ბათუმის შოთა რუსთაველის სახელმწიფო უნივერსიტეტში საქართველოს მათემატიკოსთა კავშირის XII საერთაშორისო კონფერენცია იმართება. ერთი კვირის განმავლობაში 215 ქართველი და უცხოელი მათემატიკოსი სამეცნიერო მოხსენებებს წარმოადგენს ბოლო პერიოდში წარმოებული სამეცნიერო კვლევების შესახებ. კონფერენციის ფარგლებში, ასევე, გაიმართება ორი მინისიმპოზიუმი: ტოპოლოგია საქართველოში და ალგებრული გეომეტრია, ჯგუფების გეომეტრიული და ჰომოლოგიური ალგებრა.
ბსუ-ს იურიდიული და სოციალურ მეცნიერებათა ფაკულტეტისა და ორგანიზაციის „სამოქალაქო საბჭო თავდაცვის და უსაფრთხოების საკითხებში“ ორგანიზებით მეშვიდე საზაფხულო უნივერსიტეტი „ბირთვული უსაფრთხოება და გაუვრცელებლობა“ გაიხსნა თემაზე: „რუსეთის შეჭრა უკრაინაში, ახალი გამოწვევები და რისკები ბირთვული უსაფრთხოებისა და გაუვრცელებლობის რეჟიმისათვის“. საზაფხულო უნივერსიტეტი გახსნეს ბსუ-ს რექტორის მოადგილემ თამარ სირაძემ, ნიდერლანდების სამეფოს ელჩმა საქართველოში მააიკე ვან კოლდამმა და თავდაცვისა და უსაფრთხოების სამოქალაქო საბჭოს დამფუძნებელმა შორენა ლორთქიფანიძემ.
„ერაზმუს+“-ის ადმინისტრაციული პერსონალის გაცვლითი პროგრამის ფარგლებში, ბათუმის შოთა რუსთაველის სახელმწიფო უნივერსიტეტს ვაუჩის (პოლონეთი) გამოყენებითი მეცნიერების უნივერსიტეტის რექტორი, პროფესორი დარიუშ სკალსკი და პროფესორი პიოტრ გოდლევსკი ეწვივნენ. ბსუ-ს რექტორთან, პროფესორ მერაბ ხალვაშთან გამართულ შეხვედრაზე სტუმრებმა სამომავლო თანამშრომლობის მიმართულებებსა და ერთობლივი საგანმანათლებლო-სამეცნიერო პროექტების განხორციელების მნიშვნელობაზე ისაუბრეს. ვიზიტის ფარგლებში დაიგეგმა სამეცნიერო კონფერენციების, ტრენინგებისა და სემინარების ჩატარება.
დღეს, 2008 წლის რუსეთ-საქართველოს ომში დაღუპული გმირის, ბათუმის შოთა რუსთაველის სახელმწიფო უნივერსიტეტის სტუდენტის, ვახტანგ გორგასლის I ხარისხის ორდენოსან ამირან მამალაძის საფლავი ბსუ-ს სტუდენტებმა და ადმინისტრაციის წარმომადგენლებმა გვირგვინით შეამკეს. უნივერსიტეტელებმა კიდევ ერთხელ პატივი მიაგეს საქართველოს ტერიტორიული მთლიანობისათვის დაღუპული მებრძოლის ხსოვნას და მის ღვაწლზე ისაუბრეს. ომში დაღუპული გმირის უკვდავსაყოფად ბათუმის შოთა რუსთაველის სახელმწიფო უნივერსიტეტში დაწესებულია სტუდენტ ამირან მამალაძის სახელობის სტიპენდია და ასევე მცირე სპორტულ დარბაზს მინიჭებული აქვს მისივე სახელი.
ბათუმის შოთა რუსთაველის სახელმწიფო უნივერსიტეტში ბათუმში მცხოვრები ომით დაზარალებული უკრაინელებისთვის ქართული ენის სწავლება დაიწყო. მსმენელებს მიესალმნენ ბათუმის დემოკრატიული ჩართულობის ცენტრის წარმომადგენელი — თეონა დიასამიძე, ენის ამერიკული ცენტრის ხელმძღვანელი, ფილოლოგიის დოქტორი ნათია ფუტკარაძე და ბსუ ჰუმანიტარულ მეცნიერებათა ფაკულტეტის დეკანი, პროფესორი მარინე გიორგაძე. ღონისძიების მონაწილეებმა წუთიერი დუმილით პატივი მიაგეს რუსეთის აგრესიის წინააღმდეგ ომში დაღუპული ქართველი და უკრაინელი მებრძოლების ხსოვნას. პროგრამა 4 თვის განმავლობაში გაგრძელდება და მას პროფესორი მაია კიკვაძე წარუძღვება.
