ახალი ამბები

ზაარლანდის უნივერსიტეტის პროფესორის კარმენ ნაისის ხელმძღვანელობით რსუ-ში მუშაობა დაიწყო DAAD-ის მიერ ორგანიზებულმა საზაფხულო სკოლამ თემაზე: ,,Akademisches Schreiben“, რომელშიც მონაწილეობას იღებს საქართველოს, სომხეთის, აზერბაიჯანის, გერმანიის და სხვა ქვეყნების უმაღლესი სასწავლებლების 30-მდე სტუდენტი. პროგრამის მიზანია ხელი შეუწყოს საზაფხულო სკოლის მონაწილეებს შორის გამოცდილების გაზიარებას, კომპეტენციის ამაღლებას და მათი მეშვეობით უნივერსიტეტებს შორის თანამშრომლობის ხელშეწყობას. ორკვირიანი საზაფხულო სკოლის ორგანიზებაში მონაწილეობენ პროგრამა ,,Kulturweit“-ის წარმომადგენლები იან ბარჩი, მაგნუს ლორენცი, რუსუდან ებრალიძე და რსუ-ს ასისტენტ პროფესორი თეონა ბერიძე.

თბილისის სახელმწიფო სამედიცინო უნივერსიტეტის სტუდენტური თვითმმართველობისა და ევროპის მედიკოს სტუდენტთა ასოციაციის თბილისის წარმომადგენლობის ორგანიზებით შოთა რუსთაველის სახელმწიფო უნივერსიტეტში საზეიმოდ გაიხსნა საერთაშორისო სამედიცინო სამიტი. 150-ზე მეტი ქართველი და უცხოელი ახალგაზრდა მედიკოსი სამი დღის განმავლობაში მოხსენებებს წარმოადგენს ისეთ თემებზე, როგორიცაა: სამედიცინო განათლება, პარკინსონის მკურნალობა თავის ტვინის ღრმა სტიმულაციის ნეიროქირურგიული მეთოდებით, ალერგიული რინიტების მკურნალობისა და დიაგნოსტიკის თანამედროვე ასპექტები, ინფექციური დაავადებების მართვა, დაავადებების სამედიცინო მექანიზმები. სამიტის მიზანია ხელი შეუწყოს სტუდენტთა ჩართვას სამედიცინო განათლების, მართვის და სამეცნიერო კვლევა-ძიების პროცესში.

თანამშრომლობის მემორანდუმი გაფორმდა შოთა რუსთაველის სახელმწიფო უნივერსიტეტსა და საქართველოს პარლამენტის ევროპასთან ინტეგრაციის კომიტეტს შორის. ხელშეკრულება ხელს შეუწყობს როგორც ევროპასთან ინტეგრაციის კომიტეტის მუშაობის გაუმჯობესებას, ასევე უმაღლესი სასწავლებლის იურიდიულ და სოციალურ მეცნიერებათა და სხვა მომიჯნავე მიმართულებების დეპარტამენტების ექსპერტების ჩართულობას ევროპული ინტეგრაციის აქტუალურ თემებზე კვლევისა და კონსულტაციების პროცესში. რსუ-ს ბიბლიოთეკაში საქართველოს პარლამენტის ევროპასთან ინტეგრაციის კომიტეტის თავმჯდომარემ დავით დარჩიაშვილმა ევროკავშირის საინფორმაციო კუთხე გახსნა და უმაღლეს სასწავლებელს საჩუქრად სახელმძღვანელოები და ლიტერატურა გადასცა.

რსუ-ს რექტორმა, პროფესორმა ალიოშა ბაკურიძემ და ბათუმის ბოტანიკური ბაღის დირექტორმა ეთერ მაჭუტაძემ ხელი მოაწერეს თანამშრომლობის მემორანდუმს. პრაქტიკული და ანალიტიკური უნარ-ჩვევებისა და თეორიული ცოდნის პრაქტიკული საქმიანობით განმტკიცების მიზნით დაიგეგმა ერთობლივი სასწავლო-სამეცნიერო პროექტებისა და გაცვლითი პროგრამების განხორციელება. ბათუმის ბოტანიკური ბაღის ბაზაზე სტუდენტები ასევე გაივლიან სასწავლო და პროფესიულ პრაქტიკას. მემორანდუმის ფარგლებში ჩატარდება სამეცნიერო კონფერენციები, სიმპოზიუმები და სემინარები.

შოთა რუსთაველის სახელმწიფო უნივერსიტეტი საქართველოს განათლებისა და მეცნიერებათა სამინისტროს და ნორვეგიის განათლებისა და კვლევის სამინისტროს ხელშეწყობით ატარებს ორკვირიან, ინკლუზიური განათლების საზაფხულო სკოლას. სწავლების მიზანია ინკლუზიური განათლების საკითხებში მასწავლებელთა მომზადების დონის ამაღლება და ინკლუზიური განათლების ძირითადი მიმართულებების განვითარება. საზაფხულო სკოლაში კვალიფიკაციას აიმაღლებენ საქართველოს სხვადასხვა რეგიონის საჯარო და კერძო სკოლაში მოქმედი პედაგოგები და მაძიებლები. მსმენელები ინკლუზიური განათლების სალექციო კურსს გაივლიან და მონაწილეობას მიიღებენ პრაქტიკულ მეცადინეობებში. საზაფხულო სკოლის მონაწილეთა შედეგების შეფასების საფუძველზე გაიცემა სერტიკიფიკატები.