ბათუმის შოთა რუსთაველის სახელმწიფო უნივერსიტეტში კურსდამთავრებულთა გამოშვების 85-ე საიუბილეო საზეიმო ღონისძიება გაიმართა. მანტიებში გამოწყობილ კურსდამთავრებულებს უნივერსიტეტის რექტორმა, პროფესორმა მერაბ ხალვაშმა, რექტორის მოადგილეებმა, ხარისხის უზრუნველყოფის სამსახურის უფროსმა, საკანონმდებლო და აღმასრულებელი ხელისუფლების წარმომადგენლებმა სწავლის დასრულება მიულოცეს, წარმატებები უსურვეს და სერტიფიკატები გადასცეს.
ბათუმის შოთა რუსთაველის სახელმწიფო უნივერსიტეტს საქართველოში ნატოს სამეკავშირეო ოფისის ხელმძღვანელი ალექსანდრე ვინიკოვი ეწვია. ბსუ-ს რექტორთან, პროფესორ მერაბ ხალვაშთან და სტუდენტებთან გამართულ შეხვედრაზე ალექსანდრე ვინიკოვმა ნატო-საქართველოს თანამშრომლობის გაღრმავების პერსპექტივები განიხილა. ვიზიტი მიზნად ისახავდა პოლიტიკურ-სამოქალაქო მხარდაჭერის გამოხატვას ევროპული და ევროატლანტიკური ინტეგრაციის გზაზე. ღონისძიება საქართველოს საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრის ორგანიზებით გაიმართა.
დასრულდა ერთობლივი საერთაშორისო სეზონური სკოლა ლინგვოპოლიტოლოგიაში თემაზე: „პოლიტიკური მეტყველების კულტურა საჯარო გამოსვლებსა და დებატებში“. საქართველოს სხვადასხვა უმაღლესი საგანმანათლებლო დაწესებულების 18 სტუდენტს ექვსი დღის განმავლობაში ლექციები და სემინარები ჩაუტარდა პოლიტიკური დისკურსის კულტურაზე, „სიძულვილის ენასა“ და მასობრივ ცნობიერებაზე ასახული პოლიტიკური პოლარიზმის უარყოფითი ზეგავლენის აქტუალურ საკითხებზე. ღონისძიების მონაწილეებს გადაეცათ სერტიფიკატები. ბათუმის შოთა რუსთაველის სახელმწიფო უნივერსიტეტის ჰუმაიტარულ მეცნიერებათა ფაკულტეტისა და დიგიტალური ჰუმანიტარიის აკადემიის ერთობლივი საერთაშორისო სეზონური სკოლა აჭარის ა.რ. განათლების, კულტურისა და სპორტის სამინისტროს დაფინანსებით ჩატარდა.
18-19 ივლისს ქუთაისში, აკაკი წერეთლის სახელმწიფო უნივერსიტეტში, „ERASMUS+“- ის ინსტიტუციური განვითარების პროექტის „უნივერსიტეტების როლი რეგიონის განვითარებაში - RURD-ის (Role of Universities in the Regional Development) - შემაჯამებელი შეხვედრები გაიმართა. ბათუმის შოთა რუსთაველის სახელმწიფო უნივერსიტეტიდან პროექტის შემაჯამებელ შეხვედრებს ესწრებოდნენ: ბსუ-ს რექტორი, პროფესორი მერაბ ხალვაში, ჰუმანიტარულ მეცნიერებათა ფაკულტეტის დეკანი, პროფესორი მარინა გიორგაძე და სტუდენტთა კარიერული განვითარების, კულტურისა და სპორტის დეპარტამენტის უფროსი ლევან ტარიელაძე.
ბათუმის შოთა რუსთაველის სახელმწიფო უნივერსიტეტს ფრანგული უმაღლესი პოლიტიკური სწავლების სკოლის დირექტორი როსტან მედი ეწვია. ბსუ-ს რექტორთან, პროფესორ მერაბ ხალვაშთან გამართულ გაცნობითი ხასიათის შეხვედრაზე სტუმარმა სამომავლო თანამშრომლობის მიმართულებებზე ისაუბრა. ფრანგული უმაღლესი პოლიტიკური სწავლების სკოლა სპეციალიზებულია საჯარო სამართალში, საერთაშორისო ურთიერთობებსა და პოლიტიკის მეცნიერებებში, მათ შორისაა მედია და კომუნიკაცია. შეხვედრაზე დაიგეგმა სტუდენტებისა და პროფესორ-მასწავლებლების გაცვლითი პროგრამების განხორციელება და უმაღლეს საგანმანათლებლო დაწესებულებებს შორის მემორანდუმის გაფორმება.
