ახალი ამბები

ბათუმის შოთა რუსთაველის სახელმწიფო უნივერსიტეტსა და ოდესის შინაგან საქმეთა სახელმწიფო უნივერსიტეტს შორის თანამშრომლობის მემორანდუმი გაფორმდა. ონლაინ რეჟიმში გამართულ შეხვედრაზე მხარეები შეთანხმდნენ სამომავლო თანამშრომლობის გეგმებსა და მიმართულებებზე. ბსუ-ს რექტორმა, პროფესორმა მერაბ ხალვაშმა ისაუბრა უკრაინაში მიმდინარე რთულ მოვლენებზე და თანადგომა გამოხატა უკრაინელი ხალხის მიმართ. მემორანდუმი ითვალისწინებს ერთობლივი სასწავლო-სამეცნიერო პროექტების განხორციელებას, გაცვლითი პროგრამების ამოქმედებას, კონფერენციების, სემინარებისა და ტრენინგების ჩატარებას.

საქართველოში იუნისეფის წარმომადგენელმა, ბსუ-ს საპატიო დოქტორმა ღასან ხალილმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „ბავშვის უფლებები: იმპერატივი საერთაშორისო დღის წესრიგში“. მომხსენებელმა სტუდენტებსა და პროფესორ-მასწავლებლებს ბავშვის უფლებებათა დაცვის ისტორია და თანამედროვე გამოწვევები გააცნო. ლექციის დასრულების შემდეგ, შეხვედრა კითხვა-პასუხის რეჟიმში წარიმართა და დოქტორმა ღასან ხალილმა აქტუალურ შეკითხვებს უპასუხა. ღონისძიება პირველი საერთაშორისო კონფერენციის - „ხარისხიანი ადრეული განათლება და ზრუნვა“ ფარგლებში გაიმართა.

ბსუ-ს ტექნოლოგიური ფაკულტეტის ელექტრონიკა, ტელეკომუნიკაცია და ინტერნეტინჟინერიის სპეციალობის სტუდენტები: ხიმშიაშვილი გიორგი, ზოიძე სალომე, ბერიძე თამარი და ველიაძე ქრისტინე (გუნდის ხელმძღვანელი - თემურ კვირტია) „IOT ჰაკათონი - 2022“-ის ნომინაციაში - „კონცეფციასთან შესაბამისობა“ პირველი ხარისხის მედლითა და საპატიო სიგელით დაჯილდოვდნენ. კონკურსი მიზნად ისახავდა საგნების ინტერნეტის პროტოტიპის შექმნას Arduino - ს ბაზაზე, რომელიც მნიშვნელოვნად ზრდის სტუდენტების მოტივაციას, ხელს უწყობს გამოცდილების მიღებას და ცოდნის გაზიარებას. ორდღიანი კონკურსი გუნდური მუშაობის ბაზაზე მიკროპროექტის შექმნასა და შექმნილი პროექტის პრეზენტაციას ითვალისწინებდა.

ბათუმის შოთა რუსთაველის სახელმწიფო უნივერსიტეტში მომავალი ICF-ის საქართველოს სერტიფიცირებულმა ქოუჩებმა: გვანცა ბარაბაძემ, მარიკა ხალიანმა, ნინო ეფხოშვილმა, ლალი ბადრიძემ, ეკატერინე ბაბუნაშვილმა, გვანცა ბარაბაძემ, ირმა გურამიშვილმა, ეთერ მაზანაშვილმა ტრენინგი ჩაატარეს თემაზე: „გადაიაზრე მომავალი“. სწავლება ქოუჩინგის საერთაშორისო კვირეულის ფარგლებში გაიმართა და მისი მიზანი იყო ადამიანების, ორგანიზაციების გაძლიერება და ახალი რეალობისთვის საჭირო სტრატეგიული ინსტრუმენტების მიწოდება.

ბათუმის შოთა რუსთაველის სახელმწიფო უნივერსიტეტში სკოლისა და უნივერსიტეტის თანამშრომლობის კლუბის „სკოლა-უნივერსიტეტი” ფარგლებში მეცხრე სამეცნიერო კონფერენცია გაიმართა. სესიაში სტუდენტებთან ერთად, ბათუმისა და სხვადასხვა რეგიონის საჯარო და კერძო სკოლების მოსწავლეებმა მიიღეს მონაწილეობა. ღონისძიება მიზნად ისახავდა უნივერსიტეტისა და სკოლის თანამშრომლობის ხელშეწყობას, მოსწავლეებსა და სტუდენტებში შემოქმედებითი, თანამშრომლობითი და კომუნიკაციური უნარ-ჩვევების განვითარებას, კრიტიკული აზროვნების ჩამოყალიბებასა და ნიჭიერი ახალგაზრდების გამოვლენას. კონფერენციის მუშაობა ექვსი სექციის მიმართულებით წარიმართა, სადაც 121 მონაწილის 81 მოხსენება იყო წარმოდგენილი.