ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებს სასტუმრო „Paragraph Resort & Spa Shekvetili, Autograph Collection”-ის ადამიანური რესურსების მართვის დეპარტამენტის ხელმძღვანელი დავით ყიფიანი შეხვდა. სასტუმროს წარმომადგენელი სტუდენტებს სასტუმრო ინდუსტრიის საერთაშორისო გამოცდილებაზე, საქართველოში მის განვითარებაზე და დასაქმების შესაძლებლობებზე ესაუბრა. დღეისათვის აღნიშნულ სასტუმროში ტურიზმის ფაკულტეტის ათეულობით სტუდენტია დასაქმებული და სასტუმროს ადმინისტრაცია სურვილის გამოთქვამს, არსებული ვაკანტური ადგილებიც ტურიზმის ფაკულტეტის სტუდენტებით დაკომპლექტდეს.

ტურიზმის ფაკულტეტისა და სამხრეთ-აღმოსავლეთ ნორვეგიის უნივერსიტეტის ორგანიზებით ერთობლივი პროექტის „მდგრადი ტურიზმი: სოფლად მეწარმეობა და კულტურული მემკვიდრეობა. ყირგიზეთს, საქართველოსა და ნორვეგიას შორის განათლების სფეროში თანამშრომლობა“ ფარგლებში ერთწლიანი მუშაობის შემაჯამებელი შეხვედრა გაიმართა. ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის, სამხრეთ-აღმოსავლეთ ნორვეგიის უნივერსიტეტის, ქუთაისის აკაკი წერეთლის სახელმწიფო უნივერსიტეტისა და ბათუმის საზღვაო აკადემიის წარმომადგენლებმა შეხვედრაზე მიმდინარე წლის საქმიანობასთან და 24-30 ივნისს დაგეგმილ საზაფხულო სკოლასთან დაკავშირებული საკითხები განიხილეს.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტს, სამუშაო ვიზიტით, გერმანიის „ბალტიკის კოლეჯის“ ტურიზმისა და მასპინძლობის ინსტიტუტის ხელმძღვანელი, ბსუ-ს საპატიო დოქტორი, პროფესორი გერალდ ვეტცელი ეწვია.

ბელგიის სამეფოს ვალონიის რეგიონის ტურიზმის კომისარიატის წარმომადგენელი მიშელ იანოვსკი ბსუ-ს რექტორის მოადგილეს სასწავლო დარგში თამარ სირაძეს, ტურიზმის ფაკულტეტის დეკანს როსტომ ბერიძესა და ფრანგული ენის მიმართულების პროფესორებს შეხვდა.

მიშელ იანოვსკი გაეცნო უნივერსიტეტის ისტორიას, საგანმანათლებლო პროგრამებს, სწავლის პირობებსა და ორ რეგიონს შორის განათლების სფეროში სამომავლო თანამშრომლობის პერსპექტივაზე ისაუბრა. შეხვედრაზე, ასევე, დაიგეგმა ერთობლივი გაცვლითი პროგრამების ამოქმედება.

მიშელ იანოვსკი უკვე წლებია მუშაობს აჭარის ა.რ. ტურიზმისა და კურორტების დეპარტამენტთან აჭარისა და ვალონიის რეგიონებს შორის თანამშრომლობის საკითხებზე.

ტურიზმის ფაკულტეტის ადმინისტრაციისა და სტუდენტური თვითმართველობის ორგანიზებით ინტელექტუალური თამაში „რა? სად? როდის?’’ ჩატარდა. შეჯიბრში ჩართული 12 გუნდიდან I, II და III ადგილი „FOUR STAR’’-მა, „ფენიქს“-მა და „კაზგუ’’-მ გადაინაწილეს. გამარჯვებულებს ფაკულტეტის დეკანმა როსტომ ბერიძემ საჩუქრად წიგნები გადასცა, ხოლო ყველაზე წარმატებულ „FOUR STAR’’-ის გუნდის წევრები კი 28 დეკემბერს ფაკულტეტის მიერ ორგანიზებულ საახალწლო წვეულებაზე არიან მიწვეული.