ახალი ამბები

ართვინის ჭოროხის უნივერსიტეტის რექტორი მეჰმედ დუმანი პრორექტორთან და საგარეო ურთიერთობათა დეპარტამენტის ხელმძღვანელთან ერთად ბათუმის შოთა რუსთაველის სახელმწიფო უნივერსიტეტს ეწვია. უნივერსიტეტის რექტორთან, პროფესორ ალიოშა ბაკურიძესთან და ფაკულტეტების დეკანებთან გამართულ შეხვედრაზე ხელი მოეწერა ხელშეკრულებას, რომელიც ითვალისწინებს პარტნიორი უმაღლესი საგანმანათლებლო დაწესებულებების „Mevlana“-ს გაცვლით პროგრამაში მონაწილეობას. საერთაშორისო გაცვლით პროგრამას თურქეთის უმაღლესი განათლების აღმასრულებელი საბჭო აფინანსებს და მიზნად ისახავს სტუდენტებისა და აკადემიური პერსონალის გაცვლას თურქეთისა და უცხოეთის სხვა უმაღლეს სასწავლო-საგანმანათლებლო დაწესებულებებში.

საქართველოს ნოტარიუსთა პალატის გამგეობის წევრმა ხათუნა კალანდარიშვილმა ბათუმის შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს ნოტარიუსობის მსურველთა სტაჟირების კონკურსის პირობები, საკვალიფიკაციო გამოცდისა და ნოტარიუსად დანიშვნის კრიტერიუმები გააცნო. სტაჟირების კონკურსს ნოტარიუსთა პალატის სასწავლო ცენტრი ატარებს და მასში მონაწილეობის მიღება ყველა მსურველს შეუძლია. წარდგინების დასასრულს ხათუნა კალანდარიშვილმა მომავალ სამათალდამცავებისათვის საჯარო ლექცია წაიკითხა თემაზე: „როგორ გავხდე ნოტარიუსი?“.

ბათუმის შოთა რუსთაველის სახელმწიფო უნივერსიტეტი სტუდენტური დღეები „აჭარა 2013“-ის გამარჯვებულია. კომპეტენტურმა ჟიურიმ 6 მაისის პარკში გამართულ დასკვნით კონცერტზე ხუთ ნომინაციას შორის პირველობა ბსუ-ს სტუდენტებს მიაკუთვნა. ახალგაზრდებმა სპორტულ ღონისძიებებს შორის წარმატებას მიაღწიეს ფეხბურთსა და ქუჩის კალათბურთში. თანამედროვე ცეკვების ჯგუფმა ,,M style 13”-მა ცეკვა „აფრიკულის“ შესრულებით საუკეთესო ორიგინალური ნომრის ნომინაციაში გაიმარჯვა და განათლებისა და მეცნიერებათა ფაკულტეტის სტუდენტმა თამთა მამულაძემ „მის-უნივერსიტეტის“ ტიტული მოიპოვა. სტუდენტური დღეები „აჭარა 2013“-ში ბათუმის შოთა რუსთაველის სახელმწიფო უნივერსიტეტის, ბათუმის ხელოვნების სასწავლო უნივერსიტეტის, ბათუმის სახელმწიფო საზღვაო აკადემიისა და ბათუმის ნავიგაციის სასწავლო უნივერსიტეტის 150-მდე სტუდენტი მონაწილეობდა.

ბათუმში გამართულ საერთაშორისო ტურისტულ გამოფენაში ,,ექსპო ბათუმი - 2013” ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტი მონაწილეობდა. ფაკულტეტმა დამთვალიერებლებს უმაღლესი საგანმანათლებლო დაწესებულების სასწავლო-საგანმანათლებლო პროგრამები გააცნო. გამოფენაში ,,ექსპო ბათუმი - 2013” 8 ქვეყნის 80-მდე კომპანია იყო წარმოდგენილი. უკრაინის, ლატვიის, პოლონეთის, აზერბაიჯანის და თურქეთის საგანმანათლებლო დაწესებულებებისა და ტურისტული ორგანიზაციების წარმომადგენლებთან შეხვედრისას ტურიზმის ფაკულტეტთან თანამშრომლობა დაიგეგმა.

ევროპის დღის კვირეულის ფარგლებში ბათუმის შოთა რუსთაველის სახელმწიფო უნივერსიტეტის სტუდენტური თვიმმართველობის, სტუდენტთა მომსახურებისა და მხარდაჭერის სამსახურის, სტუდენტთა სამეცნიერო ცენტრის ორგანიზებითა და ბათუმის საკრებულოს მხარდაჭერით დევიზით - ”გზა ევროპისაკენ” ველომარათონი და სამეცნიერო კონფერენცია გაიმართა. ველომარათონის მონაწილე 40-მდე სტუდენტმა სტარტი უმაღლესი საგანმანათლებლო დაწესებულების ეზოდან აიღო და 6 მაისის პარკის გავლით სიმბოლურად ევროპის მოედნისაკენ გაემართა. საერთაშორისო ურთიერთობებისა და ევროპისმცოდნეობის სპეციალობის სტუდენტებმა მოხსენებები წარმოადგინეს ისეთ საკითხებზე, როგორიცაა: ევროკავშირი გლობალური ფაქტორი, საქართველო-ევროკავშირის ურთიერთობები ისტორიულ ჭრილში. ევროკომისიამ 2013 წელი მოქალაქეთა ევროპულ წლად გამოაცხადა.