ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის მე-4 კურსის სტუდენტებს აჭარის ავტონომიური რესპუბლიკის ტურისტული პროდუქტების განვითარების სააგენტოს დირექტორი თინათინ ზოიძე შეხვდა. სტუმარმა ისაუბრა სააგენტოს საქმიანობაზე, მათ მიერ შემუშავებულ ახალ ტურისტულ მარშრუტებსა და პრიორიტეტულ მიმართულებებზე.

სამხრეთ-აღმოსავლეთ ნორვეგიის უნივერსიტეტის პროფესორმა, ბათუმის შოთა რუსთაველის სახელმწიფო უნივერსიტეტის საპატიო დოქტორმა თეიმურაზ აბესაძემ ტურიზმის ფაკულტეტის სტუდენტებისათვის ლექციები ჩაატარა თემაზე: „სოფლად მდგრადი ტურიზმის განვითარების შესაძლებლობები და საერთაშორისო გამოცდილება". შეხვედრის ფარგლებში ახალახალგაზრდები სოფლად მდგრადი ტურიზმის განვითარების ნორვეგიულ და საერთაშორისო გამოცდილებას გაეცნენ. სტუდენტებმა აჭარაში სოფლად მდგრადი ტურიზმის განვითარებასთან დაკავშირებით ბაზრის მცირე კვლევა ჩაატარეს და კვლევის საფუძველზე ახალი ტურისტული პროდუქტი შექმნეს, რომელიც პრეზენტაციის სახით წარმოადგინეს.შეხვედრის დასასრულს, პროფესორმა თეიმურაზ აბესაძემ სტუდენტების შეკითხვებს უპასუხა.

ბათუმის შოთა რუსთველის სახელმწიფო უნივერსიტეტის ტურიზმის ფაკულტეტს გერმანიის აკადემიური გაცვლის სამსახურის (DAAD) წარმომადგენელი ბერტოლდ ლინდერი ეწვია. სტუმარმა შეხვედრები გამართა ტურიზმის ფაკულტეტის დეკანთან როსტომ ბერიძესთან, პროფესორ-მასწავლებლებთან და სტუდენტებთან. ბერტოლდ ლინდერმა შეხვედრებზე DAAD-ის პროგრამებზე, აღნიშნული პროგრამით გერმანიაში სწავლისა და კვლევის შესაძლებლობებსა და სამომავლო ურთიერთობებზე ისაუბრა.

ბათუმის შოთა რუსთაველის სახელმწიფო უნივერსიტეტის საპატიო დოქტორმა კურტ ჰეინც რეიცმა ტურიზმის ფაკულტეტის სტუდენტებისათვის ლექციების ციკლი დაიწყო ტურიზმის აქტუალურ საკითხებზე. გერმანელი ექსპერტი 18 დღის განმავლობაში ლექციებს წაიკითხავს თემებზე: „ტურიზმის და მასპინძლობის მენეჯმენტი“, „საერთაშორისო ტურიზმის განვითარების თანამედროვე ტენდენციები“ და „საქართველოში სასტუმრო ბიზნესის განვითარება“. ახალგაზრდები ამ პერიოდის განმავლობაში დარგის სიახლეებს გაეცნობიან და პროფესიულ უნარ-ჩვევებს გაიუმჯობესებენ.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტზე სასტუმრო „შერატონ ბათუმის’’ წარმომადგენლები ტურიზმის ფაკულტეტის პირველკურსელებს შეხვდნენ. შეხვედრა სტუდენტებთან პროექტის - „იმოგზაურე მერიოტთან ერთად“ ფარგლებში გაიმართა.
სასტუმრო „შერატონის" გენერალურმა მენეჯერმა, აპოსტოლოს პაპატოლიოსმა ბსუ-ს სტუდენტებს აჭარაში სასტუმრო ბიზნესის სამომავლო პერსპექტივებზე, სასტუმროში დასაქმების შესაძლებლობებზე და მოთხოვნებზე ესაუბრა.