„უნივერსიტეტი - სკოლისათვის“ პროექტის ფარგლებში, ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის ბაზაზე არსებულმა ინოვაციურმა ლაბორატორიამ ბათუმის მე-15 საჯარო სკოლის მოსწავლეებს უმასპინძლა. ტექნოლოგიური ფაკულტეტის დეკანმა, პროფესორმა გიზო ფარცხალაძემ და ხარისხის სამსახურის უფროსმა, ასოცირებულმა პროფესორმა გოჩა ჩავლეშვილმა სკოლის მოსწავლეებს სტრუქტურების მოდელირებაზე სადემონსტრაციო ტრენინგი ჩაუტარეს.

ბსუ-ს ტექნოლოგიური ფაკულტეტის ელექტრონიკა, ტელეკომუნიკაცია და ინტერნეტინჟინერიის სპეციალობის სტუდენტები: ხიმშიაშვილი გიორგი, ზოიძე სალომე, ბერიძე თამარი და ველიაძე ქრისტინე (გუნდის ხელმძღვანელი - თემურ კვირტია) „IOT ჰაკათონი - 2022“-ის ნომინაციაში - „კონცეფციასთან შესაბამისობა“ პირველი ხარისხის მედლითა და საპატიო სიგელით დაჯილდოვდნენ. კონკურსი მიზნად ისახავდა საგნების ინტერნეტის პროტოტიპის შექმნას Arduino - ს ბაზაზე, რომელიც მნიშვნელოვნად ზრდის სტუდენტების მოტივაციას, ხელს უწყობს გამოცდილების მიღებას და ცოდნის გაზიარებას. ორდღიანი კონკურსი გუნდური მუშაობის ბაზაზე მიკროპროექტის შექმნასა და შექმნილი პროექტის პრეზენტაციას ითვალისწინებდა.

ბათუმის შოთა რუსთაველის სახელმწიფო უნივერსიტეტის ტექნოლოგიურ ფაკულტეტს ტაჯიკეთის რესპუბლიკის დელეგაცია ეწვია. ვიზიტი მსოფლიო ბანკის მხარდაჭერით შედგა და მიზნად ისახავდა სტარტაპ ეკოსისტემის შესწავლისა და გამოცდილების გაზიარებას. ფაკულტეტის დეკანმა გიზო ფარცხალაძემ დელაგაციის წევრებს ბსუ-ს ფაბლაბში სტუდენტების მიერ დამზადებული შენობათა სტრუქტურები, ქარისა და გაზის ენერგეტიკული დანადგარები, ნავთობის რეზერვუარების მოდელები დაათვალიერებინა და მუშაობის პრინციპები გააცნო. ასევე ფაკულტეტზე არსებულ ინოვაციების ცენტრში „Erasmus+”-ის ფარგლებში სტუდენტების გამარჯვებული პროექტები წარუდგინა.

სრული, 7 - წლიანი აკრედიტაცია მოიპოვა ბათუმის შოთა რუსთაველის სახელმწიფო უნივერსიტეტის „ნავთობისა და გაზის მოპოვების, ტრანსპორტირებისა და შენახვის ტექნიკა და ტექნოლოგია“ სამაგისტრო საგანმანათლებლო პროგრამამ. ვულოცავთ სტუდენტებსა და პროფესორ-მასწავლებლებს ამ მნიშვნელოვან გამარჯვებას.

ბსუ-ს ტექნოლოგიურ ფაკულტეტის ინოვაციების ცენტრში, „ერაზმუს+“-ის RURD-ის პროექტის ფარგლებში სამუშაო შეხვედრა გაიმართა. სტუდენტები და პროფესორ-მასწავლებლები გაეცნენ ლიეტუვას ვიტაუტას მაგნუსის უნივერსიტეტსა და სანტიაგო დე კომპოსტელას უნივერსიტეტში მიღებულ გამოცდილებას. პრეზენტაცია მომზადდა ლიეტუვას ვიტაუტას მაგნუსის უნივერსიტეტის ცოდნისა და ტექნოლოგიების გადაცემის ცენტრის გამოცდილებაზე დაყრდნობით, რომელიც გაიზიარა ტექნოლოგიური ფაკულტეტის ინოვაციების ცენტრმა სამომავლო საქმიანობისთვის.