ახალი ამბები

აკადემიური საბჭოს გადაწყვეტილებით, ნორვეგიის ტელემარკის უნივერსიტეტის ხელოვნებისა და მეცნიერებათა ფაკულტეტის პროფესორს თეიმურაზ აბესაძეს ბათუმის შოთა რუსთაველის სახელმწიფო უნივერსიტეტის განვითარებაში შეტანილი წვლილისათვის საპატიო დოქტორის წოდება მიენიჭა. ქართველი მეცნიერის ხელშეწყობით ტურიზმის ფაკულტეტი ახორციელებს საერთაშორისო პროექტს ,,ნორვეგიაში, საქართველოში და ყირგიზეთში მდგრადი ტურიზმის განვითარებისა და ინოვაციების სფეროში განათლება“. პროექტი ითვალისწინებს ერთობლივი საგანმანათლებლო, სამეცნიერო პროექტების ამოქმედებას და პროფესორ-მასწავლებლების სტაჟირებას. ტურიზმის ფაკულტეტის სტუდენტები გაცვლითი პროგრამების ფარგლებში აგვისტოში ტელემარკის უნივერსიტეტში გაემგზავრებიან. ასევე შემუშავდება კურიკულიმი ინოვაციებისა და სამეწარმეო სწავლების სფეროში. პროფესორ თეიმურაზ აბესაძის ხელშეწყობით მიმდინარეობს ინოვაციური და მდგრადი ტურიზმის განვითარების საკითხების კვლევა.

დაფუძნდა სკოლისა და ბათუმის შოთა რუსთაველისა სახელმწიფო უნივერსიტეტის თანამშრომლობის კლუბი ,,სკოლა-უნივერსიტეტი”. კლუბი ზოგადსაგანმანათლებლო დაწესებულებებისა და უმაღლესი სასწავლებლის დაახლოებას, სამეცნიერო მუშაობის სწავლებას, შემეცნებითი ღონისძიებების ორგანიზებას, საგანმანათლებლო პროექტების მომზადებას, კულტურული ღონისიეძებების ჩატარებასა და ნიჭიერი ახალგაზრდების გამოვლენას ისახავს მიზნად. თანამშრომლობა ხელს შეუწყობს საგანმანათლებლო სივრცეში რეფორმირების პროცესს, გააღრმავებს სტუდენტთა პრაქტიკულ გამოცდილებას და გაზრდის მასწავლებელთა სერტიფიცირების ხარისხს. თანამშრომლობის კლუბი განათლებისა და მეცნიერებათა ფაკულტეტის ორგანიზებით შეიქმნა და მასში გაწევრიანება ყველა მსურველს შეეძლება. ,,სკოლა-უნივერსიტეტის” პრეზენტაცია კერძო სკოლის „ნიკეს“ მოსწავლეების მიერ მომზადებული თეატრალიზებული წარმოდგენით - „ვაჰ, დრონი, დრონი!“ დასრულდა.

ბათუმის შოთა რუსთაველის სახელმწიფო უნივერსიტეტის რექტორმა ალიოშა ბაკურიძემ, ბათუმის სახელმწიფო საზღვაო აკადემიის რექტორის მოვალეობის შემსრულებელმა ირაკლი შარაბიძემ, ბათუმის ხელოვნების სასწავლო უნივერსიტეტის რექტორმა ერმილე მესხიამ და ბათუმის ნავიგაციის სასწავლო უნივერსიტეტის რექტორმა პარმენ ხვედელიძემ თანამშრომლობის მემორანდუმს მოაწერეს ხელი. ხელშეკრულების ფარგლებში განხორციელდება ერთობლივი საგანმანათლებლო პროგრამები და სამეცნიერო პროექტები, ჩატარდება კონფერენციები, სიმპოზიუმები, სემინარები და საზაფხულო სკოლები. მემორანდუმი ასევე ითვალისწინებს პროფესორ-მასწავლებლებისა და სტუდენტების ურთიერთგაცვლას, ბაკალავრიატისა და მაგისტრატურის სასწავლო პროგრამების შემუშავებას, კურიკულუმებისა და ზოგადსაუნივერსიტეტო მოდულების შედგენას, ბიბლიოთეკით სარგებლობას. მხარეები იზრუნებენ საგრანტო პროგრამების მოძიებასა და განხორციელებაზე.

გარემოს დაცვის საერთაშორისო დღეს მიეძღვნა განათლებისა და მეცნიერებათა ფაკულტეტის ბიოლოგიის სპეციალობის სტუდენტთა ვორქ-შოპი თემაზე: „ჩვენი გარემო ჩვენს ხელშია“. ღონისძიებაში მომავალ ბიოლოგებთან ერთად ჭარნალის საჯარო სკოლის მოსწავლეები მონაწილეობდნენ. ახალგაზრდებმა მოხსენებები გარემოსდაცვის პრობლემებზე, ზღვისპირა აჭარის იშვიათ მცენარეებზე, ცხოვრლებსა და მტირალას ეროვნული პარკის ბიომრავალფეროვნების საკითხებზე წარმოადგინეს. ვორქ-შოპი ბიოლოგიის დეპარტამენტის, განათლებისა და მეცნიერებათა ფაკულტეტის სტუდენტთა ბიომრავალფეროვნების კლუბისა და სტუდენტთა თვითმმართველობის ორგანიზებით გაიმართა.

ცნობილი შვედი დიპლომატისა და საზოგადო მოღვაწის რაულ ვალენბერგის ხსოვნის საღამო გაიმართა. შედგა შვედი გმირისადმი მიძღვნილი დოკუმენტური ფილმის ჩვენება და გაიხსნა მისივე ცხოვრების ამსახველი პოსტერების გამოფენა. უნგრეთის რესპუბლიკის საგანგებო და სრულუფლებიანმა ელჩმა სანდორ სზაბორმა, ბათუმის ვიცე-მერმა ნათია სურგულაძემ და აჭარის ქართულ-ებრაული ასოციაციის ხელმძღვანელმა ერიკ კრუპნიკმა გმირის ცხოვრებასა და მოღვაწეობაზე ისაუბრეს. უნგრეთის საელჩოს და აჭარის ქართულ-ებრაულ ასოციაციის ორგანიზებული საღამოს მონაწილეებმა პატივი მიაგეს შვედი დიპლომატის ხსოვნას და გმირის სურათთან სანთლები დაანთეს. რაულ ვალენბერგმა მეორე მსოფლიო ომის დროს შვედური პასპორტების გაცემითა და თავშესაფრების - „შვედური სახლების“ საშუალებით ათიათასობით ებრაელი სიკვდილს გადაარჩინა. ღონისძიებას უნივერსიტეტის სტუდენტები, პროფესორ-მასწავლებლები, დიპლომატიური კორპუსისა და საზოგადეობის წარმომადგენლები.