ახალი ამბები

სტუდენტთა საინიციატივო ჯგუფის ორგანიზებით, სტუდენტური თვითმმართველობისა და სამეცნიერო ცენტრის მხარდაჭერით ბათუმის შოთა რუსთაველის სახელმწიფო უნივერსიტეტის ფრანგული ენის სპეციალობის სტუდენტებისათვის პროექტი "ფრანგული ოდისეა" განხორციელდა. პროექტის ფარგლებში ფრანგული კულტურის საღამო გაიმართა, მოეწყო საფრანგეთის ღირსშესანიშნაობებისა და კულტურულ ძეგლებისადმი მიძღვნილი სლაიდ-შოუ, ჩატარდა სხვადასხვა სახის ინტელექტუალურ-შემეცნებითი თამაშები. საღამოს სტუდენტებთან ერთად ევროპეისტიკის დეპარტამენტის ხელმძღვანელი მარინა გიორგაძე და ფრანგული ენის პროფესორ-მასწავლებლები ესწრებოდნენ.

ნორვეგიის ტელემარკისა და ბათუმის შოთა რუსთაველის სახელმწიფო უნივერსიტეტების ერთობლივი პროექტის ,,ნორვეგიაში, საქართველოსა და ყირგიზეთში ტურიზმის მდგრადი განვითარებისა და ინოვაციების სფეროში განათლება“ პირველი ეტაპის განხორციელება დაიწყო. პროექტი ითვალისწინებს ყოველწლიურად ტურიზმის ფაკულტეტის 3 სტუდენტის ერთწლიან სწავლებას პარტნიორ უმაღლეს სასწავლებელში ,,ტურიზმის მენეჯმენტის“ სპეციალობაზე. მონაწილეები კომპეტენტურმა ჟიურიმ ინგლისური ენის ცოდნის, მაღალი აკადემიური მოსწრებისა და კულტურათაშორისი კომუნიკაციის უნარის მიხედვით შეარჩია. 45 კონკურსანტიდან მეორე ეტაპზე 10 სტუდენტი გადავიდა, რომელთაც ნორვეგიის ტელემარკის უნივერსიტეტის პროფესორებმა თემურ აბესაძემ და ფრუდე ლენგიმ 26 მარტიდან 6 აპრილამდე ტრენინგები ჩაუტარეს. მათგან სამი საუკეთესო სტუდენტი თამთა ქარცივაძე, თამაზ მახარაძე და ეთერ ჯინჭარაძე 2012 წლის 15 აგვისტოდან სწავლას ნორვეგიაში განაგრძობენ.

,,საზღვარგარეთ მცხოვრებ ქართველთა დასახლებებისა და ყოფის კვლევის“ პროგრამის ფარგლებში მუდმივმოქმედი სამეცნიერო სემინარი გაიმართა თემაზე: ,,მუჰაჯირობა მე-19 საუკუნის სამცხე-ჯავახეთსა და აჭარაში (მიმდინარეობა და გადასახლებულთა რაოდენობა)“. პროფესორმა ჯუმბერ ვარდმანიძემ განიხილა ისეთი მნიშვნელვანი საკითხები, როგორიცაა: სამცხე-ჯავახეთის მოსახლეობის რაოდენობა საომარი მოქმედებების დაწყებამდე, მუჰაჯირობის მიმდინარეობა 1828-1829 წლების საომარი მოქმედებების პერიოდში და ანდრიაპოლის საზავო ხელშეკრულების შემდეგ.

შოთა რუსთაველის სახელმწიფო უნივერსიტეტმა თანამშრომლობის მემორანდუმი გააფორმა ,,ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის აჭარის რეგიონულ დეპარტამენტთან“, შპს ”ბი-ემ-სი გორგიასთან”, შპს ”ბათუმის წყალთან” და სამშენებლო კომპანია "GIMG"-თან. ხელშეკრულების ფარგლებში განხორციელდება ერთობლივი საგანმანათლებლო პროგრამები და სამეცნიერო პროექტები, ჩატარდება ერთობლივი კვლევები, კონფერენციები, სიმპოზიუმები და სემინარები. მემორანდუმი ასევე ითვალისწინებს გამოცდილების გაზიარებასა და პარტნიორი ორგანიზაციების ბაზაზე სტუდენტების, მაგისტრანტებისა და რეზიდენტების პრაქტიკის გავლას.

უნივერსიტეტში აუტიზმის ცნობადობის ამაღლების საერთაშორისო დღე აღნიშნა. რსუ-ს, საქართველოს აუტიზმის საზოგადოებისა და ბათუმის რესპუბლიკური საავადმყოფოს ნეირორეაბილიტაციის განყოფილების ორგანიზებით გამართულ საინფორმაციო შეხვედრაზე ექიმებმა და ფსიქოლოგებმა დაავადების სპეციფიკაზე, თანმდევ პრობლემებსა და სამედიცინო დახმარების აუცილებლობაზე ისაუბრეს. აუტიზმი გავრცელების მაღალი სიხშირისა და განსაკუთრებული სპეციფიკურობის გამო შეფასდა, როგორც საზოგადოებრივი ჯანდაცვის სერიოზული კრიზისი და გამოწვევა. გაეროს გენერალურმა ასამბლეამ 2007 წლის 18 დეკემბერს მიიღო რეზოლუცია და 2 აპრილი აუტიზმის ინფორმაციის გავრცელების მსოფლიო დღედ გამოცხადდა. 2007-2009 წლებში ჩატარებული კვლევის მიხედვით საქართველოში 110 ბავშვიდან 1 დავადებულია აუტიზმით.