ცნობილი ქირურგის, მედიცინის მეცნიერებათა დოქტორისა და რსუ-ს სრული პროფესორის აკაკი ბერიძის 70 წლისთავისადმი მიძღვნილი საიუბილეო საღამო გაიმართა. კოლეგებმა და საზოგადოების წარმომადგენლებმა საღამოზე იუბილარის მიღწევებსა და მედიცინის განვითარებაში შეტანილ წვლილზე ისაუბრეს. მის სახელს უკავშირდება აჭარაში ქირურგიული სკოლის ჩამოყალიბება და ოპერაციული მკურნალობის ორიგინალური მეთოდების დანერგვა.
ამერიკის იურისტთა ასოციაციის (ABA/RAL) ფინანსური მხარდაჭერით რსუ-ს სოციალურ მეცნიერებათა, ბიზნესისა და სამართალომცოდნეობის ფაკულტეტზე იურიდიული კლინიკა გაიხსნა. მომავალი იურისტები მოქალაქეებს უფასო კონსულტაციებს გაუწევენ სამოქალაქო და ადმინისტრაციული სამართლის საკითხებზე. სტუდენტები პროფესორ-მასწავლებელებისა და ადვოკატების დახმარებით ჩაერთვებიან სასამართლო საქმის წარმოებაში.
გერმანიის გაერთიანების 20 წლისთავს რსუ-მ და გოეთეს ინსტიტუტმა ერთობლივი ფოტოგამოფენა - ,,Ortszeit Lokal Time” მიუძღვნა. ბერლინელი ფოტოხელოვანის შტეფან კოპელკამის 1990-2001 წლებში აღმოსავლეთ გერმანიაში მიმდინარე მოვლენების ამსახველი 21 დოკუმენტური შავ-თეთრი ფოტო 20 დღეს იქნება გამოფენილი. ფოტოგამოფენის ფარგლებში ჩატარდება სემინარები სტუდენტებისა და პროფესორ-მასწავლებლებისათვის.
მასწავლებელთა პროფესიული განვითარების ცენტრმა რსუ-ს განათლების ფაკულტეტზე საინფორმაციო კუთხე გახსნა. კუთხე ადგილობრივი კოორდინატორის დახმარებით სტუდენტებსა და მომავალ მასწავლებლებს საფუძვლიან ინფორმაციას მიაწვდის ცენტრის საქმიანობის, სიახლეებისა და არსებული პროექტების შესახებ. ასევე ხელს შუეწყობს პროგრამებში ახალგაზრდების ჩართულობასა და დასაქმებას.
ნორვეგიელი მწერლისა და ნობელიანტის კნუტ ჰამსუნის დაბადებიდან 150 წლისთავი რსუ-მ ლიტერატურული სემინარით ,,კნუტ ჰამსუნი და კინო“ აღნიშნა. იუბილარის საქართველოში მოგზაურობასა და შემოქმედებაზე ნობელიანტის შვილიშვილმა ლეიფ ჰამსუნმა, ნორვეგიელმა მწერლებმა და საზოგადო მოღვაწეებმა ისაუბრეს.
