5-6 ივნისს ერაზმუს+-ის ადმინისტრაციული პერსონალის გაცვლითი პროგრამის ფარგლებში ბათუმის შოთა რუსთაველის სახელმწიფო უნივერსიტეტში საფრანგეთის, რუანის უნივერსიტეტის საერთაშორისო ურთიერთობებისა და თანამშრომლობის დეპარტამენტის მობილობის მართვის კოორდინატორი სონია ფაფინი იმყოფებოდა. ვიზიტის ფარგლებში დაიგეგმა 2019-2020 სასწავლო წლისთვის ქართველი და ფრანგი სტუდენტების მობილობა და სტაჟირების პროგრამის ხელშეწყობა. შეხვედრა ბსუ-ს ტურიზმის ფაკულტეტის და საგარეო ურთიერთობათა და სტრატეგიული განვითარების დეპარტამენტის ორგანიზებით გაიმართა.

სამხრეთ-აღმოსავლეთ ნორვეგიის უნივერსიტეტის (USN) ბიზნეს კომუნიკაციების ასისტენტ პროფესორმა დევიდ ისაკსენმა ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებისთვის ლექცია ჩაატარა თემაზე: „აკადემიური წერა და არგუმენტაცია“. ლექციის თემატიკა მოიცავდა ციტირების წესებს, კვლევისა და პუბლიკაციის პროცესს, არგუმენტაციის სტრატეგიებსა და ეთიკის საკითხებს. სწავლება ნორვეგიის საერთაშორისო განათლების თანამშრომლობის სააგენტოსა და სამხრეთ-აღმოსავლეთ ნორვეგიის უნივერსიტეტის მხარდაჭერით განხორციელდა.

მე-12 საერთაშორისო ტურიზმისა და სასტუმრო აღჭურვილობის და მე-2 სამედიცინო ტურიზმის გამოფენის ფარგლებში გამართული ერთთვიანი სტაჟირების პროგრამა ტურიზმის ფაკულტეტის 40-მდე სტუდენტმა გაიარა. ახალგაზრდები გაეცნენ საერთაშორისო გამოფენის ჩატარების სპეციფიკას, მნიშვნელობას და მონაწილოება მიიღეს ღონისძიების საორგანიზაციო საკითხებში. სტაჟირების პროგრამის დასასრულს, ბსუ-ს ტურიზმის ფაკულტეტის სტუდენტებისთვის მოეწყო ექსკურსია ქალაქ ტრაპიზონში. ექსკურსიის ფარგლებში სტუდენტებმა დაათვალიერეს ქალაქის ღერშესანიშნაობები „მცირე აიასოფია“ და „უზუნ გოლი“. ახალგაზრდებმა ასევე მოინახულეს ავრაზიის უნივერსიტეტის სამედიცინო და გასტრონომიული ლაბორატორიები, ტურიზმის პროფესიული სასწავლებელი, შეხვდნენ საქართველოს გენერალურ კონსულს ტრაპიზონში ავთანდილ მიქაცაძეს და თურქეთის რესპუბლიკის ტურისტული სააგენტოების გაერთიანების წარმომადგენლებს.

ბსუ-ს ტურიზმის ფაკულტეტსა და გერმანიის ექსპერტთა სამსახურის (SES) თანამშრომლობის ფარგლებში, მოწვეულმა ექსპერტმა ულრიხ ტროსიენმა ორკვირიანი მასტერკლასი ჩაატარა თემაზე: „ტურიზმის სფეროში პერსონალის კვალიფიკაცია და კულტურათაშორისი კომუნიკაცია”. მასტერკლასი ტურიზმის ფაკულტეტის იმ სტუდენტებისთვის მოეწყო, რომლებიც სამი თვის განმავლობაში გერმანიიაში სტაჟირებისთვის გაემგზავრებიან. გერმანიის ექსპერტთა სამსახური (SES - senior experten service) წარმოადგენს გერმანიაში დაფუძნებულ არასამთავრობო და არაკომერციულ ორგანიზაციას, რომელიც აერთიანებს დარგის ექსპერტებს განვითარებად ქვეყნებში განათლების მხარდასაჭერად.

ბათუმის შოთა რუსთველის სახელმწიფო უნივერსიტეტის ტურიზმის ფაკულტეტის ტურიზმის დეპარტამენტის ხელმძღვანელმა, პროფესორმა ანზორ დევაძემ და ხარისხის უზრუნველყოფის სამსახურის ხელმძღვანელმა, ასისტენტ პროფესორმა ირაკლი კორძაიამ 23-24 მაისს მონაწილეობა მიიღეს პოლტავის იური კონდრატიუკის სახელობის ეროვნულ ტექნიკურ უნივერსიტეტის III საერთაშორისო სამეცნიერო-პრაქტიკულ კონფერენციაში „სახელმწიფოს ეკონომიკური განვითარება და მისი სოციალური სტაბილურობა’’. პროფესორმა ანზორ დევაძემ სესიაზე მოხსენება წაიკითხა თემაზე: „საერთაშორისო ტურისტული ბაზრის განვითარების პრობლემები საქართველოში“, ხოლო ასისტენტ პროფესორმა ირაკლი კორძაიამ - „საერთაშორისო ტურისტული ბაზარი, როგორც სოციალურ ურთიერთობათა სისტემის შემადგენელი ნაწილი’’.