ახალი ამბები

27 სექტემბრის, სოხუმის დაცემის დღის აღსანიშნავად ბათუმის შოთა რუსთაველის სახელმწიფო უნივერსიტეტის სტუდენტები, პროფესორ-მასწავლებლები და ადმინისტრაციის წარმომადგენლები სიმბოლურად ზღვის სანაპიროსთან შეიკრიბნენ. ახალგაზრდებმა კიდევ ერთხელ გაიხსნეს 19 წლის წინ განვითარებული ტრაგიკული მოვლენები, საქართველოს ტერიტორიული მთლიანობისათვის დაღუპული გმირები და მათი ხსოვნის უკვდასაყოფად მანათობელი ფრანები გაუშვეს. აფხაზეთში საომარი მოქმედებები 1992 წლის 14 აგვისტოს დაიწყო, სამხედრო დაპირისპირებისას ქართული მხრიდან 10 ათასზე მეტი ჯარისკაცი და მშვიდობიანი მოქალაქე შეეწირა, ხოლო 350 ათასამდე დევნილი ღია ცის ქვეშ დარჩა.

აჭარის ა.რ. განათლების, კულტურისა და სპორტის მინისტრი გია აბულაძე განათლების ფონდის, სპორტისა და ახალგაზრდულ საქმეთა დეპარტამენტისა და დასაქმების სააგენტოს წარმომადგენლებთან ერთად რსუ-ს სტუდენტებს შეხვდა. მინისტრმა ახალგაზრდებს ახალი სასწავლო წლის დაწყება მიულოცა, სამინისტროს მიერ განხორციელებული სტუდენტთა დახმარების მიზნობრივი პროგრამები, კომპიუტერული ტექნოლოგიების, უცხო ენების, TOEFL-ის შემსწავლელი კურსები, სტუდენტური დასაქმებისა და უნივერსიტეტთან ერთად განხორციელებული, მიმდინარე და ახალი პროექტები წარუდგინა. შეხვედრა კითხვა-პასუხის რეჟიმში წარიმართა და უწყების პირველმა პირმა სტუდენტების აქტუალურ შეკითხვებს უპასუხა.

თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტსა და „კიევ-მოჰილას“ აკადემიის ნაციონალურ უნივერსიტეტს შორის. ხელშეკრულება ერთობლივი საგანმანათლებლო პროგრამებისა და სამეცნიერო პროექტების განხორციელებას ისახავს მიზნად. მხარეთა შეთანხმებით ბაკალავრიატის, მაგისტრატურის და დოქტორანტურის სტუდენტებისა და პროფესორ-მასწავლებლებისათვის ამოქმედდება გაცვლითი პროგრამები, ჩატარდება სამეცნიერო კონფერენციები, სემინარები და ტრენინგები. მემორანდუმის ფარგლებში დაიგეგმა საგანმანათლებლო, სამეცნიერო და მეთოდოლოგიური ლიტერატურის გაცვლა და ბიბლიოთეკის ონლაინ-რეჟიმში გამოყენება.

საინფორმაციო ტექნოლოგიების თანამედროვე მიღწევებზე უცხოელმა პროფესორებმა ბათუმის შოთა რუსთაველის სახელმწიფო უნივერსიტეტის სტუდენტებისათვის ლექციები წაიკითხეს. ნიუმბერგის უნივერსიტეტის პროფესორმა იოჰან იოშერმა ახალგაზრდებს თანამედროვე მიკროპროცესორების დაპროექტება გააცნო. სალექციო კურსში წარმოდგენილი იყო თანამედროვე მიკროელექტრონიკაში გამოყენებული ინტეგრალური სქემების შემადგენელი ელემენტური ბაზის დაპროექტების შესაძლებლობები და გერმანიის წამყვან უნივერსიტეტებში ჩატარებული ექსპერიმენტების შედეგები. ესტონელმა პროფესორმა ვლადიმერ ტომბერგმა ისეთ მნიშვნელოვან საკითხზე ისაუბრა, როგორიცაა სამომხმარებლო გამოცდილების პროექტირება ვებტექნოლოგიებში. ყურადღება გაამახვილა თანამედროვე პროგრამული უზრუნველყოფის, ინტერნეტ ტექნოლოგიების გამოყენებით საინფორმაციო ინფრასტრუქტურის, სამომხმარებლო ინტერფეისის დაპროექტებისა და რეალიზაციის თანამედროვე ტექნოლოგიებზე. ავსტრიელმა პროფესრომა ანდრეას ზალსბურგერმა ლექციები დიდ ადრონულ კოლაიდერში ”ატლასის” დანადგარზე ჩატარებულ ექსპერიმენტზე, მის მნიშვნელობასა და შედეგებზე წაიკითხა.

ევროპისა და ამერიკის წამყვანი უნივერსიტეტების პროფესორ-მასწავლებლებს ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ სერტიფიკატები გადასცა და მადლობა გადაუხადა გაწეული თანამშრომლობისათვის. რამდენიმე დღეა ამერიკელი, გერმანელი, ესტონელი და პოლონელი ექსპერტები ლექციებს კითხულობენ საინფორმაციო ტექნოლოგიების, საჯარო ადმინისტრირების, საინჟინრო ტექნოლოგიების, სტრატეგიული მენეჯმენიტისა და ეკონომიკის მიმართულებით. უცხოელი პროფესორ-მასწავლებლები სტუდენტებს ქვეყნის განვითარებისათვის მნიშვნელოვანი დარგების მიღწევებს აცნობენ და მრავალწლიანი მუშაობის გამოცდილებას უზიარებენ.