ახალი ამბები

სტუდენტური დღეები „აჭარა 2012“ საზეიმო მსვლელობით ბათუმის ქუჩებში დაიწყო და ფიჭვნარის ზღვისპირა პარკში კონცერტით დასრულდა. ბათუმის შოთა რუსთაველის სახელმწიფო უნივერსიტეტის, ბათუმის ხელოვნების სასწავლო უნივერსიტეტის, ბათუმის სახელმწიფო საზღვაო აკადემიისა და ბათუმის ნავიგაციის სასწავლო უნივერსიტეტის სტუდენტები ერთმანეთს რამდენიმე საათის განმავლობაში ოთხ ნომინაციაში ეჯიბრებოდნენ. კომპეტენტურმა ჟიურიმ მის სტუდენტი, საუკეთესო ორიგინალური და ფოლკლორული ნომერი, მან-სან-კანისა და ფეხბურთის გუნდი გამოავლინა. ბათუმის შოთა რუსთაველის სახელმწიფო უნივერსიტეტის ქორეოგრაფიულმა ანსამბლმა „ტბეთმა“ ცეკვის „ქალთა ხორუმის“ შესრულებით საუკეთესო ორიგინალური ნომრის ნომინაციაში გაიმარჯვა.

აჭარის მთავრობის თავმჯდომარე ლევან ვარშალომიძე და განათლების, კულტურისა და სპორტის მინისტრი გია აბულაძე ბათუმის შოთა რუსთაველის სახელმწიფო უნივერსიტეტის სტუდენტებს შეხვდნენ და ახალი და მიმდინარე მიზნობრივი პროგრამები გააცნეს. აჭარის მთავრობის დაფინანსებით სტუდენტების დახმარების მიზნობრივი პროგრამა შეიქმნა, რომელიც უმაღლესი განათლების პირველი საფეხურის აკრედიტებულ უმაღლეს საგანმანათლებლო პროგრამებზე ჩარიცხული სტუდენტების სწავლის საფასურის დაფარვას ითვალისწინებს. მრავალწლიანი პროგრამა ახალი სასწავლო წლიდან ამოქმედდება და მასში მონაწილეობის მიღება შეუძლიათ აჭარის მაღალმთიან რაიონებში მცხოვრებ სტუდენტებს, ობოლებს, მრავალშვილიანი და სოციალურად დაუცველი ოჯახის წევრებს. აჭარის განათლების, კულტურისა და სპორტის სამინისტრომ ტურიზმის განათლების განვითარების ხელშეწყობის მიზნობრივი პროგრამა შეიმუშავა, რომელიც მიზნად ისახავს საგანმანათლებლო ტურიზმის საბაზრო კვლევის შედეგებზე დაყრდნობით ტურიზმის განათლების რეფორმას, საგანმანათლებლო პროგრამების საერთაშორისო სტანდარტებთან შესაბამისობაში მოყვანას.

საქართველოს საგარეო საქმეთა მინისტრის მოადგილე თორნიკე გორდაძე და პოლონეთის ელჩი საქართველოში ურშულა დოროშევსკა ნატოს კვირეულის ფარგლებში ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს შეხვდნენ. სტუმრებმა საქართველოს ჩრდილოეთ ატლანტიკური ალიანსში ინტეგრაციის პროცესსა და მის მნიშვნელობაზე ისაუბრეს, ბოლო პერიოდში განვითარებული მოვლენები შეაფასეს და სტუდენტების შეკეითხვებს უპასუხეს. ნატოს კვირეულის ეგიდით სტუდენტებს შორის ტურნირი გაიმართა ფრენბურთში და საქართველოს საგარეო საქმეთა მინისტრის მოადგილემ გამარჯვებული გუნდის წევრებს ფასიანი საჩუქრები გადასცა.

დასრულდა სტუდენტთა ბიზნეს-ეკონომიკური, ინტელექტუალური თამაში ,,გახდი მენეჯერი სათამაშო მაგიდასთან". სხვადასხვა ფაკულტეტის სტუდენტები ვაჭრობის, საქმიანობის დაგეგმვის, უძრავი ქონების მართვის, განკარგვის, სტრატეგიული ხედვის განვითარების, კონკურენტებთან ურთიერთობისა და საბაზრო ეკონომიკისათვის დამახასიათებელ სხვა ელემენტებისაგან შემდგარი თამაშით მენეჯერისთვის საჭირო უნარ-რჩვევებს რამდენიმე დღის განმავლობაში ივითარებდნენ. 162 სტუდენტიდან ფინალში პირველობისათვის 6 მონაწილე იბრძოდა და გამარჯვება განათლებისა მეცნიერებათა ფაკულტეტის სტუდენტს გიორგი ბუხრიკიძეს ერგო. მეორე ადგილი ამავე ფაკულტეტის სტუდენტმა პაატა ჭახნაკიამ დაიკავა, ხოლო მესამე ადგილი - სოციალურ მეცნიერებათა, ფიზნესისა და სამართალმცოდნეობის ფაკულტეტის სტუდენტმა როლანდ ხომერიკმა. კომპეტენტურმა ჟიურიმ პროექტის საუკეთესო მონაწილეები სხვადასხვა ნომინაციაშიც გამოავლინა. ყველაზე ეფექტური მენეჯერი გულო თურმანიძე გახდა, ინტელექტუალურ მენეჯერად ხატია კონცელიძე დასახელდა, ხოლო რისკიან მენეჯერად - ერეკლე ჭაპანიძე. გამარჯვებულებს ორგანიზატორებმა ფასიანი და სამახსოვრო საჩუქრები გადასცეს.

შავი ზღვის რეგიონის ქვეყნების სასაზღვრო თანამშრომლობის თემაზე ბათუმის შოთა რუსთაველის სახელმწიფო უნივერსიტეტის, საქართველოს პოლიტიკის ინსტიტუტისა და ქალაქ ვენის მერიის ორგანიზებით საერთაშორისო საზაფხულო სკოლა გაიხსნა. ქართველი, უკრაინელი, თურქი, სომეხი, აზერბაიჯანელი, რუსი სტუდენტები ოთხი დღის განმავლობაში ისეთ საკითხებს განიხილავენ, როგორიცაა შავი ზღვის ქვეყნების პოლიტიკა და სწორი მმართველობა, მოსაზღვრე ქვეყნების თანამშრომლობა ევროკავშირთან და მმართველობა ევროპის „ახალი მმართველობის“ მოდელზე. ახალგაზრდები ასევე იმსჯელებენ საზღვრებთან დაკავშირებული საკითხების მოგვარებაზე, კონფლიქტის გადაჭრის საშუალებებზე, კონფლიქტის მქონე საზოგადოებაში მასმედიისა და ადამიანის უფლებების დაცვაზე. საზაფხულო სკოლა მიზნად ისახავს პოლიტიკური ანალიზის ხარისხის გაუმჯობესებას შავი ზღვის ქვეყნებთან ურთიერთობის განვითარების თვალსაზრისით, აკადემიური დისკუსიის ხელშეწყობასა და კოოპერატიული ქსელის შექმნას სამოქალაქო საზოგადოებას და ახალგაზრდა პროფესიონალებს შორის.