ბათუმის შოთა რუსთაველის სახელმწიფო უნივერსიტეტი „სტუდენტური დღეები - 2018“-ის გრან-პრის მფლობელია. შეჯიბრში აჭარის უმაღლესი საგანმანათლებლო დაწესებულებები მონაწილეობდნენ. გუნდებმა მაყურებელს მუსიკალური ნომერი, ორიგინალური ნომერი, ვიდეორგოლი „წარმოაჩინე შენი უნივერსიტეტი“ დასილამაზის კონკურსი „მის უნივერსიტეტი“ წარუდგინეს. სტუდენტური დღეების ფარგლებში, უნივერსიტეტებს შორის პირველობა გაიმართა სპორტის ხუთ სახეობაში, რომელთაგან ოთხი ბსუ-ს გამარჯვებით დასრულდა. ახალგაზრდებმა წარმატებას ქუჩის კალათბურთში, მაგიდის ჩოგბურთში, ფრენბურთში, ფუტსალსა და ინტელექტუალურ თამაშში „რა? სად? როდის?“ მიაღწიეს, წარადგინეს საუკეთესო ვიდეორგოლი, ხოლო „მის სტუდენტი“ ელიზავეტა კრასენკო გახდა.

„სტუდენტური დღეები - 2018“ ბათუმის შოთა რუსთაველის სახელმწიფო უნივერსიტეტის წარმატებით დაიწყო. ბსუ-ს სტუდენტებმა სპორტის სამ სახეობასა და ინტელექტუალურ შეჯიბრში გაიმარჯვეს. ფინალურ შეხვედრებში ქუჩის კალათბურთში, მაგიდის ჩოგბურთსა და ინტელექტუალურ თამაშში „რა? სად? როდის?“ უნივერსიტეტმა ბათუმის საზღვაო აკადემიას სძლია, ხოლო ფრენბურთში - გრიგოლ რობაქიძის უნივერსიტეტს. ვულოცავთ სტუდენტებს წარმატებულ სტარტს და ვუსურვებთ წარმატებებს სხვა ნომინაციებში.

ბათუმის შოთა რუსთაველის სახელმწიფო უნივერსიტეტის სტუდენტური თეატრის სპექტაკლ „ოსკარის“ პრემიერა შედგა. კომედიური ჟანრის სპექტაკლი ფრანსის ვებერის პიესის მიხედვით რეჟისორმა როინ დვალმა დადგა და მასში სხვადასხვა სპეციალობის სტუდენტები: ლევან გორგილაძე, მარიამ კეჭაყმაძე, მთვარისა რომანაძე, ელენე იმნაიშვილი, ორნიკე დუმბაძე, ანა ჯაფარიძე, ანა დუმბაძე, მარიამ კაკაბაძე, ჯაბა მორჩილაძე, რატი კეკელიძე მონაწილეობდნენ. სპექტაკლი სტუდენტთა კარიერული განვითარების, კულტურისა და სპორტის დეპარტამენტის კულტურისა და სპორტის განყოფილების ორგანიზებით დაიდგა და საქართველოს დამოუკიდებლობის აღდგენის 100 წლის იუბილეს მიეძღვნა.

ბათუმის შოთა რუსთაველის სახელმწიფო უნივერსიტეტში „სამოქალაქო აქტივიზმის კვლევების ცენტრის“ ორგანიზებით წიგნის - „რეგიონის ცხოვრება 1918-1921“ წარდგენა გაიმართა. ახალგაზრდა მკვლევარების კრებულში აღწერილია დამოუკიდებელი საქართველოს რეგიონებში მიმდინარე პოლიტიკურ პროცესები, აღწერითი მასალა, იმდროინდელ პრესაში გაშუქებულ რეგიონულ ფაქტები და მოვლენები. წიგნი პროექტის "ადგილობრივი დემოკრატია საქართველოში − 1918-1921 წლების გამოცდილება“ ფარგლებში მომზადდა და მიზნად ისახავდა პირველი რესპუბლიკის პერიოდში საქართველოს რეგიონებში მიმდინარე მოვლენების შესწავლასა და ანალიზს. წარდგინების დასასრულს სტუდენტებს წიგნები გადაეცათ.

10 თებერვალს, სასტუმრო „ლეოგრანდში“ მომხდარი ტრაგედიის დროს დაღუპულთა ხსოვნისადმი მიძღვნილი სპორტულ-კულტურული ღონისძიების ფარგლებში გამართულ მკლავჭიდის ტურნირში ბსუ-ს ნაკრებმა საპრიზო ადგილები მოიპოვა. ბსუ-ს მკლავჭიდელებს თასები, მედლები და მადლობის სიგელები გადაეცათ. სპორტულ-კულტურული ღონისძიების ინიციატივა საქართველოს პარლამენტის წევრსა და სპორტსმენს მუხრან ვახტანგაძეს ეკუთვნის. აღნიშნულ დღესთან დაკავშირებით ღონისძიებები ყოველწლიურად გაიმართება.