ახალი ამბები

ბსუ-ს ტურიზმის ფაკულტეტის 70-მდე სტუდენტი სასწავლო პრაქტიკით გერმანიაში მიემგზავრება. სტუდენტებს პროექტში გამარჯვება მიულოცეს და წარმატებები უსურვეს ბსუ-ს რექტორმა მერაბ ხალვაშმა, აჭარის ა.რ. მთავრობის თავმჯდომარემ თორნიკე რიჟვაძემ და აჭარის ა.რ. განათლების კულტურისა და სპორტის მინისტრმა მაია ხაჯიშვილმა. სტუდენტები 3 თვის განმავლობაში პრაქტიკას გერმანიის მაღალი კლასის სასტუმროებში გაივლიან და გაეცნობიან სასტუმროს ყველა ძირითადი სტრუქტურული ერთეულის ფუნქციონირებას.

ბათუმის შოთა რუსთაველის სახელმწიფო უნივერსიტეტში სტუდენტთა საუნივერსიტეტო სამეცნიერო კონფერენცია - 2022 ჩატარდა. 19 სექციაში 200-მდე სტუდენტმა 160 სამეცნიერო მოხსენება წარმოადგინა. ახალგაზრდა მკვლევართა ნაშრომებს ბსუ-ს პროფესორ-მასწავლებლები შეაფასებენ და სექციის საპრიზო ადგილზე გასული მოხსენებების ავტორებს ფულად ჯილდოს გადასცემენ. კონფერენციის ფარგლებში გამოიცემა კრებული, რომელშიც თითოეული სექციის სამი საუკეთესო სამეცნიერო მოხსენება დაიბეჭდება. სამეცნიერო სესია ბსუ-ს სტუდენტთა კარიერული განვითარების, კულტურისა და სპორტის დეპარტამენტის, სტუდენტთა სამეცნიერო საზოგადოება - ბსუ-ს, ფაკულტეტებისა და სამეცნიერო კვლევების სამსახურის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტში კონკურსი „ჩემი თემა 180 წამში“ გაიმართა. საქართველოს უმაღლესი საგანმანათლებლო დაწესებულებების ფრანგულენოვანმა დოქტორანტებმა აუდიტორიას სამ წუთში წარუდგინეს მკაფიო, ლაკონური და დამაჯერებელი პრეზენტაცია თავისი საკვლევი თემის შესახებ. ჟიურის გადაწყვეტილებით, საუკეთესოდ თსუ-ს დოქტორანტ ნათია ფაილოძის პრეზენტაცია დასახელდა, მეორე ადგილი თსუ-ს დოქტორანტ ქეთევან კუსიკაშვილს ერგო და მესამე ადგილი - ბსუ-ს დოქტორანტ ანა კალანდიას.

ფრანგულ-ქართული ინსტიტუტის ხელმძღვანელი დავიდ ტერტრი და ფრანკოფონიის საუნივერსიტეტო სააგენტოს AUF-ის ხელმძღვანელი მუჰამედ კეტატა ბათუმის შოთა რუსთაველის სახელმწიფო უნივერსიტეტს ეწვივნენ. რექტორთან, პროფესორ მერაბ ხალვაშთან გამართულ სამუშაო შეხვედრაზე დავიდ ტერტრმა ტურიზმის ერთობლივი სამაგისტრო საგანმანათლებლო პროგრამის შემუშავებისა და განხორციელების დეტალებზე ისაუბრა. ვიზიტის ფარგლებში ასევე წარმოდგენილი იყო ვანდეს კათოლიკური ინსტიტუტის ინიციატივა, რომელიც ითვალისწინებს ბსუ-ს სტუდენტებისა და აკადემიური პერსონალის მონაწილეობას გაცვლით პროგრამებში, ერთობლივ კვლევით პროექტებსა და საზაფხულო სკოლებში.

ბათუმის შოთა რუსთაველის სახელმწიფო უნივერსიტეტში საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის საზაფხულო დიპლომატიური სკოლა „საქართველოს საგარეო პოლიტიკა და მისი პრიორიტეტები“ გაიხსნა. დიპლომატიური ინსტიტუტის მკვლევრები 28 ივნისიდან 1-ლი ივლისის ჩათვლით ლექციებს წაიკითხავენ საქართველოს საგარეო პოლიტიკის სტრატეგიულ მიმართულებებზე. ლექციათა ციკლი მიზნად ისახავს საერთაშორისო ურთიერთობების, საგარეო პოლიტიკის და მომიჯნავე საკითხებზე მომუშავე სამიზნე ჯგუფების საინფორმაციო, ანალიტიკური და კვლევითი პროდუქტით უზრუნველყოფას.