ახალი ამბები

ტურიზმის განვითარების აქტუალურ საკითხებს ეძღვნება III საერთაშორისო სამეცნიერო-პრაქტიკული კონფერენცია ,,მდგრადი ტურიზმი: ეკონომიკა და ბიზნესი“. საქართველოსა და უცხოეთის წამყვანი უნივერსიტეტების პროფესორ-მასწავლებლები, მკვლევრები და ტურიზმის დარგის წარმომადგენლები ორი დღის განმავლობაში 100–ზე მეტ მოხსენებას წარმოადგენენ. ქართველი, გერმანელი, ამერიკელი, თურქი, ლატვიელი, ნორვეგიელი, ბელორუსი, უნგრელი და ყირგიზი სპეციალისტები მდგრად ტურიზმზე, ტურისტული ბაზრის განვითარების პერსპექტივებზე, მასთან დაკავშირებულ ეკონომიკურ-სოციალურ ფაქტორებზე და სხვა მნიშვნელოვან საკითხებზე იმსჯელებენ. საერთაშორისო კონფერენცია ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტისა და აჭარის არ ტურიზმისა და კურორტების დეპარტამენტის ორგანიზებით იმართება.

ბათუმის შოთა რუსთაველის სახელმწიფო უნივერსიტეტში რესპუბლიკური სამეცნიერო კონფერენცია ჩატარდა თემაზე: „გლობალიზაცია, ნაციონალიზმი, იდენტობა“. სამეცნიერო სესია იდენტობისა და კულტურათაშორისი დიალოგის საკითხების წარმოჩენას, მეცნიერულ გააზრებასა და შესაბამისი დასკვნების გაკეთებას ისახავდა მიზნად. სოციალურ მეცნიერებათა, ბიზნესისა და სამართალმცოდნეობის ფაკულტეტის სოციალურ მეცნიერებათა დეპარტამენტისა და ივანე ჯავახიშვილის სახელობის თბილისის სახელმწიფო უნივერსიტეტის ორგანიზებულ კონფერენციაზე სამეცნიერო მოხსენებები ორი სექციის მიმართულებით იყო წარმოდგენილი. მკვლევრებმა ისეთ საკითხებზე იმსჯელენ, როგორიცაა: გლობალიზაცია და ეროვნული სამართლებრივი კულტურა, ნაციონალური იდენტობა და ისტორიული მეხსიერება, გლობალიზაციის პირობებში საქართველოს სისტემური ტრანსფორმაციის ზოგიერთი ასპექტი.

სოციალურ მეცნიერებათა, ბიზნესისა და სამართალმცოდნეობის ფაკულტეტის იურიდიულ კლინიკაში პროექტის ,,ნაფიცი მსაჯული 4“ პრეზენტაცია გაიმართა. პროექტი „ევროპის იურისტ სტუდენტთა ასოციაცია საქართველოს elsa“ იმიტირებული პროცესების ჩემპიონატია და 2008 წლიდან ხორციელდება. მასში მონაწილეობა სამართალმცოდნეობის სპეციალობის სტუდენტებსა და ახალგაზრდა იურისტებს შეუძლიათ. ქვეყნის მასშტაბით შეირჩევა 8 გუნდი (სულ 24 მონაწილე, 5 გუნდი თბილისიდან, ხოლო თითო–თითო რეგიონებიდან). ,,ევროპის იურისტ სტუდენტთა ასოციაცია საქართველოს“ წარმომადგებლებმა ბათუმის შოთა რუსთაველის სახელმწიფო უნივერსიტეტის გუნდი კონკურსის წესით შერჩეული სტუდენტებით - ნათია ქვარცხავა, გიორგი მიქელაძე და თამილა აბუსელიძე - დააკომპლექტეს. ჩემპიონატის მონაწილეებს 3–5 ივნისს ტრენინგები ჩაუტარდებათ. პროექტის ფარგლებში 7 პროცესი გაიმართება და გამარჯვებული გუნდი 2 ივლისს ნაფიცი მსაჯულების ვერდიქტის საფუძველზე გამოვლინდება.

ბავშვთა დაცვის საერთაშორისო დღე პატარებს ბათუმის შოთა რუსთაველის სახელმწიფო უნივერსიტეტის სტუდნტებმა მიულოცეს. უმაღლესი საგანმანათლებლო დაწესებულების სტუდენტთა თვითმმართველობის მხარდაჭერით ახალგაზრდები ბათუმის №16 ბავშვთა ბაღისა და ურეხის მზრუნველობამოკლებულ ბავშვთა სახლის აღსაზრდელებს ნაყინითა და ტკბილეულით გაუმასპინძლდნენ. ბავშვთა დაცვის დღე 1949 წელს ქალთა საერთაშორისო დემოკრატიულმა ფედერაციამ დააწესა და 1950 წლიდან ყოველწლიურად, 1 ივნისს მსოფლიოს მრავალ ქვეყანაში აღინიშნება.

შ. ესენოვის სახელობის კასპიის (ყაზახეთი) სახელმწიფო უნივერსიტეტის პრორექტორი, ფილოლოგიის მეცნიერებათა დოქტორი, პროფესორი ჟანა ტოლისბაევა ბათუმის შოთა რუსთაველის სახელმწიფო უნივერსიტეტს ეწვია. ადმინისტრაციის ხელმძღვანელთან, რექტორის მოადგილეებთან, დეკანებთან და დეპარტამენტის ხელმძღვანელებთან გამართულ შეხვედრაზე დაიგეგმა უნივერსიტეტებს შორის თანამშრომლობის მემორანდუმის გაფორმება. მხარეებმა გაცვლითი პროგრამებისა და სასწავლო-სამეცნიერო პროექტების განხორციელების პირობებზე ისაუბრეს.