ახალი ამბები

შოთა რუსთაველის სახელმწიფო უნივერსიტეტმა თანამშრომლობის მემორანდუმი გააფორმა ,,ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის აჭარის რეგიონულ დეპარტამენტთან“, შპს ”ბი-ემ-სი გორგიასთან”, შპს ”ბათუმის წყალთან” და სამშენებლო კომპანია "GIMG"-თან. ხელშეკრულების ფარგლებში განხორციელდება ერთობლივი საგანმანათლებლო პროგრამები და სამეცნიერო პროექტები, ჩატარდება ერთობლივი კვლევები, კონფერენციები, სიმპოზიუმები და სემინარები. მემორანდუმი ასევე ითვალისწინებს გამოცდილების გაზიარებასა და პარტნიორი ორგანიზაციების ბაზაზე სტუდენტების, მაგისტრანტებისა და რეზიდენტების პრაქტიკის გავლას.

უნივერსიტეტში აუტიზმის ცნობადობის ამაღლების საერთაშორისო დღე აღნიშნა. რსუ-ს, საქართველოს აუტიზმის საზოგადოებისა და ბათუმის რესპუბლიკური საავადმყოფოს ნეირორეაბილიტაციის განყოფილების ორგანიზებით გამართულ საინფორმაციო შეხვედრაზე ექიმებმა და ფსიქოლოგებმა დაავადების სპეციფიკაზე, თანმდევ პრობლემებსა და სამედიცინო დახმარების აუცილებლობაზე ისაუბრეს. აუტიზმი გავრცელების მაღალი სიხშირისა და განსაკუთრებული სპეციფიკურობის გამო შეფასდა, როგორც საზოგადოებრივი ჯანდაცვის სერიოზული კრიზისი და გამოწვევა. გაეროს გენერალურმა ასამბლეამ 2007 წლის 18 დეკემბერს მიიღო რეზოლუცია და 2 აპრილი აუტიზმის ინფორმაციის გავრცელების მსოფლიო დღედ გამოცხადდა. 2007-2009 წლებში ჩატარებული კვლევის მიხედვით საქართველოში 110 ბავშვიდან 1 დავადებულია აუტიზმით.

სტუდენტთა სამეცნიერო ცენტრის ორგანიზებით კონფერენცია გაიმართა თემაზე: „რადიაცია“. განათლებისა და მეცნიერებათა და საინჟინრო-ტექნოლოგიური ფაკულტეტების სტუდენტებმა 18 მოხსენება წარმოადგინეს რადიაციის გამომწვევ მიზეზებზე, საქართველოში არსებულ რადიოეკოლოგიურ მდგომარეობაზე, რადიოაქტიური ფონის გავრცელებასა და მის შედეგებზე. ახალგაზრდები რადიაციის თემაზე დისკუსიებს საჯარო სკოლებშიც მოეწყობენ და თავიანთ მოხსენებებს მოსწავლეებსაც გააცნობენ.

პეტრე სარაჯიშვილის სახელობის ნევროლოგიის ინსტიტუტის მეცნიერ-თანამშრომელმა ალეკო ჭიკაძემ ღია ლექცია წაიკითხა თემაზე: ,,ძილის აპნოეს სინდრომი: დიაგნოზი და მკურნალობა“. ცნობილმა მეცნიერმა შოთა რუსთაველის სახელმწიფო უნივერსიტეტის სტუდენტებს ძილის აპნოეს სინდრომის გამომწვევი ფაქტორები, მასთან ასოცირებული გართულებები და ძირითადი სიმპტომები გააცნო.

ფრანკოფონიის საერთაშორისო დღის ფარგლებში შოთა რუსთაველის სახელმწიფო უნივერსიტეტის სააქტო დარბაზში შვეიცარიული ჯგუფ ,,Aliose”-ის კონცერტი გაიმართა. ჯგუფის წევრებმა ფრანგული შანსონისა და ტრადიციული როკის გაერთიანებით შექმნილი მუსიკა შეასრულეს. კონცერტს სტუდენტებთან და პროფესორ-მასწავლებლებთან ერთად საქართველოში შვეიცარიის საელჩოს წარმოამდგენლები ესწრებოდნენ. საქართველოში შვეიცარიის ელჩის მოადგილემ ანიტა შლუხტერ როტიმ უმაღლესი საგანმანათლებლო დაწესებულებას საჩუქრად ფრანგულენოვანი წიგნები გადასცა.