ახალი ამბები

ERASMUS MUNDUS-ის მეორე აქტივობის პროექტის „ALRAKIS”-ის გაცვლითი პროგრამის ფარგლებში სამი პოლონელი და ერთი ავსტრიელი სტუდენტი ბათუმის შოთა რუსთაველის სახელმწიფო უნივერსიტეტს ეწვია. უცხოელი სტუდენტები უმაღლესი საგანმანათლებლო დაწესებულების რექტორის მოადგილეებთან ნათია წიკლაშვილთან, ირაკლი ბარამიძესთან და ფაკულტეტების დეკანებთან გამართულ შეხვედრაზე მასპინძელი უნივერსიტეტის საგანმანათლებლო პროგრამებს გაეცნენ. ახალგაზრდები სოციალურ მეცნიერებათა, ბიზნესისა და სამართალმცოდნეობისა და ტურიზმის ფაკულტეტებზე ოთხ სასწავლო კურსს ერთი სემესტრის განმავლობაში გაივლიან. ამავე პროექტის ფარგლებში ბსუ-ს ექვსი სტუდენტი სასწავლებლად უცხოეთში იმყოფება, ხოლო ერთი პროფესორი და ერთი დოქტორანტი უახლოეს მომავალში შვედეთსა და ესპანეთში გაემგზავრება.

ბათუმის შოთა რუსთაველის სახელმწიფო უნივერსიტეტმა საგამოფენო ცენტრ ,,ექსპო-ჯორჯიაში” გამართულ განათლების III საერთაშორისო გამოფენაში მიიღო მონაწილეობა. უმაღლესი საგანმანათლებლო დაწესებულების ტურიზმის ფაკულტეტის დეკანის მოადგილემ მერაბ დიასამიძემ, პრესსამსახურის უფროსმა ნინო დოლიძემ, სტუდენტებმა: ნინო ხელაძემ, არჩილ ჯიჯავაძემ და დემიდ ფასიეშვილმა აბიტურიენტებსა და ყველა დაინტერესებულ პირს უნივერსიტეტი წარუდგინეს. გააცნეს სასწავლო-სამეცნიერო პროგრამები, სწავლების პირობები, სტუდენტური ცხოვრება, გაცვლითი და სოციალური პროგრამები. დაიგეგმა თანამშრომლობის დამყარება საქართველოსა და უცხოეთის უმაღლეს სასწავლებლებთან, ერთობლივი პროექტების განხორციელება და სტუდენტთა და პროფესორ-მასწავლებელთა სტაჟირება. განათლების საერთაშორისო გამოფენა 15 თებერვალს გაიხსნა და მასში საქართველოსა და უცხოეთის 100-მდე საგანმანათლებლო დაწესებულება მონაწილეობდა. ორდღიანი გამოფენა საქართველოს განათლებისა და მეცნიერების სამინისტროსა და თბილისის მერიის ორგანიზებით გაიმართა.

საპასუხო ვიზიტით ბათუმის შოთა რუსთაველის სახელმწიფო უნივერსიტეტს გრაცის უნივერსიტეტის დელეგაცია ეწვია. რუსეთის აღმოსავლეთ ევროპისა და ევრაზიის მცოდნეობის ცენტრის დირექტორი, პროფესორი ტომას კრუსმანი გრაცის უნივერსიტეტის ევროპული სამართალმცოდნეობის ინსტიტუტის დირექტორთან, პროფესორ ჰუბერტ ისაკთან და მაგისტრ ბენედიქტ ჰარცლთან ერთად უმაღლესი საგანმანათლებლო დაწესებულების რექტორს, პროფესორ ალიოშა ბაკურიძესა და სოციალურ მეცნიერებათა, ბიზნესისა და სამართალმცოდნეობის ფაკულტეტის დეკანს ადამ მახარაძეს შეხვდნენ. ქართველი და ავსტრიელი კოლეგები შეხვედრაზე პარტნიორ უნივერსიტეტებს შორის გაფორმებული მემორანდუმის ამოქმედებასა და ბსუ-ს ბაზაზე საერთაშორისო საზაფხულო სკოლის ,,ევროპული სამართლის” ჩატარების პირობებზე შეთანხმდნენ. ყურადღება გაამახვილეს ასევე სამართლებრივი კვლევების მნიშვნელობაზე, ერთობლივი სასწავლო-სამეცნიერო პროექტებისა და გაცვლითი პროგრამების განხორციელების აუცილებლობაზე.

სტუდენტთა სამეცნიერო ცენტრის, სტუდენტური თვითმმართველობის, სტუდენტთა მომსახურებისა და მხარდაჭერის სამსახურის ორგანიზებითა და აჭარის სპორტისა და ახალგაზრდობის დეპარტამენტის ხელშეწყობით წმიდა დავით აღმაშენებლის ხსენების დღისადმი მიძღვნილი ინტელექტუალური თამაში გაიმართა. შეჯიბრში ქ. ბათუმის ოცდაექვსი საჯარო და კერძო სკოლის მოსწავლეები მონაწილეობდნენ. საუკეთესოდ N9 საჯარო სკოლის გუნდი „მამულიშვილნი“ დასახელდა, მეორე ადგილი N1 საჯარო სკოლის გუნდმა „მონა-სპა I”-მა მოიპოვა, ხოლო მესამე - N15 საჯარო სკოლის გუნდს „ვალქერნს“ ერგო. ღონისძიება მესამედ გაიმართა და მიზანად ისახავდა საქართველოს ისტორიისა და ბათუმის შოთა რუსთაველის სახელმწიფო უნივერსიტეტის პოპულარიზაციას. ინტელექტუალური შეჯიბრის გამარჯვებულ გუნდებს სამახსოვრო საჩუქრები გადაეცათ, ხოლო მონაწილე გუნდებს - სერტიფიკატები.

უნივერსიტეტს თბილისის ემრეს თურქული კულტურის ცენტრის დირექტორი ბარიშ დემირი ეწვია. პარტნიორი ორგანიზაციის ხელმძღვანელმა უმაღლესი საგანმანათლებლო დაწესებულების რექტორთან, პროფესორ ალიოშა ბაკურიძესთან და თურქული ფილოლოგიისა და თურქეთისმცოდნეობის საგანმანათლებლო პროგრამების პროფესორ-მასწავლებლებთან გამართულ შეხვედრაზე თანამშრომლობის მიმართულებებზე ისაუბრა. დაიგეგმა აკადემიური პერსონალის სტაჟირების, სტუდენტთა გაცვლითი პროგრამების, ერთობლივი სასწავლო-სამეცნიერო და კულტურული პროექტების განხორციელება. შეთანხმებისამებრ, თბილისის ემრეს თურქული კულტურის ცენტრი ბსუ-ს ბიბლიოთეკას საჩუქრად 3 000-მდე წიგნს გადასცემს.