11-15 ივლისს ბსუ-ს ჰუმანიტარულ მეცნიერებათა ფაკულტეტის ხარისხის უზრუნველყოფის სამსახურის უფროსმა, ასოცირებულმა პროფესორმა, ივდით დიასამიძემ ევროკავშირის საერთაშორისო გაცვლითი პროექტის „ერაზმუს+“-ის ფარგლებში, მონაწილეობა მიიღო ხარისხზე ორიენტირებულ სასწავლო კურსების განვითარებისადმი მიძღვნილ ტრენინგში. ზაარლანდის უნივერსიტეტში (ქალაქი ზაარბრიუკენი, გერმანია) გამართული ტრენინგი ითვალისწინებდა ისეთ თემებზე მუშაობას, როგორიცაა: შედეგზე ორიენტირებული კურიკულუმის შექმნა, სწავლის შედეგები და მიზნები, საგანმანათლებლო პროგრამის შექმნა, ახალი სასწავლო პროგრამის ხარისხის შეფასება, საერთაშორისო ხარისხის მენეჯმენტი.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ჯანდაცვის მიმართულების პროფესორ-მასწავლებლებისთვის ტრენინგი ჩატარდა თემაზე „360ᵒ შეფასების მეთოდი“. ტრენინგი მიზნად ისახავდა მედიცინის პროგრამაში თანამედროვე მეთოდების დანერგვასა და გამოყენების ხელშეწყობას. ტრენინგს უძღვებოდნენ დარგის ექსპერტები და ქუთაისის აკაკი წერეთლის სახელმწიფო უნივერსიტეტის სამედიცნო ფაკულტეტის წარმომადგენლები. ტრენინგს ესწრებოდნენ მედიცინის ერთსაფეხურიან საგანმანათლებლო პროგრამაში ჩართული აკადემიური პერსონალი და მოწვეული პირები.

ბსუ-ში სამუშაო ვიზიტით იმყოფებოდნენ „USAID-ის საბაზისო განათლების პროგრამის“ ხელმძღვანელი ნენსი პარქსი და მასწავლებლის მომზადების პროგრამის დირექტორი მანანა რატიანი. შეხვედრაში „USAID-ის საბაზისო განათლების პროგრამის“ ტრენერებთან ერთად, ბსუ-ს ადმინისტრაციის ხელმძღვანელი ნიკა ჩხარტიშვილი, ხარისხის უზრუნველყოფის სამსახურის ხელმძღვანელი ვლადიმერ ღლონტი და საფინანსო-ეკონომიკური დეპარტამენტის უფროსი ეკატერინე შაინიძე მონაწილეობდნენ. პროგრამა რამდენიმე მიმართულებით მუშაობს და მათ შორის ერთ-ერთია ზოგადი განათლების დაწყებითი საფეხურის მასწავლებლის მომზადების ინტეგრირებული საბაკალავრო-სამაგისტრო საგანმანათლებლო პროგრამის განვითარების მხარდაჭერა და აკრედიტაციისთვის მომზადებაში დახმარება.

„Erasmus+”-ის ინსტიტუციური განვითარების პროექტის - „რეგიონული უნივერსიტეტების როლი რეგიონის განვითარებაში” (RURD – role of universities in the regional development), მკვლევარმა, პროფესორმა მარინა გიორგაძემ ბსუ-ს ჰუმანიტარულ მეცნიერებათა ფაკულტეტის აკადემიური პერსონალისთვის ტრენინგი ჩაატარა ტემაზე: „უნივერსიტეტის მისია, სტრატეგიული განვითარების გეგმა და საგანმანათლებლო პროგრამების მიზნები და შედეგები". მონაწილეები გაეცნენ ბსუ-ს მისიას, სტრატეგიული განვითარების გეგმას და მათთან საგანმანათლებლო პროგრამების მიზნებისა და შედეგების შესაბამისობის საკითხებს. პროექტში საქართველოს 11 უნივერსიტეტთან ერთად ჩართულია ევროპის (ლიეტუვა, ესპანეთი, ავსტრია, ჩეხეთი) უნივერსიტეტები. ევროპულ უნივერსიტეტებთან თანამშრომლობის საფუძველზე, პროექტის ფარგლებში, მომზადდა LLL კურსი.

ბათუმის შოთა რუსთაველის სახელმწიფო უნივერსიტეტში მომავალი ICF-ის საქართველოს სერტიფიცირებულმა ქოუჩებმა: გვანცა ბარაბაძემ, მარიკა ხალიანმა, ნინო ეფხოშვილმა, ლალი ბადრიძემ, ეკატერინე ბაბუნაშვილმა, გვანცა ბარაბაძემ, ირმა გურამიშვილმა, ეთერ მაზანაშვილმა ტრენინგი ჩაატარეს თემაზე: „გადაიაზრე მომავალი“. სწავლება ქოუჩინგის საერთაშორისო კვირეულის ფარგლებში გაიმართა და მისი მიზანი იყო ადამიანების, ორგანიზაციების გაძლიერება და ახალი რეალობისთვის საჭირო სტრატეგიული ინსტრუმენტების მიწოდება.