ახალი ამბები

ფილოსოფიის საერთაშორისო დღეს მიეძღვნა რესპუბლიკური სამეცნიერო კონფერენცია თემაზე: ,,ფილოსოფია და თანამედროვეობა“. კონფერენცია ფილოსოფიის დეპარტამენტის ორგანიზებით იუნესკოს პროგრამის ფარგლებში ჩატარდა და მიზნად ისახავდა თანამედროვე ფილოსოფიის პრობლემების წარმოჩენას. სამეცნიერო სესიაზე მკვლევრებმა განათლების ფილოსოფიაზე, ინტერდისციპლინარული კვლევების შედეგებსა და მიღწევებზე იმსჯელეს. დარგის სპეციალისტებმა სექციებში - ,,ფილოსოფია და მსოფლმხედველობა“, ,,ფილოსოფია და ინტერდისციპლინარული კვლევები“, ,,რელიგია და ფილოსოფია“ - 30 სამეცნიერო მოხსენება წარმოადგინეს.

საერთაშორისო და რეგიონულ ურთიერთობებს, ეთნიკურ კონფლიქტებსა და კულტურათშორისი დიალოგის საკითხებს მიეძღვნა რესპუბლიკური სამეცნიერო კონფერენცია თემაზე: „იდენტობის და კულტურათა დიალოგის თანამედროვე პრობლემები“. ქართველმა მეცნიერებმა გლობალიზაციის შეუქცევადი პროცესის თავისებურებებზე, მასში მცირე ერების იდენტობის შენარჩუნებისა და ინტერკულტურული დიალოგის გაღრმავების პრობლემებზე ისაუბრეს. კონფერენცია შოთა რუსთაველის სახელმწიფო უნივერსიტეტისა და ივანე ჯავახიშვილის სახელობის თბილისის სახელმწიფო უნივერსიტეტის ორგანიზებით ჩატარდა.

შოთა რუსთაველის სახელმწიფო უნივერსიტეტის სტუდენტთა სამეცნიერო ცენტრის ორგანიზებით გაიმართა დიალოგი თემაზე: ,,სუიციდი ახალგაზრდებში“. სტუდენტების სუიციდის პრობლემით დაინტერესება ჯანმრთელობის მსოფლიო ორგანიზაციის მიერ გამოქვეყნებულმა სტატისტიკურმა მონაცემებმა განაპირობა, რომლის მიხედვითაც პრობლემა განსაკუთრებით აქტუალურია მოზარდებში. ახალგაზრდებმა სასულიერო პირებთან, ფსიქოლოგებთან და იურისტებთან ერთად თვითმკვლელობის პრობლემაზე, მის გამომწვევ მიზეზებსა და გადაჭრის გზებზე იმსჯელეს.

,,კითხვის გამავრცელებელი საზოგადოების“ ორგანიზებით შოთა რუსთაველის სახელმწიფო უნივერსიტეტში ,,ილიას ბიბლიოთეკის“ 10 წიგნის წარდგინება გაიმართა. წიგნების სერია კონკურსის ,,დემოკრატიული ღირებულებები ქართულ კულტურაში“ ფარგლებში შეიქმნა. მასში XIX-XX საუკუნეების ქართველი მწერლებისა და საზოგადო მოღვაწეების ნაწარმოებები და პუბლიცისტური წერილებია შესული. სტუდენტებს წიგნები ცნობილმა მწერლებმა: დათო ტურაშვილმა, რატი ამაღლობელმა და ლაშა ბუღაძემ წარუდგინეს. ,,კითხვის გამავრცელებელი საზოგადოების“ საპატიო წევრებმა წიგნის პოპულარიზაციის აუცილებლობაზე ისაუბრეს და სტუდენტების აქტუალურ შეკითხვებს უპასუხეს.

XXX რესპუბლიკური დიალექტოლოგიური სამეცნიერო სესიის ფარგლებში ქართული და ქართველური დიალექტოლოგიის აქტუალურ საკითხებზე ენათმეცნიერები ორი დღის განმავლობაში მუშაობდნენ. კონფერენცია შოთა რუსთაველის სახელმწიფო უნივერსიტეტისა და არნოლდ ჩიქობავას ენათმეცნიერების ინსტიტუტის ორგანიზებით გაიმართა. მასში ქვეყნის სხვადასხვა უმაღლესი სასწავლებლისა და სამეცნიერო-კვლევითი დაწესებულების 40-ზე მეტი მკვლევარი მონაწილეობდა. ყოველწლიური რესპუბლიკური დიალექტოლოგიური სამეცნიერო სესია განვლილ პერიოდში ჩატარებული კვლევა-ძიების შედეგების გაცნობას ისახავდა მიზნად.