ახალი ამბები

ტურიზმის ფაკულტეტის ორგანიზებითა და გერმანიის საერთაშორისო თანამშრომლობის საზოგადოების მხარდაჭერით, ბათუმის შოთა რუსთაველის სახელმწიფო უნივერსიტეტში II პრაქტიკული კონფერენცია ,,საგანმანათლებლო და ტურიზმის ინდუსტრიის ორგანიზაციები” გაიხსნა. კონფერენცია მიზნად ისახავს ტურიზმის განათლების სფეროში საგანმანათლებლო სექტორისა და ტურიზმის ინდუსტრიის ორგანიზაციების ინტეგრაციას. მჭიდრო თანამშრომლობა ხელს შეუწყობს ტურიზმისა და მასპინძლობის დარგისათვის მაღალკვალიფიციური, სათანადო თეორიული ცოდნით, პრაქტიკული უნარ-ჩვევებითა და კომპეტენციებით აღჭურვილი, საერთაშორისო ტურისტული მომსახურების ბაზარზე კონკურენტუნარიანი სპეციალისტების მომზადებას. ორი დღის განმავლობაში ოთხი ქვეყნის ასამდე წარმომადგენელი ისეთ აქტუალურ საკითხებზე იმსჯელებს, როგორიცაა: კომუნიკაციური უნარები, პროფესიული სწავლების ხარისხი, სწავლების წინაპირობები პროფესიულ საგანმანათლებლო პროგრამებზე, პროფესიული სტანდარტები და სასწავლო პროგრამები.

ბათუმის შოთა რუსთაველის სახელმწიფო უნივერსიტეტში დამოუკიდებელი სტუდენტური მოძრაობა „ალტერნატივა“-ს ორგანიზებით სტუდენტები, პროფესორ-მასწავლებლები და საზოგადოების წარმომადგენლები შეიკრიბნენ. შეხვედრაზე სტუდენტური მოძრაობის წევრებმა 2007 წლის 8 ნოემბერს, უნივერსიტეტის დარბევის ამსახველი ვიდეო კადრები წარმოადგინეს და უმაღლეს საგანმანათლებლო დაწესებულებაში განვითარებული მოვლენები გაიხსენეს. ახალგაზრდებმა აკადემიურ პერსონალთან ერთად სპეცრაზმელების მიერ სტუდენტებისა და პროფესორ-მასწავლებლების დარბევის ფაქტები დაგმეს, დამნაშავეთა გამოვლენა და პოლიტპატიმრების, ბსუ–ს სტუდენტების: ცოტნე ანანიძისა და დიმიტრი ჭეიშვილის გათავისუფლება მოითხოვეს.

შოთა რუსთაველის ეროვნულმა სამეცნიერო ფონდმა ახალგაზრდა მეცნიერთათვის პრეზიდენტის სამეცნიერო გრანტების 2012 წლის კონკურსის შედეგები გამოაქვეყნა. საგრანტო კონკურსში გამარჯვება მოიპოვეს ბათუმის შოთა რუსთაველის სახელმწიფო უნივერსიტეტის ახალგაზრდა მკვლევრებმა რუსლან ბარამიძემ, ბადრი გეჩბაიამ და მარინა ნაგერვაძემ. სამეცნიერო ცენტრის ნიკო ბერძენიშვილის ჰუმანიტარულ–სოციალური მიმართულების უფროსი მეცნიერ-თანამშრომელი რუსლან ბარამიძე ერთი წლის განმავლობაში სამეცნიერო პროექტს „საქართველოს სახელმწიფო პოლიტიკა და მუსლიმური თემი საქართველოში“ განახორციელებს, ხოლო სოციალურ მეცნიერებეთა, ბიზნესისა და სამართალმცოდნეობის ფაკულტეტის ასისტენტ-პროფესორი ბადრი გეჩბაია - „კავკასიის რეგიონის ეკონომიკის პრიორიტეტები და ტენდენციები გლობალიზაციის ხანაში (კონკურენტუნარიანობა, პრობლემები, გამოწვევები, პერსპექტივები)“. განათლებისა და მეცნიერებათა ფაკულტეტის ასისტენტ პროფესორი მარინა ნაგერვაძე სამეცნიერო გრანტის ფარგლებში იმუშავებს თემაზე: „რეზუს სისტემის ანტიგენების - C, c, D, E, e გავრცელების თავისებურებანი და მათი სკრინინგის აუცილებლობა დონორთა სისხლში და ანტი - D ანტისხეულით გამოწვეული ალოიმუნიზაცია ორსულებში“.

USAID-ის საქართველოს წარმომადგენლობისა და ბათუმის შოთა რუსთაველის სახელმწიფო უნივერსიტეტის ჯანდაცვის მიმართულების ინიციატივით რეგიონში ექიმთა დიპლომამდელი და დიპლომისშემდგომი განათლების ხარისხის გაუმჯობესებისა და მედიკოსთა პროფესიული განვითარების ხელშეწყობის პროგრამა ხორციელდება, რომლის ფარგლებში რსუ-ს განათლებისა და მეცნიერებათა ფაკულტეტს საჩუქრად შვიდი საფანტომე მულაჟი გადაეცა. პროგრამის ეგიდით ჯანდაცვის მიმართულების პროფესორ-მასწავლებლებს ორდღიანი ტრენინგი ჩაუტარდათ თემაზე ,,მტკიცებითი მედიცინა და სწავლების თანამედროვე მეთოდები სამედიცინო განათლებაში“.

ახალშენის ყოვლადწმიდა სამების მშენებარე სამონასტრო კომპლექსის გაწმენდით სამუშაოებში რამდენიმე დღეა აქტიურად მონაწილეობენ ბათუმის შოთა რუსთაველის სახელმწიფო უნივერსიტეტის სტუდენტები. სტუდნტური თვიმმართველობის მიერ ორგანიზებული საქველმოქმედო აქცია შაბათს, 3 ნოემბერს განახლდება და მასში მონაწილეობის მიღება ნებისმიერ მსურველს შეეძლება. ბოლო ერთი წლის განმავლობაში სტუდენტები და პროფესორ-მასწავლებლები 12 ეკლესია-მონასტრის მშენებლობასა და გაწმენდით სამუშაოებში იყვნენ ჩართული.