ახალი ამბები

2022 წელი ბსუ-ს ქართველოლოგიის ცენტრმა მნიშვნელოვანი მონოგრაფიებით დაასრულა. დაისტამბა რამდენიმე საყურადღებო მონოგრაფია, რომლებიც ავსებს ცოდნას ისტორიული სამხრეთ საქართველოს შესახებ. მკითხველმა მიიღო მამია ფაღავას, მერი ცინცაძის, მაია ბარამიძის მონოგრაფია „ქართული ენის შავშური დიალექტი“, თინა შიოშვილის მონოგრაფია - „ტაოური ფოლკლორი“, ზაზა შაშიკაძისა და მირიან მახარაძის მონოგრაფია - „იუსუფელის რაიონი (კაშხალთმშენებლობა, სოფლები და ძეგლები)“ და ზაზა შაშიკაძის, მირიან მახარაძისა და ალკაზარ კაშიას მონოგრაფია - „თურქეთის არქივებში დაცული დოკუმენტები საქართველოს შესახებ“.

ბათუმის შოთა რუსთაველის სახელმწიფო უნივერსიტეტმა ხელვაჩაურის მუნიციპალიტეტის N1 სკოლაში აბიტურიენტებისთვის ღია კარის დღე გამართა. ბსუ-ს ჰუმანიტარულ მეცნიერებათა ფაკულტეტის დეკანმა, ასოცირებულმა პროფესორმა თეონა ბერიძემ, პროფესორმა მალხაზ ჩოხარაძემ და ასოცირებულმა პროფესორმა ნანა ტრაპაიძემ ხელვაჩაურის მუნიციპალიტეტის სხვადასხვა სკოლის მეთორმეტეკლასელებს ბსუ-ს საბაკალავრო პროგრამები, სტუდენტური ცხოვრება, სტიპენდიები, გაცვლითი პროგრამები და სწავლის პირობები გააცნეს. შეხვედრის დასასრულს, აბიტურიენტებს სამახსოვრო საჩუქრები გადაეცათ.

ბათუმის შოთა რუსთაველის სახელმწიფო უნივერსიტეტის მიზნობრივი სამეცნიერო-კვლევითი პროექტების შესარჩევი კონკურსი დასრულდა. კონკურსში გამარჯვება ჩვიდმეტმა სამეცნიერო პროექტმა მოიპოვა. ბსუ-ს დაფინანსებით, 2023 წელს უმაღლესი საგანმანათლებლო დაწესებულების აკადემიური პერსონალი და ახალგაზრდა მკვლევრები სამეცნიერო პროექტებს განახორციელებენ საბუნებისმეტყველო მეცნიერებების, მათემატიკის, კომპიუტერული მეცნიერებების, ინჟინერიის, ტექნოლოგიების, აგრარული მეცნიერებების, ეკონომიკისა და ბიზნესის, ჰუმანიტარული მეცნიერებებისა და სოციალური მეცნიერებების მიმართულებით.

ბათუმის შოთა რუსთაველის სახელმწიფო უნივერსიტეტში დიპლომირებული მედიკოსის ინგლისურენოვანი ერთსაფეხურიანი საგანმანათლებლო პროგრამის პირველკურსელი უცხოელი სტუდენტების საზეიმო მიღება გაიმართა. სტუდენტებს სწავლის დაწყება მიულოცეს, სამახსოვრო საჩუქრები გადასცეს და წარმატებები უსურვეს საბუნებისმეტყველო მეცნიერებათა და ჯანდაცვის ფაკულტეტის დეკანმა რუსუდან ხუხუნაიშვილმა, ბსუ-ს ადმინისტრაციის ხელმძღვანელმა მერაბ დიასამიძემ, რექტორის მოადგილემ ანზორ ბერიძემ, პროგრამის ხელმძღვანელმა სოფო ბერიძემ და პროფესორ-მასწავლებლებმა.

ბათუმის შოთა რუსთველის სახელმწიფო უნივერსიტეტის პროფესორებმა და მკვლევრებმა შოთა რუსთაველის საქართველოს ეროვნული სამეცნიერო ფონდის 2022 წლის ფუნდამენტური კვლევების სახელმწიფო სამეცნიერო საგრანტო კონკურსში გაიმარჯვეს. სამეცნიერო პროექტებს სხვადასხვა მიმართულებით განახორციელებენ პროფესორები: მერაბ ხალვაში, ლელა თავდგირიძე, ასოცირებული პროფესორები: ნუგზარ ზოსიძე, ირაკლი ბარამიძე, მაია ვანიძე, ასისტენტ პროფესორი გიორგი ქათამაძე; აგრარული და მემბრანული ტექნოლიგიების ინსტიტუტის მთავარი მეცნიერ-თანამშრომელი ნინო მხეიძე და ფიტოპათოლოგიისა და ბიომრავალფეროვნების ინსტიტუტის უფროსი მეცნიერ-თანამშრომელი მზიური გაბაიძე.