ფულბრაიტის გაცლითი პროგრამის წარმომადგენელმა ფილიპ პურიფოიმ ბათუმის შოთა რუსთველის სახელმწიფო უნივერსიტეტში საჯარო ლექცია წაიკითხა თემაზე: „ადრეული ამერიკა: ამერიკის შეერთებული შტატების კონსტიტუციის ისტორიული კონტექსტი“. მომხსენებლი სტუდენტებს ესაუბრა ამერიკულ რევოლუციაზე, კონსტიტუციის შექმნასა და ადამიანის უფლებებზე. ლექციის დასრულების შემდეგ, შეხვედრა კითხვა-პასუხის რეჟიში წარიმართა და ფილიპ პურიფოიმ სტუდენტების აქტუალურ შეკითხვებს უპასუხა. ფილიპ პურიფოი სტაჟირებას გადის ბსუ-ს საერთაშორისო განათლების ცენტრში. საჯარო ლექცია ბსუ-ს სტრატეგიული განვითარებისა და საგარეო ურთიერთობათა დეპარტამენტის ორგანიზებით გაიმართა.

15-20 მაისს ბსუ-ს ეკონომიკისა და ბიზნესის ფაკულტეტის ეკონომიკის დარგობრივი დეპარტამენტის ასისტენტი ნინო კონცელიძე „ერაზმუს+“-ის გაცვლითი პროგრამის ფარგლებში, იმყოფებოდა ბულგარეთში, ქალაქ სვიშტოვის დ. ცენოვის სახელობის ეკონომიკის აკადემიაში. ვიზიტის ფარგლებში ნინო კონცელიძემ აკადემიის ეკონომიკის ფაკულტეტის სტუდენტებს ჩაუტარა ლექციები შემდეგ თემატიკაზე: „განათლების გავლენა ეკონომიკურ ზრდაზე, ონლაინ განათლების ნაკლოვანებები და უპირატესობები“, „DCFTA და მისი გავლენა საქართველოს ინოვაციურ ეკონომიკაზე“, და „საქართველოს საგარეო ვაჭრობის დინამიკა და DCFTA“. მასპინძელი უნივერსიტეტის აკადემიურ და ადმინისტრაციულ პირებთან დაიგეგმა სამომავლო თანამშრომლობის პერსპექტივები.

ბსუ-ში „ერაზმუს+“-ის აკადემიური და ადმინისტრაციული პერსონალის გაცვლითი პროგრამის IV საერთაშორისო კვირეული დასრულდა. ლიეტუვას, ლატვიის, პოლონეთისა და პორტუგალიის უნივერსიტეტების პროფესორმებმა ბსუ-ს სტუდენტებს ლექციები წაუკითხეს მეცნიერების სხვადასხვა მიმართულების აქტუალურ საკითხებზე, ხოლო ადმინისტრაციის წარმომადგენლებმა საინფორმაციო შეხვედრები ჩაატარეს გაცვლითი პროგრამების ეფექტურად მართვის საკითხებზე. ბსუ-ს რექტორმა მერაბ ხალვაშმა კვირეულში მონაწილე უნივერსიტეტების აკადემიურ და ადმინისტრაციულ პერსონალს მადლობა გადაუხადა აქტიური თანამშრომლობისათვის და სერტიფიკატები გადასცა.

ბსუ-ში „ერაზმუს+“-ის IV საერთაშორისო კვირეული გრძელდება. სტრატეგიული განვითარებისა და საგარეო ურთიერთობათა დეპარტამენტის წარმომადგენლებმა კვირეულის მონაწილეებს ბსუ-ს მატერიალურ-ტექნიკური ბაზა და ლაბორატორიები დაათვალიერებინეს, საგანმანათლებლო პროგრამები გააცნეს და ქართული კულტურისა და ენის შემეცნებით-გასართობი პრეზენტაცია წარუდგინეს. უცხოელმა პროფესორებმა ჰუმანიტარულ მეცნიერებათა, საბუნებისმეტყველო მეცნიერებათა და ჯანდაცვის, ეკონომიკისა და ბიზნესის ფაკულტეტების სტუდენტებისათვის ლექციები წაიკითხეს, ხოლო ადმინისტრაციულმა პერსონალმა პრეზენტაციები გამართა თავიანთი უნივერსიტეტებისა და ქვეყნების შესახებ.

ბათუმის შოთა რუსთაველის სახელმწიფო უნივერსიტეტში „ერაზმუს+“-ის IV საერთაშორისო კვირეული გაიხსნა. კვირეული „ერაზმუს+“-ის აკადემიური და ადმინისტრაციული პერსონალის გაცვლითი პროგრამის ფარგლებში ტარდება და მიზნად ისახავს უნივერსიტეტის ინტერნაციონალიზაციის ხელშეწყობას, ბსუ-ს პოპულარიზაციას, ერთობლივი საერთაშორისო პროგრამებისა და პროექტების დაგეგმვას და თანამშრომლობის გაღრმავებას. 5 დღის განმავლობაში 5 ევროპული უნივერსიტეტის 8 პროფესორი ბსუ-ს სტუდენტებს ლექციებს წაუკითხავს, ხოლო უცხოელი პარტნიორი საერთაშორისო ოფისების წარმომადგენლები ტრენინგებს ჩაატარებენ გაცვლითი პროგრამების ეფექტურად მართვის საკითხებზე.

8-12 მაისს „ერაზმუს+“-ის PEERS-ის გაცვლითი პროგრამის აკადემიური მობილობის ფარგლებში, ბათუმის შოთა რუსთაველის სახელმწიფო უნივერსიტეტის ასოცირებული პროფესორი ჟუჟუნა გუმბარიძე იმყოფებოდა ავეიროს უნივერსიტეტში (პორტუგალია). ჟუჟუნა გუმბარიძემ ჩაატარა ლექციები ჰუმანიტარული მეცნიერებების თარგმანცმოდნეობის საბაკალავრო საგანმანათლებლო პროგრამის პირველი, მეორე და მესამე კურსის სტუდენტებისათვის თემებზე: „ქართული სინამდვილე პოსტკოლონიურ პერიოდში", „თარგმანში დაკარგული ეროვნულ-კულტურული იდენტობა", „საბჭოთა რეპრესიები და ჯინსების თაობა" და „კაცია ადამიანი?" - მარადიული პრობლემა ადამიანის ცხოვრების არსისა".

17-21 აპრილს „ერაზმუს+“-ის PEERS-ს პროექტის გაცვლითი პროგრამის ფარგლებში, ბათუმის შოთა რუსთველის სახელმწიფო უნივერსიტეტის ასოცირებული პროფესორი ქეთევან სვანიძე აკადემიური მობილობით მინიოს უნივერსიტეტში (პორტუგალია) იმყოფებოდა. ქეთევან სვანიძემ მინიოს უნივერსიტეტის სტუდენტებისათვის ჩაატარა ლექციები სასწავლო კურსებში „კულტურათაშორისი კომუნიკაცია“ და „ლინგვოკულტუროლოგია“.

ბათუმის შოთა რუსთაველის სახელმწიფო უნივერსიტეტს შანონის ტექნოლოგიური უნივერსიტეტის (ირლანდია) „ერაზმუს+“-ის კოორდინატორი, კვლევის, განვითარებისა და ინოვაციების პროექტის ოფისის თანამშრომელი, ბიბლიოთეკარი, პადრაიგ კირბი ეწვია. პადრაიგი კირბი ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსს, პროფესორ მარინე გიორგაძეს და დეპარტამენტის უფროსის მოადგილეს, ბსუ-ს „ერაზმუს+“-ის კოორდინატორს, ნანა ყურშუბაძეს შეხვდა. შეხვედრაზე ერთობლივი საგანმანათლებლო პროექტების განხორციელებასა და სამომავლო თანამშრომლობის გეგმებზე ისაუბრეს. დაიგეგმა მემორანდუმის ხელმოწერა შანონის ტექნოლოგიურ უნივერსიტეტთან.