ახალი ამბები

ქართული ფარმაციის დღე და აკადემიკოს იოველ ქუთათელაძის 130 წლის იუბილე ბათუმის შოთა რუსთაველის სახელმწიფო უნივერსიტეტში პსპ-ფარმასთან თანამშრომლობის მემორანდუმის გაფორმებით აღინიშნა. მხარეთა შეთანხმებით, ერთობლივ საგანმანათლებლო-სამეცნიერო პროექტებთან ერთად, პარტნიორ ორგანიზაციაში სასწავლო პრაქტიკისა და სტაჟირების პროგრამა განხორციელდება. ღონისძიების ფარგლებში საბუნებისმეტყველო მეცნიერებათა და ჯანდაცვის ფაკულტეტის ფარმაციის საგანმანათლებლო პროგრამის სტუდენტებს უნივერსიტეტის რექტორი მერაბ ხალვაში, ფაკულტეტის დეკანი მარინა ქორიძე, პსპ-ფარმას ტერენინგცენტრის ხელმძღვანელი ეკა ფრუიძე, პსპ-ფარმას რეგიონალური მენეჯერი ლუიზა საღარეიშვილი და ფარმაციის საგანმანათლებლო პროგრამის ხელმძღვანელი ეთერ ჯაყელი შეხვდნენ და არსებული სიახლეები გააცნეს.

ბათუმის შოთა რუსთაველის სახელმწიფო უნივერსიტეტის ასოცირებული პროფესორი ნანა ტრაპაიძე პრემია „საბას" გამარჯვებულია ნომინაციაში „საუკეთესო ლიტერატურული კრიტიკა“. კომპეტენტური ჟიურის გადაწყვეტილებით, წარდგენილი 300 წიგნიდან ფინალური ეტაპზე 47 წიგნი შეირჩა, რომელთაგან გამარჯვება ნანა ტრაპაიძემ მოიპოვა წიგნისთვის ,„ლიტერატურა და ლიტერატურა“. ყოველწლიური ლიტერატურული პრემია „საბა“ დაფუძნდა 2003 წელს და მისი მიზანია გასული ერთი წლის ლიტერატურული პროცესების შეფასება და წლის საუკეთესო წიგნებთან ერთად ავტორების გამოვლენა. უნივერსიტეტი ულოცავს ნანა ტრაპაიძეს დამსახურებულ გამარჯვებას და წარმატებებს უსურვებს!

პრეზიდენტის ადმინისტრაციის უფროსი გიორგი აბაშიშვილი და საქართველოს ეროვნული უშიშროების საბჭოს მდივანი დავით რაქვიაშვილი და ბათუმის შოთა რუსთაველის სახელმწიფო უნივერსიტეტის რექტორთან მერაბ ხალვაშთან ერთად, სტუდენტთა სამეცნიერო კონფერენციაში გამარჯვებულ სტუდენტებს შეხვდნენ. სტუმრებმა შეხვედრაზე საგარეო და საშინაო პოლიტიკის მიმართულებით საქართველოს წინაშე არსებულ გამოწვევებზე, სახელმწიფო ინსტიტუტების სიძლიერის მნიშვნელობაზე, ქვეყნის უსაფრთხოებაზე, რუსეთ-საქართველოს ურთიერთობებზე, კორუფციის წინააღმდეგ მიმართულ ბრძოლასა და ეკონომიკურ განვითარებაზე ისაუბრეს. ღონისძიების დასასრულს, დისკუსია გაიმართა და შეხვედრის მონაწილეებმა სტუდენტების შეკითხვებს უპასუხეს.

საქართველოს განათლებისა და მეცნიერების სამინისტროს და ბათუმის შოთა რუსთაველის სახელმწიფო უნივერსიტეტის ორგანიზებით „ბათუმის სამეცნიერო პიკნიკი“ გაიმართა. სამეცნიერო პიკნიკი საქართველოს განათლებისა და მეცნიერების მინისტრის მოადგილემ ლია გიგაურმა, უნივერსიტეტის რექტორმა მერაბ ხალვაშმა, აჭარის განათლების, კულტურისა და სპორტის მინისტრმა ინგა შამილიშვილმა და ბათუმის მერმა გიორგი ერმაკოვმა გახსნეს. ღონისძიება „მეცნიერებისა და ინოვაციების საერთაშორისო ფესტივალი 2017"-ის ფარგლებში ჩატარდა, სადაც წარმოდგენილი იყო ქვეყნის სამეცნიერო და ინოვაციური პოტენციალი - ქართველ და უცხოელ მკვლევართა მიღწევები.

საერთაშორისო სამეცნიერო კონფერენცია „მომავლის ტექნოლოგიები და სიცოცხლის ხარისხი“ გაიხსნა სასტუმრო „რადისონ ბლუ“-ს საკონფერენციო დარბაზში. ორი დღის განმავლობაში ათი 10 ქვეყნის 270 მონაწილე ბოლო პერიოდში წარმოებული კვლევების შედეგებს განიხილავს და არსებულ პრობლემებზე იმსჯელებს. საერთაშორისო ფორუმის მიზანია სიცოცხლის შემსწავლელ მეცნიერთა კვლევების გაცნობა და განხილვა მომავლის ტექნოლოგიების ჭრილში, რომელთა გამოყენებითაც შესაძლებელია დაავადებების დროული დიაგნოსტიკა, პროფილაქტიკა, ეფექტური, ხარისხიანი და უსაფრთხო მკურნალობა. მკურნალობა ეფუძნება გენეტიკურ კვლევებს იმ თანამედროვე ხედვებს, მიღწევებს, ტრადიციულ, უჯრედულ, ბიო, იმუნო და ნანოტექნოლოგიებში, რომლის საფუძველზეც მოხდა დაავადების დიაგნოსტიკა, ბიოლოგიურად აქტიური მოლეკულის გამოვლენა, და სამიზნე ორგანოში, ქსოვილსა თუ უჯრედში მიზანმიმართული მიწოდების წამალთფორმების და სისტემების დიზაინისა და ტექნოლოგიის შემუშავება.