ახალი ამბები

ამერიკის შეერთებული შტატების საელჩოს მოწვევით ცნობილმა ამერიკელმა ექსპერტმა უოლტერ რასელ მიდმა საჯარო ლექცია წაიკითხა თემაზე: ,,აშშ-ს საგარეო პოლიტიკა“. ლექციას რსუ-ს სტუდენტებთან ერთად პროფესორ-მასწავლებლებიც ესწრებოდნენ. ექსპერტმა ამერიკისა და მსოფლიოს პოლიტიკურ-ეკონომიკურ ვითარებაზე ისაუბრა და დასმულ შეკითხვებს უპასუხა. საერთაშორისო ურთიერთობების საბჭოს წევრი უოლტერ რასელ მიდი ელექტრონული გაზეთის ,,ამერიკული ინტერესის“ რედაქტორი და მრავალი წიგნის ავტორია.

საქართველოს განათლებისა და მეცნიერების სამინისტროს Twinning-ის პროექტისა და განათლების ხარისხის განვითარების ეროვნული ცენტრის ეგიდით ინა გრიბმა (ოლდენბურგის უნივერსიტეტი) და შტეფან ბინფილდმა (DAAD-ი) რსუ-ს რეგულირებად საგანმანათლებლო პროგრამებში ჩართული აკადემიური პერსონალისა და ხარისხის უზრუნველყოფის სამსახურის თანამშრომლებისთვის სემინარი ჩაატარეს. ექსპერტებმა მათ რეგულირებადი საგანმანათლებლო პროგრამების აკრედიტაციის სტანდარტები და თვითშეფასების ანგარიშის მომზადების წესი გააცნეს. შეიქმნა სამუშაო ჯგუფი, რომელიც განათლების მიმართულებით არსებული საგანმანათლებლო პროგრამების თვითშეფასებაზე იმუშავებს.

შოთა რუსთაველის სახელმწიფო უნივერსიტეტმა ბრანდენბურგის საპარლამენტო დელეგაციას უმასპინძლა. პარლამენტარები უმაღლესი სასწავლებლის ბიომრავალფეროვნების სამეცნიერო-კვლევითი ინსტიტუტითა და საინჟინრო-ტექნოლოგიური მიმართულებებით დაინტერესდნენ. პოტსდამისა და კოტბუსის უნივერსიტეტებთან ერთად დაიგეგმა ერთობლივი სადოქტორო პროგრამებისა და სტუდენტთა და პროფესორ-მასწავლებელთა გაცვლითი პროგრამების განხორციელება.

ბათუმის შოთა რუსთაველის სახელმწიფო უნივერსიტეტში მაგდებურგის უნივერსიტეტისა და გერმანიის საერთაშორისო თანამშრომლობის საზოგადოების (GIZ) წარმომადგენელთა სამუშაო ვიზიტი გაიმართა. შეხვედრის მიზანი პროფესიული განათლების მასწავლებელთა მოსამზადებელ ორმხრივ პროგრამასთან დაკავშირებულ დეტალებზე შეთანხმება იყო. აგრეთვე, შეხვედრაზე საუბარი შეეხო პროფესიული განათლების ადმინისტრირებისა და მართვის ორმხრივი სამაგისტრო პროგრამის ამოქმებედას, რომლის ფარგლებშიც სტუდენტები მაგისტრატურის ერთ ნაწილს გერმანიაში, ხოლო მეორე ნაწილს საქართველოში გაივლიან.

საქართველოს საკონსტიტუციო სასამართლოს თავმჯდომარე გიორგი პაპუაშვილი შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს შეხვდა და საკონსიტიტუციო მართლმსაჯულების ორგანოს დანიშნულება, უფლებამოსილება და ისტორია გააცნო. შეხვედრა პროექტის ,,საქართველოს საკონსტიტუციო სასამართლოს გადაწყვეტილებათა საჯაროობა“ ფარგლებში გაიმართა.