ახალი ამბები

25-27 ივლისს, ბათუმის შოთა რუსთაველის სახელმწიფო უნივერსიტეტში (#328 აუდიტორია) „ერასმუს+“-ის პროექტის HEIN 4 (609939-EPP-1-2019-1-BEEPPKA2-CBHE- JP) ფარგლებში, ბსუ-ს აკადემიური პერსონალისთვის, პარტნიორი ორგანიზაციების, დამსაქმებლებისა და სტუდენტებისთვის საქართველოს ინოვაციებისა და ტექნოლოგიების სააგენტოს დონორებთან ურთიერთობის და საერთაშორისო ურთიერთობების დეპარტამენტის უფროსი ანა ვაშაყმაძე და სააგენტოს თავმჯდომარის თანაშემწე მაია ლაბაძე ვორქშოპს ჩაატარებენ თემაზე: „ეკოსისტემები და ტექნოლოგიური მეწარმეობა მე-4 ინდუსტრიული რევოლუციის პირობებში“. ასევე გაიხსნება პროექტის ფარგლებში დაარსებული ინოვაციების ლაბორატორია (#207 აუდიტორია).

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტზე ინოვაციების ლაბორატორია გაიხსნა. ლაბორატორია გახსნა და მის მნიშვნელობაზე ისაუბრა ბსუ-ს რექტორმა, პროფესორმა მერაბ ხალვაშმა. ინოვაციების ლაბორატორია ბსუ-ს სტუდენტებს დაეხმარება, მოამზადონ და განახორციელონ ინოვაციური პროექტები მრეწველობის და ბიზნესის სექტორისთვის, ასევე შესთავაზებს სხვადასხვა სამიზნე აუდიტორიას ორმხრივად სასარგებლო სერვისებს, მრეწველობის სექტორს - მოკლევადიან სასწავლო კურსებს, პერსონალის შესაძლებლობის გაძლიერებისთვის; სტუდენტებს - სხვადასხვა პროგრამულ პაკეტებს და სივრცეს პროექტების შემუშავებისა და მათი რეალიზაციისთვის.

საქართველოს იუსტიციის სამინისტრო ბათუმის შოთა რუსთველის სახელმწიფო უნივერსიტეტთან თანამშრომლობას განაგრძობს. იუსტიციის მინისტრმა რატი ბრეგაძემ და ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა თანამშრომლობის მემორანდუმს მოაწერეს ხელი. მემორანდუმის ფარგლებში სტუდენტები სასწავლო პრაქტიკას იუსტიციის სამინისტროში გაივლიან და დამოუკიდებლად მუშაობისათვის საჭირო უნარ-ჩვევებს შეიძენენ. სამინისტრო ხელს შეუწყობს წარმატებულ სტუდენტთა დასაქმებას სამინისტროს სისტემაში.

„საქართველოს მკვლევართა მობილობის პროგრამის" წარდგენა გაიმართა ბათუმის შოთა რუსთველის სახელმწიფო უნივერსიტეტში. პროგრამის წარმოამდგენლებმა: პიტერ დებრეცენმა, ნინო გაჩეჩილაძემ და სალომე შარაშენძემ მკვლევრებსა და პროფესორ-მასწავლებლებს საგრანტო კონკურსში მონაწილეობის პირობები, კონკურსის ადმინისტრირების კალენდარი, განაცხადების მიღების პროცესი, მოსალოდნელი შედეგებისა და ვალდებულებების შესრულების ინდიკატორები გააცნეს. პროგრამა მიზნად ისახავს საქართველოს მეცნიერების, ტექნოლოგიებისა და ინოვაციების სექტორის ინტერნაციონალიზაციის ხელშეწყობას საერთაშორისო კავშირების დამყარების პროცესში საქართველოს მკვლევართა მხარდაჭერის გზით.

ბათუმის შოთა რუსთაველის სახელმწიფო უნივერსიტეტში „ქართული ლიტერატურისა და ლიტერატურული პროცესის შემსწავლელი სეზონური სკოლა“ გაიხსნა. ღონისძიების ფარგლებში ხუთი დღის განმავლობაში ჩატარდება ლექციები და სემინარები. საქართველოს სხვადასხვა უმაღლესი საგანმანათლებლო დაწესებულების 30 სტუდენტი იმუშავებს ტექსტებზე, ლიტერატურისა და მხატვრული სტილისტიკის პრობლემებზე. ასევე გაიმართება წამახალისებელი კონკურსი საუკეთესო ნამუშევრის გამოსავლენად და გამარჯვებული ნაშრომი გამოქვეყნდება ლიტერატურულ ჟურნალ „არილის“ საიტზე.