ახალი ამბები

ბათუმის შოთა რუსთაველის სახელმწიფო უნივერსიტეტის ბავშვის უფლებათა ცენტრში სტუდენტებისა და სკოლის მოსწავლეებისთვის ტრენინგი ჩატარდა თემაზე: „ჩვენ გვაქვს უფლება“. ტრენინგის მონაწილეებს გაეროს ბავშვთა ფონდის წარმომადგენელი საქართველოში, ბსუ-ს საპატიო დოქტორი ღასან ხალილი, ბსუ-ს რექტორის მოადგილე ანზორ ბერიძე და ადმინისტრაციის ხელმძღვანელი ნიკა ჩხარტიშვილი მიესალმნენ, ბავშვის უფლებათა ცენტრის მნიშვნელობაზე ისაუბრეს და სერტიფიკატები გადასცეს.

ბათუმის შოთა რუსთაველის სახელმწიფო უნივერსიტეტის სადოქტორო საგანმანათლებლო პროგრამის „ბუნებრივ ნაერთთა ანალიზი“ დოქტორანტებმა: ნონა აბაშიძემ, ჯეირან ფუტკარაძე და ნონა სურმანიძემ შოთა რუსთაველის საქართველოს ეროვნული სამეცნიერო ფონდის „2022 წლის დოქტორანტურის საგანმანათლებლო პროგრამების დაფინანსების კონკურსში“ გაიმარჯვეს. ბსუ ულოცავს დოქტორანტებს გამარჯვებას და უსურვებს წარმატებებს.

ოდესის VIII საერთაშორისო ლიტერატურული ფესტივალის ფარგლებში, ბათუმის შოთა რუსთაველის სახელმწიფო უნივერსიტეტში უკრაინელ პოეტებთან - ჰალინა კრუკთან და დმიტრო ლაზუტკინთან - შეხვედრა-დისკუსია „წერის ხელოვნება“ გაიმართა. შეხვედრაზე სტუდენტებს, პროფესორ-მასწავლებლებსა და საზოგადოების წარმომადგენლებს უკრაინელმა პოეტებმა ომის თემატიკაზე, რეალურ ამბებზე შექმნილი საკუთარი ლექსები წაუკითხეს. ღონისძიების მონაწილეებს შესაძლებლობა ჰქონდათ ასევე, გაცნობოდნენ ჰალინა კრუკისა და დმიტრო ლაზუტკინის ლექსებს ქართულ ენაზე.

ბსუ-ს დოქტორანტი როლანდ შავაძე 2022 წლის მასწავლებლის ეროვნული ჯილდოს მფლობელია. ბათუმის შოთა რუსთაველის სახელმწიფო უნივერსიტეტი ულოცავს როლანდ შავაძეს ამ მნიშვნელოვან გამარჯვებას და წარმატებებს უსურვებს. როლანდ შავაძემ ბათუმის შოთა რუსთაველის სახელმწიფო უნივერსიტეტის განათლების ფაკულტეტის სამაგისტრო პროგრამა „განთლების ადმინისტრირება“ 2017 წელს დაასრულა. ბსუ-ში სწავლის პერიოდში ისარგებლა „Erasmus+“-ის გაცვლითი პროგრამით და ერთი სემესტრი სწავლობდა ბულგარეთის რუსეს უნივერსიტეტში, ხოლო 2019 წელს დაასრულა ბსუ-ს მასწავლებლის მომზადების საგანმანათლებლო პროგრამა.

ბათუმის შოთა რუსთაველის სახელმწიფო უნივერსიტეტის სტუდენტებისთვის „ერაზმუს+“-ის გაცვლითი პროგრამის პრეზენტაცია გაიმართა. ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსის მოადგილემ, „ერაზმუს+“-ის გაცვლითი პროგრამების კოორდინატორმა ნანა ყურშუბაძემ სხვადასხვა ფაკულტეტის სტუდენტებს საერთაშორისო გაცვლითი პროგრამის განხორციელების წესები და კონკურსის ჩატარების პირობები გააცნო. პრეზენტაციის დასრულების შემდეგ „ერაზმუს+“-ის გაცვლითი პროგრამების კოორდინატორმა სტუდენტების შეკითხვებს უპასუხა.