ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და გერმანიის მასპინძლობის საერთაშორისო ინსტიტუტის ხელმძღვანელმა გერალდ ვიტცელმა თანამშრომლობის მემორანდუმს მოაწერეს ხელი. ხელშეკრულების ფარგლებში, ყოველწლიურად, ტურიზმის ფაკულტეტის 100-მდე სტუდენტი სამთვიან ანაზღაურებად პრაქტიკას გერმანიის მაღალი კლასის სასტუმროებში გაივლის და გაეცნობა სასტუმროს ძირითადი სტრუქტურული ერთეულის ფუნქციონირებას.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტისა და გერმანიის ექსპერტთა სამსახურის (Senior Experten Service) თანამშრომლობის ფარგლებში, ტურიზმის ფაკულტეტზე მოწვეული იყო ტურიზმის ექსპერტი (CIM/SES), ბსუ-ს საპატიო დოქტორი და გერმანიის მასპინძლობის საერთაშორისო ინსტიტუტის ხელმძღვანელი, პროფესორი გერალდ ვეტცელი. ბატონმა გერალდმა და ტურიზმის ფაკულტეტის ასისტენტ პროფესორმა თამარ ბერიძემ ტურიზმის ფაკულტეტის მესამე სასწავლო წლის სტუდენტებისათვის „სპეციალურ ღონისძიებათა მენეჯმენტის“ კურსის ფარგლებში სამუშაო შეხვედრა ჩაატარეს.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტი ტურიზმისა და სასტუმრო აღჭურვილობის მე-13 საერთაშორისო ტურისტულ გამოფენაში „EXPO BATUMI TRAVEL - 2022“ ღებულობს მონაწილეობას. ფაკულტეტის სტუდენტებმა და პროფესორ-მასწავლებლებმა დამთვალიერებლებს უნივერსიტეტის სასწავლო-საგანმანათლებლო პროგრამები, სტუდენტური ცხოვრება გააცნეს და ტურისტული პროდუქტები წარუდგინეს. გამოფენა სამ დღეს გაგრძელდება და მასში 80-მდე ადგილობრივი და საერთაშორისო ტურისტული კომპანია მიიღებს მონაწილეობას.

ისტორიულ ტაო-კლარჯეთში ტრადიციული სასწავლო-პრაქტიკული ტური მოეწყო. ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 60-მდე სტუდენტმა სამდღიანი მოგზაურობის ფარგლებში ხახულის, ოშკის, იშხანის, ოთხთას, პარხალის, დოლისყანის, ტბეთის და შატბერდის ტაძრები და სამონასტრო კომპლექსები მოინახულეს. საზღვრებს მიღმა დარჩენილ ისტორიულ საქართველოში ტური კულტურული ტურიზმისა და საექსკურსიო საქმის სასწავლო კურსების ფარგლებში განხორციელდა და მიზნად ისახავდა სტუდენტების ცოდნის გაღრმავებას და პროფესიული უნარ-ჩვევების გამომუშავებას. ფაკულტეტი ბსუ-ს ადმინისტრაციის მხარდაჭერით მსგავსი ტიპის აქტივობას 10 წლის მანძილზე ახორციელებს და მომავალშიც გეგმავს.

ბათუმის შოთა რუსთველის სახელმწიფო უნივერსიტეტის ტურიზმის ფაკულტეტის 80 სტუდენტი მიზნობრივი პროგრამის „სტუდენტების საერთაშორისო პრაქტიკა გერმანიის ტურიზმის ინდუსტრიის ორგანიზაციებში“ ფარგლებში, სამთვიან პრაქტიკას გერმანიის მაღალი კლასის სასტუმროებში გაივლის და გაეცნობა სასტუმროს ძირითადი სტრუქტურული ერთეულის ფუნქციონირებას. საერთაშორისო პრაქტიკა გერმანიის შვერინის ბალტიკის კოლეჯსა და ბათუმის შოთა რუსთაველის სახელმწიფო უნივერსიტეტს შორის გაფორმებული მემორანდუმისა და აჭარის ავტონომიური რესპუბლიკის მთავრობის პროგრამული დაფინანსების საფუძველზე ხორციელდება.