1921 წლის 21 თებერვალს, თბილისში გამართულ სხდომაზე საქართველოს დამფუძნებელმა კრებამ საქართველოს პირველი კონსტიტუცია მიიღო. სწორედ იმ დროს ქართული შეიარაღებული ძალები რუსულ საოკუპაციო არმიას თბილისის მისადგომებთან ებრძოდა. კონსტიტუცია 1921 წლის მარტში, ბათუმში, ნესტორ ხვინგიას სტამბაში დაიბეჭდა.
ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, ტურიზმის ფაკულტეტის დეკანმა ირაკლი კორძაიამ, ასოცირებულმა პროფესორმა დარეჯან ჯაშმა, ასისტენტ პროფესორმა ლია დავითაძემ და მოწვეულმა ლექტორმა მამუკა თურმანიძემ აშშ-ში სამუშაო ვიზიტის ფორმატში დასკვნითი შეხვედრები ვაშინგტონში 13-14 თებერვალს გამართეს.
ბსუ-ში გაიმართა „ერაზმუს+“-ის პროექტის - „საქართველოს უნივერსიტეტებში მესამე მისიის ხარისხის და რელევანტურობის გაძლიერება“ (SQUARE) მონაწილეების მორიგი შეხვედრა უნივერსიტეტის ადმინისტრაციის, სტრუქტურული ერთეულებისა და აკადემიური პერსონალის მონაწილეობით. შეხვედრის მიზანი იყო პროექტის ფარგლებში მიმდინარე ღონისძიებების, ჩატარებული ტრენინგებისა და სასწავლო ტურების, სტრატეგიული გეგმის მონახაზის და მომავალი გეგმების გაცნობა უნივერსიტეტის წარმომადგენლებისათვის.
აკადემიკოსი, პედაგოგი და ფსიქოლოგი, ჰუმანური პედაგოგიკის ფუძემდებელი შალვა ამონაშვილი საგანმანათლებლო პროექტის „ჰუმანური საქართველოს“ ფარგლებში, ბათუმის შოთა რუსთაველის სახელმწიფო უნივერსიტეტის სტუდენტებს შეხვდა. შალვა ამონაშვილმა შეხვედრაზე ჰუმანური პედაგოგიკის პრინციპებზე, მიზნებსა და ამოცანებზე ისაუბრა. ჰუმანური პედაგოგიკის ფუძემდებელმა ღონისძიების მონაწილეებს ჰუმანიზმით გამორჩეული მასწავლებლის, ვარვარა ვარდიაშვილის პედაგოგიური მიდგომები და მიღწევები გააცნო, რომლისგანაც გაიზიარა ჰუმანური პედაგოგიკის გაკვეთილის მოდელი. აკადემიკოსი შალვა ამონაშვილი თავისი ინიციატივით, ბსუ-ში სტუდენტთა ერთ ჯგუფს ჩაუტარებს მოკლევადიან სასწავლო კურსს. შეხვედრის დასრულების შემდეგ, შალვა ამონაშვილმა სტუდენტების აქტუალურ შეკითხვებს უპასუხა.
ბათუმის შოთა რუსთაველის სახელმწიფო უნივერსიტეტმა თურქეთში 6 თებერვალს დამანგრეველი მიწისძვრით დაზარალებულთა დასახმარებლად ჰუმანიტარული ტვირთი გაგზავნა. საქველმოქმედო აქციაში მონაწილეობა მიიღეს ბსუ-ს პროფესორ-მასწავლებლებმა, მკვლევრებმა, ადმინისტრაციის წარმომადგენლებმა და სტუდენტებმა. აქციის ფარგლებში შეძენილია პირველადი მოხმარების ნივთები, ლეიბები, საბნები, ჰიგიენური და ბავშვის მოვლის საშუალებები.
