უნივერსიტეტის სააქტო დარბაზში სტუდენტური თვითმმართველობის ორგანიზებით ნიკო გომელაურის ხსოვნისადმი მიძღვნილი საქველმოქედო პოეზიის საღამო გაიმართა. ახალგაზრდა ბათუმელმა, თბილისელმა და ქუთაისელმა პოეტებმა ხელოვანის შემოქმედება გაიხსენეს და საკუთარი ლექსებიც წაიკითხეს. საქველმოქმედო საღამოზე შემოსული თანხა ბაგრატიონის ქუჩაზე დავით აღმაშენებლის სახელობის მშენებარე ეკლესიას მოხმარდება.
სასჯელაღსრულების, პრობაციისა და იურიდიული დახმარების საკითხთა მინისტრი ხათუნა კალმახელიძე შოთა რუსთაველის სახელმნიფო უნივერსიტეტის პროფესორ-მასწავლებლებსა და სტუდენტებს შეხვდა. უწყების პირველმა პირმა დარგის პრიორიტეტებსა და სიახლეებზე ისაუბრა. მინისტრმა ყურადღება გაამახვილა პენიტენციალურ სისტემაში მიმდინარე ჯანდაცვის რეფორმაზე, უფასო იურიდიული დახმარების სამსახურის მნიშვნელობაზე, მსჯავრდებულთა დასაქმებასა და რესოციალიზაციაზე.
აჭარის მთავრობის ხელშეწყობით მიმდინარეობს შოთა რუსთაველის სახელმწიფო უნივერსიტეტის მატერიალურ-ტექნიკური ბაზის გაუმჯობესება. თანამედროვე მოთხოვნების შესაბამისი 285 კომპიუტერული ტექნიკის კომპლექტითა და 30 პრინტერით აღიჭურვა კომპიუტერული კლასები, სტუდენტური თვითმმართველობა, ბიბლიოთეკა, სამეცნიერო-კვლევითი ინსტიტუტები, დეკანატები, დეპარტამენტები, ხარისხის უზრუნველყოფის სამსახური და ადმინისტრაცია. გაორმაგებული ტექნიკური ბაზა ხელს შეუწყობს სასწავლო და სამეცნიერო-კვლევითი საქმიანობის ხარისხის ამაღლებას.
სტუდენტთა სამეცნიერო კონფერენციამ მუშაობა სოციალური მეცნიერებების სექციით დაიწყო. კონფერენცია სტუდენტთა სამეცნიერო ცენტრის ორგანიზებით ტარდება და მასში უნივერსიტეტის რვა ფაკულტეტის 186 სტუდენტი მონაწილეობს. სპეციალური კომისიის მიერ გამოვლენილი საუკეთესო მოხსენებები სტუდენტთა შრომების კრებულში დაიბეჭდება, ხოლო ყველა მონაწილეს სერტიფიკატი გადაეცემა. სტუდენტთა სამეცნიერო კონფერენცია 2 ივნისს საზეიმოდ დაიხურება.
შოთა რუსთაველის სახელმწიფო უნივერსიტეტის დაარსებიდან 75 წლისთავს მიეძღვნა რესპუბლიკური სამეცნიერო კონფერენცია თემაზე: ,,ბიბლიოთეკა მომავალი თაობის განათლების კერა“. ბათუმელმა, თბილისელმა და ქუთაისელმა მკვლევრებმა სასწავლო პროცესში ბიბლიოთეკისა და საინფორმაციო ტექნოლოგიების გამოყენების მნიშვნელობაზე ისაუბრეს. კონფერენციაზე მოხსენებებთან ერთად წარმოდგენილი იყო გივი ნახუცრიშვილის საუნივერსიტეტო ცხოვრების ამსხაველი ფოტოები და დოკუმენტური ფილმი ,,მერისი“.
