,,აღმოსავლეთ შავიზღვისპირეთის რეგიონი წინაანტიკურ და ანტიკურ ხანაში - შეხედულებები, დასკვნები და მოსაზრებები უახლესი აღმოჩენებისა და თეორიების მიხედვით“, ,,ქართული რენესანსი“ და ,,ტაო-კლარჯეთი ქართულ რენესანსული კულტურის ჭრილში“ - ეს ის თემებია, რომელთაც სტუდენტთა და ახალგაზრდა მეცნიერეთა III სამეცნიერო, ორდღიანი სიმპოზიუმი დაეთმო.
სტუდენტთა საერთაშორისო დღე რსუ-ს ჯანდაცვის ფაკულტეტის სტუდენტებმა სამეცნიერო კონფერენციით აღნიშნეს. მომავალმა მედიკოსებმა დარგის აქტუალურ თემებზე იმსჯელეს და პატივი მიაგეს იმ ჩეხ თანატოლებს, რომლებიც 1939 წელს ფაშისტმა ოკუპანტებმა სახელმწიფოებრიობის დაცვისათვის დახვრიტეს.
ქართულ-თურქულ ენოვანი ჟურნალი ,,ფიროსმანი“ რსუ-ს პროფესორ-მასწავლებლებს, სტუდენტებსა და საზოგადოების წარმომადგენლებს, რედაქტორმა ბექა-ფარნა ჩილაშვილმა (ფაჰრეთინ ჩილოღლუმ) წარუდგინა. ჟურნალი სამ თვეში ერთხელ გამოდის და თურქეთის ჩვენებურებში ეროვნული ფასეულობებისა და თვითშეგნების დაცვას ემსახურება. ჟურნალი აქტიურად ეწევა საქართველოს ისტორიის, კულტურისა და ხელოვნების პოპულარიზაციას.
სტუდენტური თვითმართველობის პროექტის ,,ნაფიცი მსაჯულების“ ფარგლებში გამართულ იმიტირებულ სასამართლო პროცესზე სამართალმცოდნეობის სპეციალობის სტუდენტებმა ნაფიცი მსაჯულების მონაწილეობით მალხაზ სიგუას ბრალეულობა განსაჯეს. პროექტი, რომელიც სტუდენტების პროფესიული უნარ-ჩვევების ამაღლებასა და ნაფიცი მსაჯულების ინსტიტუტის პოპულარიზაციას ისახავს მიზნად, მომავალშიც გაგრძელდება.
შავი ზღვის დაცვის საერთაშორისო დღე რსუ-ს საბუნებისმეტყველო მეცნიერებათა ფაკულტეტმა და ბიოლოგიის დეპარტამენტმა სტუდენტური ვორქშოფით ,,რა ვიცით შავი ზღვის შესახებ“ აღნიშნეს. სტუდენტებმა და ჭარნალის საჯარო სკოლის მოსწავლეებმა შავი ზღვის დაცვის პრობლემებზე მოხსენებები წარმოადგინეს და სამომავლო ერთობლივ პროექტებზე შეთანხმდნენ.
