ახალი ამბები

საგრანტო პროექტის „სწავლება–სწავლების ხარისხის გაუმჯობესება რსუ–ში“ წარდგინება გაიმართა. ბათუმის შოთა რუსთაველის სახლმწიფო უნივერსიტეტის სამეცნიერო ცენტრის ნიკო ბერძენიშვილის ჰუმანიტარულ და სოციალურ მეცნიერებათა მიმართულების თანამშრომლებმა მოწვეულ ექსპერტებთან ერთად უმაღლესი საგანმანათლებლო დაწესებულების შიდა და გარე შეფასების სისტემა შეიმუშავეს, რომელიც 2012-2013 სასწავლო წლიდან დაინერგება. ახალ კრიტერიუმებზე დაფუძნებული შეფასების სისტემა მიზნად ისახავს სწავლისა და სწავლების ხარისხის ამაღლებას, არსებული პრობლემებისა და გამოწვევების იდენტიფიცირებასა და რეკომენდაციების შემუშავებას. გამჭვირვალე, ციკლური და უწყვეტი შეფასების სისტემა სტუდენტთა, პროფესორ-მასწავლებელთა, კურსდამთავრებულთა და დამსაქმებელთა გამოკითხვას ითვალისწინებს. პროექტი აშშ-ის საერთაშორისო განვითარების სააგენტოს (USAID) ხელშეწყობითა და აღმოსავლეთ-დასავლეთის მართვის ინსტიტუტის პროგრამის „საჯარო პოლიტიკის, ადვოკატირებისა და სამოქალაქო საზოგადოების განვითარების პროგრამა საქართველოში“ ფარგლებში განხორციელდა.

ბათუმის შოთა რუსთაველის სახელმწიფო უნივერსიტეტში შოთა რუსთაველის ეროვნული სამეცნიერო ფონდის სახელმწიფო საგრანტო კონკურსების წარდგინება გაიმართა. სამეცნიერო ფონდის ხელმძღვანელმა სულხან სისაურმა და ფონდის წარმომადგენლებმა უმაღლესი საგანმანათლებლო დაწესებულების სამეცნიერო ცენტრის მკვლევრებსა და პროფესორ-მასწავლებლებს საგრანტო კონკურსებში შეტანილი ცვლილებები და განხორციელების პირობები გააცნეს. ასევე ისაუბრეს მსხვილბიუჯეტიანი სამეცნიერო საგრანტო პროექტების მიზნებსა და ამოცანებზე. ფონდის წარმომადგენლებმა პრეზენტაციაზე სრული ინფორმაცია წარმოადგინეს ისეთ მნიშვნელოვან კონკურსებზე, როგორიცაა სახელმწიფო სამეცნიერო გრანტები ფუნდამენტური კვლევებისათვის, სახელმწიფო სამეცნიერო გრანტები გამოყენებითი კვლევებისათვის, ერთობლივი კვლევები უცხოეთში მოღვაწე თანამემამულეებთან ერთად და პრეზიდენტის სამეცნიერო გრანტები ახალგაზრდა მეცნიერთათვის.

კოვენტრის უნივერსიტეტმა (დიდი ბრიტანეთი) ტემპუსის საგრანტო პროექტის „უნივერსიტეტი-საწარმო თანამშრომლობის გაძლიერება კომპეტენციებზე დაფუძნებული სწავლების გზით სომხეთში, საქართველოსა და უკრაინაში (Cap4com)” მეორე საორგანიზაციო შეხვედრას უმასპინძლა. ოთხდღიანი შეხვედრა მიზნად ისახავდა უმაღლეს სასწავლებლებში პროექტის მიმდინარეობის ანგარიშის გაცნობასა და შემდგომი განვითარების პერსპექტივების განხილვას. ბათუმის შოთა რუსთაველის სახელმწიფო უნივერსიტეტში პროექტის კოორდინატორმა, ასოცირებულმა პროფესორმა ლელა თურმანიძემ პროექტის მონაწილეებს უმაღლეს საგანმანათლებლო დაწესებულების საწარმოებთან თანამშრომლობის ცენტრის ჩამოყალიბების კონცეფცია წარუდგინა და ბიზნეს სექტორთან მჭიდრო თანამშრომლობის პერსპექტივებზე ესაუბრა. ტემპუსის საგრანტო პროექტი პარტნიორ უნივერსიტეტებში ევროპული სტანდარტების დანერგვის ხელშეწყობას, თანამედროვე სასწავლო და კვლევითი პროგრამების შემუშავებასა და განხორციელებას ითვალისწინებს.

სტუდენტური დღეები „აჭარა 2012“ საზეიმო მსვლელობით ბათუმის ქუჩებში დაიწყო და ფიჭვნარის ზღვისპირა პარკში კონცერტით დასრულდა. ბათუმის შოთა რუსთაველის სახელმწიფო უნივერსიტეტის, ბათუმის ხელოვნების სასწავლო უნივერსიტეტის, ბათუმის სახელმწიფო საზღვაო აკადემიისა და ბათუმის ნავიგაციის სასწავლო უნივერსიტეტის სტუდენტები ერთმანეთს რამდენიმე საათის განმავლობაში ოთხ ნომინაციაში ეჯიბრებოდნენ. კომპეტენტურმა ჟიურიმ მის სტუდენტი, საუკეთესო ორიგინალური და ფოლკლორული ნომერი, მან-სან-კანისა და ფეხბურთის გუნდი გამოავლინა. ბათუმის შოთა რუსთაველის სახელმწიფო უნივერსიტეტის ქორეოგრაფიულმა ანსამბლმა „ტბეთმა“ ცეკვის „ქალთა ხორუმის“ შესრულებით საუკეთესო ორიგინალური ნომრის ნომინაციაში გაიმარჯვა.

აჭარის მთავრობის თავმჯდომარე ლევან ვარშალომიძე და განათლების, კულტურისა და სპორტის მინისტრი გია აბულაძე ბათუმის შოთა რუსთაველის სახელმწიფო უნივერსიტეტის სტუდენტებს შეხვდნენ და ახალი და მიმდინარე მიზნობრივი პროგრამები გააცნეს. აჭარის მთავრობის დაფინანსებით სტუდენტების დახმარების მიზნობრივი პროგრამა შეიქმნა, რომელიც უმაღლესი განათლების პირველი საფეხურის აკრედიტებულ უმაღლეს საგანმანათლებლო პროგრამებზე ჩარიცხული სტუდენტების სწავლის საფასურის დაფარვას ითვალისწინებს. მრავალწლიანი პროგრამა ახალი სასწავლო წლიდან ამოქმედდება და მასში მონაწილეობის მიღება შეუძლიათ აჭარის მაღალმთიან რაიონებში მცხოვრებ სტუდენტებს, ობოლებს, მრავალშვილიანი და სოციალურად დაუცველი ოჯახის წევრებს. აჭარის განათლების, კულტურისა და სპორტის სამინისტრომ ტურიზმის განათლების განვითარების ხელშეწყობის მიზნობრივი პროგრამა შეიმუშავა, რომელიც მიზნად ისახავს საგანმანათლებლო ტურიზმის საბაზრო კვლევის შედეგებზე დაყრდნობით ტურიზმის განათლების რეფორმას, საგანმანათლებლო პროგრამების საერთაშორისო სტანდარტებთან შესაბამისობაში მოყვანას.