საქართველოში ჩინეთის საგანგებო და სრულუფლებიან ელჩს ჩენ ჯიანფუს შოთა რუსთაველის სახელმწიფო უნივერსიტეტში აჭარის განათლების, კულტურისა და სპორტის მინისტრი გია აბულაძე და რსუ-ს რექტორი, პროფესორი ალიოშა ბაკურიძე შეხვდნენ. მხარეები განათლებისა და კულტურის სფეროში თანამშრომლობის გაღრმავებასა და გაცვლითი პროგრამების განხორციელებაზე შეთანხმდნენ. შეხვედრა აჭარის ხალხური ცეკვის სახელმწიფო ანსამბლ „ხორუმისა“ და მ. კუხიანიძის სახელობის სახელმწიფო გუნდის კონცერტით დასრულდა.
საქართველოს შრომის, ჯანმრთელობისა და სოციალური დაცვის სამინისტრო და ჯანმრთელობის მსოფლიო ორგანიზაციის ევროპის რეგიონული ოფისი, შოთა რუსთაველის სახელმწიფო უნივერსიტეტთან და თბილისის სახელმწიფო სამედიცინო უნივერსიტეტთან ერთად ატარებს საზოგადოებრივი ჯანმრთელობის და გადაუდებელი მედიცინის სასწავლო კურსს (PHEM) „საზოგადოებრივი ჯანმრთელობა და საგანგებო სიტუაციების მართვა“. ხუთდღიანი ტრენინგის თემატიკა მოიცავს ისეთ საკითხებს, როგორიცაა საგანგებო სიტუაციაში მზადყოფნა პრეჰოსპიტალურ და ჰოსპიტალურ დონეზე, გადაუდებელი სამედიცინო მომსახურება, ეპიდემიების და გადამდები დაავადებების კონტროლი და ზედამხედველობა. სასწავლო კურსში მონაწილეობენ რსუ-ს პროფესორ-მასწავლებლები, სამედიცინო დაწესებულებებისა და სხვა სახელმწიფო ორგანიზაციების წარმომადგენლები. საზოგადოებრივი ჯანმრთელობის და გადაუდებელი მედიცინის სასწავლო კურსის ფარგლებში საქართველოს მასშტაბით 80-ზე მეტი ჯანდაცვის მენეჯერი მომზადდა.
შოთა რუსთაველის დარბაზში კულტურულ-საგანმანათლებლო და სახელოვნებო ორგანიზაციების წარმომადგენლებისათვის კონფერენცია გაიმართა სახელწოდებით: „კულტურული პოლიტიკის ახლებური გააზრება“. კონფერენცია შვედური სახელოვნებო ორგანიზაცია Intercult -ის პროექტ Corners Caucasus Xpedition -ის ფარგლებში ტარდება, რომლის მიზანია ევროპის კუთხეებში მოგზაურობის დროს მიღებულ შთაბეჭდილებებზე დაყრდნობით პროექტების მომზადება, რეგიონის ტრადიციული ხედვის შესწავლა და განსხვავებული, საინტერესო იდეის წარმოჩენა. უნივერსიტეტს 10 ქვეყნის 30 ხელოვანი და პროდიუსერი ეწვია, რომელთაც ქართველ კოლეგებს კავკასიური ექსპედიციის მნიშვნელობა და სამომავლო გეგმები გააცნეს. დაგეგმილია ახალი მიდგომების შემუშავება, საერთაშორისო კონტაქტების დამყარება და კულტურული ტურიზმის განვითარება.
თბილისის სახელმწიფო სამედიცინო უნივერსიტეტთან გაფორმებული თანამშრომლობის მემორანდუმის ფარგლებში რსუ-ს ჯანდაცვის მიმართულების სტუდენტებისა და პრაქტიკოსი ექიმებისათვის სემინარი ჩატარდა თემაზე: „ქირურგიული ინფექციების ანტიბაქტერიული მკურნალობის პრინციპი“. სწავლება ითვალისწინებდა უწყვეტი განათლების ხელშეწყობასა და მომავალი მედიკოსების ინფორმირებულობას ისეთ დარგებში, როგორიცაა კლინიკური მიკრობიოლოგია და ანტიბაქტერიული თერაპია. ორდღიანი სემინარი შოთა რუსთაველის სახელმწიფო უნივერსიტეტის, საქართველოს გადაუდებელი ქირურგიის ასოციაციისა და თბილისის სახელმწიფო სამედიცინო უნივერსიტეტის ორგანიზებით გაიმართა.
საქართველოში ამერიკის შეერთებული შტატების საელჩოს განათლების, კულტურისა და პრესის განყოფილების უფროსი მაიკლ ტერნერი შოთა რუსთაველის სახელმწიფო უნივერსიტეტის რექტორს, პროფესორ ალიოშა ბაკურიძეს შეხვდა. ვიზიტი გაცნობითი ხასიათის იყო და მიზნად ისახავდა ორ ქვეყანას შორის თანამშრომლობის გაღრმავებას და ერთობლივი სასწავლო, საგანმანათლებლო და კულტურული პროექტების განხორციელებას. დიპლომატიური კორპუსის წარმომადგენელი უმაღლესი სასწავლებლის სასწავლო პროგრამებს, მატერიალურ-ტექნიკურ ბაზას გაეცნო და ამერიკის შესწავლის ცენტრი დაათვალიერა.
