ახალი ამბები

შოთა რუსთაველის დარბაზში პროფესორების იური ბიბილეიშვილისა და ლელა თავდგირიძის წიგნის „სტუდენტთა საუნივერსიტეტო სწავლებისა და აღზრდის საკითხები“ წარდგინება გაიმართა. დამხმარე სახელმძღვანელო საუნივერსიტეტო სწავლების, აღზრდისა და განათლების საკითხებს ეძღვნება. მასში აღწერილია სტუდენტთა სწავლებისა და აღზრდის ტრადიციული, თანამდეროვე მეთოდები, ტექნოლოგიები და ინოვაციები. სახელმძღვანელო ხელს შეუწყობს მაღალკვალიფიციური და კონკურენტუნარიანი სპეციალისტების მომზადებას. ერთობლივი ნაშრომი განკუთვნილია დოქტორანტებისა და პროფესორ-მასწავლებლებისათვის.

შავი ზღვის დაცვის საერთაშორისო დღე რსუ-ში რამდენიმე ღონისძიებით აღინიშნა. შოთა რუსთაველის დარბაზში გამართულ შეხვედრაზე აჭარისა და აფხაზეთის გარემოს დაცვის სამმართველოს წარმომადგენლებმა და სხვადასხვა უმაღლესი სასწავლებლის პროფესორ-მასწავლებლებმა შავი ზღვის დაცვის პრობლემებსა და მათი მოგვარების გზებზე იმსჯელეს. შავი ზღვის ეკოლოგიურ საკითხებს განათლებისა და მეცნიერებათა ფაკულტეტის საბუნებისმეტყველო მიმართულების პირველი კურსის სტუდენტებმა კონფერენცია მიუძღვნეს. სტუდენტებისა და პროფესორ-მასწავლებლებისაგან დაკომპლექტებულმა ჟიურიმ სხვადასხვა ნომინაციაში საუკეთესო ნაშრომები გამოავლინა.

ულტრასონოგრაფიის, ქირურგიული ტექნიკის, სასწრაფო და გადაუდებელი თერაპიის ტაქტიკის საკითხებს მიეძღვნა ორდღიანი საერთაშორისო ვორქშოფი სახელწოდებით: „ქირურგიული მენეჯმენტი და ტექნიკა“. ევროპის წამყვანმა ქირურგებმა და მიუნხენის ლუდვიგ მაქსიმილიანის უნივერსიტეტის პროფესორებმა ულტრასონოგრაფიის, ქირურგიის სპეციალობის, ურგენტული დახმარების ექიმებსა და სტუდენტებს ტრენინგები ჩაუტარეს და ბოლო წლებში წარმოებული კვლევის შედეგები გააცნეს. ასევე განიხილეს ქირურგიული მენეჯმენტისა და დიაგნოსტიკის მიმართულების სიახლეები. ვორქშოფი მიუნხენის ლუდვიგ მაქსიმილიანისა და შოთა რუსთაველის სახელმწიფო უნივერსიტეტებს შორის გაფორმებული მემორანდუმის ფარგლებში ჩატარდა.

შოთა რუსთაველის სახელმწიფო უნივერსიტეტში სასწავლო კრებულის "როგორ ვიცხოვრეთ ერთად XX საუკუნეში საქართველოში" პრეზენტაცია გაიმართა. ნაშრომი 2008-2011 წლებში ისტორიის მასწავლებელთა ევროპული ასოციაციისა (EUROCLIO) და ისტორიის მასწავლებელთა საქართველოს ასოციაციის ერთობლივი პროექტის ,,ტოლერანტობის მშენებლობა საქართველოში ისტორიის სწავლების გზით“ ფარგლებში გამოიცა. კრებულის წარდგინებასთან ერთად ტრენინგი "როგორ გამოვიყენოთ კრებულის მასალები სასწავლო პროცესში" ჩატარდა. სემინარში მონაწილეობდნენ რსუ-ს პროფესორ-მასწავლებლები, განათლებისა და მეცნიერებათა ფაკულტეტის მასწავლებლის მომზადების საგანმანათლებლო პროგრამის სტუდენტები, საჯარო და კერძო სკოლების ისტორიის პედაგოგები. შოთა რუსთაველის სახელმწიფო უნივერსიტეტის ისტორიის სწავლების მეთოდოლოგიის კაბინეტს ასოციაციის სახელით პერსონალური კომპიუტერი გადაეცა.

შოთა რუსთაველის სახელმწიფო უნივერსიტეტს ტალინის უნივერსიტეტის დელეგაცია რექტორის, პროფესორ ტიიტ ლანდის ხელმძღვანელობით ეწვია. ვიზიტი უმაღლეს სასწავლებლებს შორის გაფორმებული მემორანდუმის ფარგლებში შედგა და მიზნად ისახავდა თანამშრომლობის გაღრმავებასა და სასწავლო-სამეცნიერო პროექტების შემუშავებას. რსუ-ს რექტორთან, პროფესორ ალიოშა ბაკურიძესთან გამართულ შეხვედრაზე დაიგეგმა ერთობლივი სადოქტორო, სამაგისტრო პროგრამების განხორციელება და სამეცნიერო კონფერენციების, სიმპოზიუმების, სემინარების ჩატარება. ტალინის უნივერსიტეტის პროექტის „თბილისისა და ბათუმის უნივერსიტეტებში სოციალურ ფაკულტეტებზე სწავლების ხარისხის გაუმჯობესების მხარდაჭერა, ლექტორთა კვალიფიკაციის ამაღლება და ეფექტური ელექტრონული სწავლის სისტემის დანერგვა“ ეგიდით, ელექტრონულ სწავლების საკითხებზე ესტონელი პროფესორ–მასწავლებლები ორი დღის განმავლობაში სემინარებს, საჯარო ლექციებსა და ტრენინგებს ჩაატარებენ.