და ,,BACKIS - შავ და კასპიის ზღვებს შორის“ კოორდინატორი, მონპელიეს უნივერსიტეტის წარმომადგენელი კოლინ ვოლე უნივერსიტეტის სტუდენტებს, მკვლევრებს, აკადემიურ და ადმინისტრაციულ პერსონალს შეხვდნენ და პროგრამაში მონაწილეობის პირობები გააცნეს. პროექტი WEBB ითვალისწინებს ბაკალავრების, მაგისტრების, დოქტორანტების, პოსტდოქტორანტების, აკადემიური და ადმინისტრაციული პერსონალის (ტრენინგი, სწავლება, კვლევა) მობილობას პროექტის პარტნიორ ევროპულ უნივერსიტეტებში

ბათუმის შოთა რუსთაველის სახელმწიფო უნივერსიტეტის ბიბლიოთეკაში ევროკავშირის კუთხე გაიხსნა. პროექტი სახელწოდებით ”საქართველო ევროპაში” არასამთავრობო ორგანიზაციის ”ახალი თაობა - ახალი ინიციატივა” ორგანიზებით ხორციელდება, მისი მიზანია მოსახლეობის ინფორმირება ევროკავშირისა და ევროინტეგრაციის პროცესების შესახებ. ევროკავშირის კუთხე ბათუმის შოთა რუსთაველის სახელმწიფო უნივერსიტეტის გარდა საქართველოს პარლამენტის ეროვნულ ბიბლიოთეკაში და საქართველოს საუნივერსიტეტო ქალაქებში - თბილისში, ქუთაისში, თელავში, ფოთში და ახალციხეში გაიხსნა.

საარჩევნო სისტემების საერთაშორისო ფონდი (IFES) და ამერიკის შეერთებული შტატების საერთაშორისო განვითარების სააგნტო (USAID) ახორციელებენ პროექტს ,,ნდობის გაზრდა საარჩევნო პროცესებისადმი“. პროგრამა ითვალისწინებს საზოგადოების და განსაკუთრებით ახალგაზრდების ცნობიერების ამაღლებას გენდერულ და ქალის პოლიტიკურად გაძლიერების საკითხებზე. პროექტის ფარგლებში თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის პროფესორმა, ფსიქოლოგიის დოქტორმა ირინა ჟვანიამ საჯარო ლექცია წაიკითხა თემაზე: ,,გენდერული თანასწორობა და ქალის პოლიტიკურად გაძლიერება“.

ცნობილი მეცნიერის, ისტორიის მეცნიერებათა დოქტორის, ბათუმის შოთა რუსთაველის სახელმწიფო უნივერსიტეტის პროფესორ-ემერიტუსის სერგო დუმბაძის დაბადებიდან 75 და სამეცნიერო-პედაგოგიური მოღვაწეობის 50 წლისადმი მიძღვნილი საიუბილეო სხდომა გაიმართა. ღვაწლმოსილ პროფესორს ღირსშესანიშნავი თარიღი ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ, პროფესორ-მასწავლებლებმა, კოლეგებმა და საზოგადოების წარმომადგენლებმა მიულოცეს და მკვლევრის ცხოვრებასა და სამეცნიერო საზოგადოებრივ საქმიანობაზე ისაუბრეს. მეცნიერის კვლევის სფეროს საქართველოს უახლესი პერიოდის მნიშვნელოვანი მოვლენები და სამხრეთ-დასავლეთ საქართველოს გამოჩენილ ადამიანთა მოღვაწეობის წარმოჩენა წარმოადგენს. სერგო დუმბაძე სამხრეთ-დასავლეთ საქართველოს ისტორიის ნარკვევების ოთხტომეულის მეოთხე ტომის თანაავტორი, 500-მდე საგაზეთო წერილის, სამეცნიერო სტატიის, მოგონების, მეცნიერული რეცენზიის, 60-მდე მეცნიერული ნაშრომის და 10 მონოგრაფიის ავტორია. სერგო დუმბაძის ინიციატივით სოფელ ბაკოში სახალხო დღესასწაული ,,სელიმობა“ დაწესდა.