ახალი ამბები

პროგრამული აკრედიტაცია წარმატებით გაიარა ბათუმის შოთა რუსთაველის სახელმწიფო უნივერსიტეტისა და ივანე ჯავახიშვილის სახელობის თბილისის სახელმწიფო უნივერსიტეტის ერთობლივმა სამაგისტრო საგანმანათლებლო პროგრამამ „ციფრული მედია და ინოვაციები”. პროგრამამ აკრედიტაციის სტანდარტები დააკმაყოფილა და უმაღლესი საგანმანათლებლო პროგრამების აკრედიტაციის საბჭოს გადაწყვეტილებით სრული 4-წლიანი აკრედიტაცია მოიპოვა.

გაეროს ბავშვთა ფონდისა და ნორვეგიის მთავრობის ხელშეწყობით მიმდინარე პროექტის „უნივერსიტეტის შესაძლებლობების გაძლიერება ინკლუზიური სკოლამდელი და ზოგადი განათლების მხარდასაჭერად“ ფარგლებში, ბათუმის შოთა რუსთაველის სახელმწიფო უნივერსიტეტის აკადემიური პერსონალი მონაწილეობს ტრენინგების ციკლში ინკლუზიური და ხარისხიანი განათლების მიმართულებით. პირველ ეტაპზე დაიგეგმა და განხორციელდა ტრენინგები სწავლების უნივერსალურ დიზაინთან, დაწევისა და დაჩქარებული სწავლების კურიკულუმისა და ამ კურიკულუმის საფუძველზე მოსწავლის ინდივიდუალური საჭიროებს გათვალისწინებით ინდივიდუალური სასწავლო გეგმის შემუშავებასთან დაკავშირებით.

ბათუმის შოთა რუსთაველის სახელმწიფო უნივერსიტეტმა უკრაინიდან ჩამოსულ ქართული ენის შესწავლის მსურველ მოქალაქეებს და მათ შვილებს უმასპინძლა. საქართველოს განათლებისა და მეცნიერების სამინისტროს სსიპ ზურაბ ჟვანიას სახელობის სახელმწიფო ადმინისტრირების სკოლა, ბათუმის შოთა რუსთაველის სახელობის სახელმწიფო უნივერსიტეტთან თანამშრომლობით, ბათუმში მცხოვრებ უკრაინიდან იძულებით გადაადგილებულ მოქალაქეებს, რომელთაც ქართული ენის შესწავლის სურვილი გამოთქვეს, სპეციალურ მათზე მორგებულ სასწავლო პროგრამას სთავაზობს.

ქართული ენის დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. გაიმართა სახელმწიფო ენის დეპარტამენტის მიერ შემუშავებული დოკუმენტების - „2021 – 2030 წლების სახელმწიფო ენის ერთიანი პროგრამა (სტრატეგია)“ და „2021-2022 წლების სამოქმედო გეგმის“ განხილვა. ჰუმანიტარულ მეცნიერებათა ფაკულტეტის ასოცირებულმა პროფესორმა ნანა ცეცხლაძემ და პროფესორმა მაია კიკვაძემ სტუდენტებს სახელმწიფო ენის სტრატეგია და განვითარების პოლიტიკის დოკუმენტი გააცნეს. დისკუსიაში ონლაინ რეჟიმში მონაწილეობა მიიღეს სახელმწიფო ენის დეპარტამენტის სამეცნიერო-საგანმანათლებლო პროგრამების სამსახურის უფროსმა თინათინ ბოლქვაძემ და სახელმწიფო ენის ფუნქციონირების ზედამხედველობის სამსახურის უფროსმა მარინე ბერიძემ.

ბათუმის შოთა რუსთაველის სახელმწიფო უნივერსიტეტში ჩატარდა საჯარო ლექცია და დისკუსია თემაზე: „ევროკავშირის ძირითადი ღირებულებები და გაწევრიანების პროცედურა“. ღონისძიება გახსნა ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა. შეხვედრა ორგანიზებული იყო ბსუ-ს ჟან მონეს კათედრის მიერ ინგლისური ენის სასწავლო ცენტრ Eti Holding-თან თანამშრომლობით საჯარო სკოლის მოსწავლეებისთვის. ღონისძიებაში მონაწილეობა მიიღეს საჯარო სკოლის 40-მდე მოსწავლემ და მასწავლებლებმა. ჟან მონეს კათედრის ხელმძღვანელმა, პროფესორმა მალხაზ ნაკაშიძემ ისაუბრა ევროკავშირის ძირითადი ღირებულებების, ასევე ევროკავშირში გაწევრიანების პროცედურის შესახებ.