ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის ასისტენტ პროფესორი ნინო დევაძე 2022 წლის 13-19 თებერვალს იმყოფებოდა ვალენსიის ტექნოლოგიურ უნივერსიტეტში (UPV), ესპანეთის „ერაზმუს+“-ის აკადემიური პერსონალის გაცვლითი პროგრამის ფარგლებში. ნინო დევაძემ ერთი კვირის განმავლობაში სემინარები ჩაატარა ტურიზმის მდგრადი განვითარების აქტუალურ საკითხებზე ტურიზმის ბაკალავრიატის საგანმანათლებლო პროგრამის სტუდენტებისთვის.

გერმანიის გლობალური განათლების საერთაშორისო ქსელის (ASA GLEN) წარმომადგენლებმა ტურიზმის ფაკულტეტის ბაკალავრიატისა და მაგისტრატურის სტუდენტებთან კარიერული დაგეგმვის, პერსონალური უნარების განვითარებისა და საერთაშორისო მობილობის თემებზე ონლაინ შეხვედრა ჩაატარეს. შეხვედრა მიზნად ისახავდა სტუდენტებისთვის მიმდინარე რეგიონულ და გლობალურ საკითხებთან და პროექტებთან დაკავშირებული ინფორმაციის გაცნობას. ტურიზმის ფაკულტეტი ASA GLEN-ის საერთაშორისო ქსელთან 2011 წლიდან წარმატებით თანამშრომლობს.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტი ბაკალავრიატისა და მაგისტრატურის საგანმანათლებლო პროგრამების სტუდენტთათვის აცხადებს კონკურსს ვახუშტი ბატონიშვილის (ბაკალავრიატში) და ექვთიმე თაყაიშვილის (მაგისტრატურაში) სახელობითი სტიპენდიების მოსაპოვებლად.

აჭარის ა.რ. ტურიზმისა და კურორტების დეპარტამენტმა ბათუმის შოთა რუსთაველის სახელმწიფო უნივერსიტეტს USAID-ის ეკონომიკური უსაფრთხოების პროგრამის ფარგლებში, ფრინველებზე დაკვირვების სპეციალური სახელმძღვანელო გადასცა. სახელმძღვანელო დიდ დახმარებას გაუწევს ამ სფეროთი დაინტერესებულ პირებს და ხელს შეუწყობს ავიტურიზმის განვითარებას საქართველოში. ღონისძიებას ესწრებოდნენ USAID-ის საქართველოს მისიის დირექტორის მოადგილე დევიდ ჰოფმანი, აჭარის ა.რ. ტურიზმისა და კურორტების დეპარტამენტის თავმჯდომარე თინათინ ზოიძე, ბსუ-ს რექტორის მოადგილე თამარ სირაძე, ბსუ-ს ტურიზმის ფაკულტეტის დეკანის მოვალეობის შემსრულებელი ირაკლი კორძაია, USAID-ის საქართველოს ოფისის, USAID-ის ეკონომიკური უსაფრთხოების პროგრამის, აჭარის ტურიზმის დეპარტამენტისა და ეკოტურიზმის ასოციაციის წარმომადგენლები.

ტურიზმის ფაკულტეტის სტუდენტები სასწავლებლად „Erasmus+“-ის საერთაშორისო გაცვლითი პროგრამის ფარგლებში, პორტუგალიასა და საბერძნეთში გაემგზავრნენ. ტურიზმის საბაკალავრო საგანმანათლებლო პროგრამის მესამე კურსის სტუდენტი მარიამ ირემაძე 2021-2022 სასწავლო წლის შემოდგომის სემესტრში ევორას უნივერსისტში ისწავლის, ხოლო ტურიზმის მენეჯმენტის სამაგისტრო პროგრამის მეორე კურსის სტუდენტი თინათინ დუმბაძე და ტურიზმის საბაკალავრო პროგრამის მეოთხე კურსის სტუდენტი მარიამ ბოლქვაძე ჰელენიკის ხმელთაშუაზღვის უნივერსიტეტში.