ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა და ვალენსიის (ესპანეთი) პოლიტექნიკურ უნივერსიტეტის რექტორის აპარატის უფროსმა პროფესორმა ხუან მიგელ მარტინეს რუბიოსმა შეთანხმების მემორანდუმს მოაწერეს ხელი.
მემორანდუმი ორ უმაღლეს სასწავლებელს შორის გამოცდილების გაზიარებას, აკადემიური პერსონალის ურთიერთგაცვლას და საერთო ინტერესის სფეროებში მრავალხმრივი კვლევების განვითარებას ითვალისწინებს.

2016 წლის 15 ივნისს აჭარის კულტურული მემკვიდრეობის დაცვის სააგენტოს „ძმები ნობელების სახელობის ბათუმის ტექნოლოგიურ მუზეუმში“ გამართულ ღონისძიებაზე მონაწილეობა მიიღეს ტექნოლოგიური ფაკულტეტის ნავთობისა და გაზის მიმართულების წარმომადგენლებმა. ღონისძიების მსვლელობისას ბათუმელ მენავთობეებთან ერთად, ნავთობის სფეროში სამეცნიერო მუშაობის წარმატებულად განხორციელებისათვის მადლობის სიგელით დაჯილდოვდნენ ტექნოლოგიური ფაკულტეტის დეკანი გიზო ფარცხალაძე და ტექნოლოგიებისა და საინჟინრო მენეჯმენტის დეპარტამენტის ხელმძღვანელი ზურაბ მეგრელიშვილი. მათ მუზეუმს სიმბოლური საჩუქარი - საჩუქრად ფაბლაბში დამზადებული მუზეუმის ლოგო და „ნავთობის ხე’’ გადასცეს.

ბათუმის შოთა რუსთაველის სახელმწიფო უნივერსიტეტში FAB LAB BSU -ს გამოფენა-პრეზენტაცია გაიმართა. გამოფენაზე ბსუ-ს ტექნოლოგიური ფაკულტეტის სტუდენტების მიერ საინჟინრო გადაწყვეტილებების მოდელირებით, სასწავლო პროცესში განხორციელებული პროექტები, შენობა-ნაგებობის მაკეტები, მოძრავი მექანიზმები, კონსტრუქციები, დეკორაციული ნივთები და სხვადასხვა სახის სუვენირები იყო წარმოდგენილი. ექსპოზიციაზე ასევე სტუდენტების ბიზნეს სტარტაპის პროექტი -„პირველი ლონგბოარდი საქართველოში“ გამოიფინა

23-27 მაისს, ანტალიაში ევრაზიის ბიომრავალფეროვნების საერთაშორისო სიმპოზიუმი ჩატარდა, სადაც 16 ქვეყნის ასამდე მეცნიერი და მკვლევარი მონაწილეობდა. სიმპოზიუმის მონაწილეებს მიესალმნენ, თურქეთის პამუკალეს უნივერსიტეტის რექტორი პროფესორი ხუსეინ აგჯა, ქ. ანტალიის მუნიციპალიტეტის ვიცე-მერი პროფესორი მუსტაფა თურანი, ბელორუსიის აგრარული უნივერსიტეტის პრორექტორი ლევ ზავოდნიკი, ბათუმის სახელმწიფო უნივერისტეტის პროფესორი, საქართველოს სოფლის მეურნეობის მეცნიერებათა აკადემიის აკადემიკოსი რეზო ჯაბნიძე, აზერბაიჯანის მარდაგიანის კვლევითი ინსტიტუტის დირექტორი, აკადემიკოსი ტოფიკ მამმადოვი, ინდოეთის შივაჯის ბიომრავალფეროვნების უნივერსიტეტის პროფესორი შანდრაკანტ სალუნკჰე, ამერიკის მასაჩუსეტის უნივერსიტეტის დეკანი, პროფესორი ვადე შერბრუკი.

აზერბაიჯანის რესპუბლიკის გენერალური კონსული ქალაქ ბათუმში რაშად ისმაილოვი, აზერბაიჯანის არქიტექტურისა და მშენებლობის უნივერსიტეტის პრორექტორი საერთაშორისო ურთიერთობების დარგში, ნარგიზა აბდულაევა და პროფესორი ფაილ ისმაილოვი ბათუმის შოთა რუსთაველის სახელმწიფო უნივერსიტეტის ტექნოლოგიურ ფაკულტეტს ეწვივნენ. რექტორის მოადგილემ ინგა შამილიშვილმა და ტექნოლოგიური ფაკულტეტის დეკანმა გიზო ფარცხალაძემ სტუმრებს ფაკულტეტის მიღწევები და ტექნოლოგიური ფაკულტეტის ბაზაზე გახსნილი სამრეწველო ინოვაციების ლაბორატორიის მუშაობა გააცნეს. შეხვედრის მსვლელობისას მშენებლობისა და არქიტექტურის დარგში, მხარეებს შორის მჭიდრო თანამშრომლობის პერსპექტივები დაისახა.