ახალი ამბები

16-18 მაისს, ბათუმის შოთა რუსთაველის სახელმწიფო უნივერსიტეტი „ერაზმუს+“-ის მიერ დაფინანსებული ინსტიტუციური შესაძლებლობების განვითარების პროექტის „მესამე მისიის ხარისხისა და შესაბამისობის განვითარება ქართულ უნივერსიტეტებში - SQUARE“ კონსორციუმის წევრებს მასპინძლობს, ტრენინგის „T2.2 სტრატეგიული დაგეგმარება“ ფარგლებში, რომელიც ტარდება ფინელი და პორტუგალიელი ექსპერტების მიერ. ტრენინგი ბსუ-ს რექტორმა, პროფესორმა მერაბ ხალვაშმა და თსუ-ს ხარისხის უზრუნველყოფის სამსახურის უფროსმა, პროექტის კოორდინატორმა ირმა გრძელიძემ გახსნეს.

ბათუმის შოთა რუსთაველის სახელმწიფო უნივერსიტეტის რექტორი პროფესორი მერაბ ხალვაში, ტურიზმის ფაკულტეტის დეკანი ირაკლი კორძაია და ჰუმანიტარულ მეცნიერებათა ფაკულტეტის ასოცირებული პროფესორი ემზარ კახიძე არდაჰანის უნივერსიტეტში იმყოფებოდნენ. ვიზიტის ფარგლებში შეხვედრა გაიმართა არდაჰანის უნივერსიტეტის რექტორთან მეჰმედ ბიბერთან, ვიცე-კანცლერთან მუსტაფა ილდიზთან, ფაკულტეტების დეკანებთან და ადმინისტრაციის წარმომადგენლებთან. შეხვედრაზე რექტორმა მერაბ ხალვაშმა ორ ქვეყანაში არსებულ სამეცნიერო და კულტურულ ურთიერთობებზე ისაუბრა და ერთობლივი კვლევების მნიშვნელობაზე გაამახვილა ყურადღება.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტი ტურიზმისა და სასტუმრო აღჭურვილობის მე-13 საერთაშორისო ტურისტულ გამოფენაში „EXPO BATUMI TRAVEL - 2022“ ღებულობს მონაწილეობას. ფაკულტეტის სტუდენტებმა და პროფესორ-მასწავლებლებმა დამთვალიერებლებს უნივერსიტეტის სასწავლო-საგანმანათლებლო პროგრამები, სტუდენტური ცხოვრება გააცნეს და ტურისტული პროდუქტები წარუდგინეს. გამოფენა სამ დღეს გაგრძელდება და მასში 80-მდე ადგილობრივი და საერთაშორისო ტურისტული კომპანია მიიღებს მონაწილეობას.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა 2019 წლის სტუდენტური სამეცნიერო კონფერენციის გამარჯვებულ სტუდენტებს სტუდენტთა სამეცნიერო შრომების კრებული გადასცა. კრებული მრავალდარგობრივია და მასში ეკონომიკის, სამართალმცოდნეობის, პოლიტიკურ და სოციალურ მეცნიერებათა, საბუნებისმეტყველო, მედიცინის, გეოგრაფიის, აგრარულ, ზუსტ მეცნიერებათა, ასევე ისტორიის, აღმოსავლეთმცოდნეობის, ეთნოგრაფიის, არქეოლოგიის, ლიტერატურათმცოდნეობის, ფოლკლორის, ენათმეცნიერების მიმართულებით შექმნილი სამეცნიერო შრომებია წარმოდგენილი.

ბათუმის შოთა რუსთაველის სახელმწიფო უნივერსიტეტში გაიმართა საინფორმაციო შეხვედრა „საქართველოს მკვლევართა მობილობის პროგრამის“ შესახებ. ევროკავშირის პროგრამის ჯგუფის ხელმძღვანელმა პიტერ დებრეცენმა და ჯგუფის ხელმძღვანელის მოადგილემ ნინო გაჩეჩილაძემ ბსუ-ს პროფესორ-მასწავლებლებს და მკვლევრებს საგრანტო კონკურსში მონაწილეობის პირობები გააცნო. „საქართველოს მკვლევართა მხარდაჭერის პროგრამას“ ევროკავშირის ფინანსური მხარდაჭერით ახორციელებს გერმანიის აკადემიური გაცვლის სამსახური (DAAD). პროექტი მიზნად ისახავს საქართველოს მეცნიერების, ტექნოლოგიებისა და ინოვაციების სექტორის ინტერნაციონალიზაციის ხელშეწყობას საერთაშორისო კავშირების დამყარების პროცესში საქართველოს მკვლევართა მხარდაჭერის გზით. პროექტი ითვალისწინებს მკვლევართა და ინოვატორთა კვლევითი ვიზიტის დაფინანსებას ევროკავშირის წევრ ქვეყნებში.