ტექნოლოგიური ფაკულტეტის პირველი კურსის სტუდენტებს თანამშრომლობის მემორანდუმის ფარგლებში, რეგიონში მოქმედი სატელეკომუნიკაციო კომპანიების წარმომადგენლები შეხვდნენ. დამსაქმებლებმა, სატელეკომუნიკაციო კომპანია “სილქნეტის“ სერვის-ცენტრის უფროსმა ნუგზარ ნაკაშიძემ, კომპანია “სილქნეტის“ ტელეკომუნიკაციის განვითარებისა და მომსახურების ცენტრის უფროსმა რევაზ კომახიძემ და სატელეკომუნიკაციო კომპანია „TV-ერა“-ს ტექნიკური სამსახურის უფროსმა ნუგზარ ჭედიამ ახალგაზრდებს გააცნეს დარგის მნიშვნელოვანი საკითხები გააცნეს. ისაუბრეს ტელეკომუნიკაციის მიმართულების როლსა და ფუნქციებზე გლობალური სატელეკომუნიკაციო სივრცისა და თანამედროვე ტექნოლოგიების განვითარებაში. შეხვედრის დასასრულს, მხარეები სამომავლო თანამშრომლობის პერსპექტივებზე შეთანხმდნენ.

ბათუმის შოთა რუსთაველს სახელმწიფო უნივერსიტეტის ტექნოლოგიის ფაკულტეტის პროფესორმა რეზო ჯაბნიძემ ბაქოში გამართულ ევრაზიის ქვეყნების ბიომრავალფეროვნებისადმი მიძღვნილ საერთაშორისო სამეცნიერო კონფერენციაში მიიღო მონაწილეობა. ექვსდღიანი სამეცნიერო სესიაზე მოხსენებები წარმოადგინა ცხრა ქვეყნის ორასამდე მკვლევარმა. მომხსენებლებმა განიხილეს ჰიდრობიოლოგიური კვლევების შედეგები.

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა და აჭარის ა.რ. სოფლის მეურნეობის მინისტრმა ზაურ ფუტკარაძემ ქობულეთის მუნიციპალიტეტის აგროსერვის ცენტრში თანამშრომლობის მემორანდუმს მოაწერეს ხელი. დოკუმენტი ითვალისწინებს ერთობლივი სასწავლო-საგანმანათლებლო პროექტების განხორციელებას. მხარეთა შეთანხმებით, ტექნოლოგიური ფაკულტეტის სტუდენტები სტაჟირებასთან ერთად სასწავლო პრაქტიკას გაივლიან სამინისტროში, აგროსერვის ცენტრსა და ლაბორატორიულ კვლევით ცენტრში. ახალგაზრდები შეისწავლიან სასოფლო-სამეურნეო კულტურების მოვლა-მოყვანის, გადამუშავების თანამედროვე ტექნოლოგიებისა და ლაბორატორიული კვლევების უახლეს მეთოდებს.

ხუთდღიანი ვიზიტით ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტს თურქეთის რესპუბლიკის დიჯლეს უნივერსიტეტის პროფესორები ჯუმალ ოზასლანი და ჰალილ ბოლუ ეწვივნენ. სტუმრები შეხვდნენ ტექნოლოგიური ფაკულტეტის დეკანს გიზო ფარცხალაძეს, უნივერსიტეტის საგარეო საქმეთა დეპარტამენტის ხელმძღვანელს ნანა ყურშუბაძეს, აგრარული მიმართულების სტუდენტებს, პროფესორ-მასწავლებლებს, ფიტოპათოლოგიის და ბიომრავალფეროვნების ინსტიტუტის მეცნიერ-თანამშრომლებს. ვიზიტის ფარგლებში თურქმა პროფესორებმა საჯარო ლექციები წაიკითხეს და გაეცნენ ბათუმის ბოტანიკური ბაღისა და ქობულეთის ისპანის ჭაობის ბიომრავალფეროვნებას.

ტექნოლოგიის ფაკულტეტის აგროეკოლოგიისა და სატყეო საქმის სპეციალობების სტუდენტები სასწავლო პრაქტიკით აჭარის სატყეო სააგენტოს მავნებელ დაავადებებთან ბრძოლის სამსახურის ლაბორატორიას ეწვივნენ. ახალგაზრდები გაეცნენ აჭარაში ფართოდ გავრცელებული მბეჭდავი ქერქიჭამიას წინააღმდეგ ბრძოლის ბიოლოგიურ მეთოდს ფერომონული საჭერების გამოყენებით. სტუდენტები ასევე დაეუფლნენ ნაძვის დიდი ლაფანჭამიასთან საბრძოლველად მისი ბუნებრივი მტრის დიდი რიზოფაგუსის ლაბორატორიაში გამრავლების მეთოდს.