ბათუმის სახელმწიფო უნივერსიტეტი ჩართულია საერთაშორისო პროექტში „ინოვაცია, ინკლუზიური განათლება და ხარისხი" (პროექტის აღმასრულებელი დირექტორი, თამარ სანიკიძე). 6-7 სექტემბერს თბილისში, პროექტის ქვეპროგრამის,-„უმაღლესი განათლების ინტერნაციონალიზაციის ხელშეწყობა“, - ფარგლებში, ფართომასშტაბიანი სამუშაო შეხვედრა ჩატარა. შეხვედრას ესწრებოდა ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსი, პროფესორი მარინა გიორგაძე.

ბათუმის შოთა რუსთაველის სახელმწიფო უნივერსიტეტი გთავაზობთ ევროკომისიის მიერ დაფინანსებულ „ერაზმუს+"-ის გაცვლით პროგრამას 2023 – 2024 სასწავლო წლის გაზაფხულის სემესტრისთვის თესალონიკის არისტოტელეს უნივერსიტეტში https://www.auth.gr/en/, საბერძნეთი.

2023 წლის 29 აგვისტო - 1 სექტემბერს, „ერაზმუს+“-ის ადმინისტრაციული პერსონალის გაცვლითი პროგრამის ფარგლებში, ბსუ-ში ვიტაუტას მაგნუს უნივერსიტეტის საერთაშორისო ურთიერთობების დეპარტამენტის დირექტორი ილონა კაზლასკაიტე იმყოფებოდა. ილონა კაზლასკაიტე ერთი კვირის განმავლობაში ბსუ-ს სტრატეგიული განვითარებისა და საგარეო ურთიერთობათა დეპარტამენტის მუშაობის სპეციფიკას ეცნობოდა.

ბათუმის შოთა რუსთველის სახელმწიფო უნივერსიტეტის 19 სტუდენტი გაცვლითი პროგრამის ფარგლებში ევროპის წამყვან უნივერსიტეტებში სასწავლებლად გაემგზავრება. სხვადასხვა ფაკულტეტის სტუდენტები ერთი სემესტრის განმავლობაში განათლებას მიიღებენ გერმანიის, ავსტრიის, საფრანგეთის, ესპანეთის, ბულგარეთის, სლოვაკეთის, პოლონეთისა და ხორვატის უნივერსიტეტებში. ბსუ-ს რექტორის მოადგილები თამარ სირაძე და ანზორ ბერიძე, ადმინისტრაციის ხელმძღვანელი მერაბ დიასამიძე და ხარისხის უზრუნველყოფის სამსახურის უფროსი ვლადიმერ ღლონტი სტუდენტებს შეხვდნენ, გამარჯვება მიულოცეს, სერტიფიკატები გადასცეს და წარმატებები უსურვეს.

ბათუმის შოთა რუსთაველის სახელმწიფო უნივერსიტეტსა და რეჯეფ ტაიფ ერდოღანის უნივერსიტეტს (თურქეთის რესპუბლიკა) შორის გაფორმებული თანამშრომლობის მემორანდუმის ფარგლებში, ბსუ-ს თურქოლოგიის საბაკალავრო საგანმანათლებლო პროგრამის 7 სტუდენტი მონაწილეობს რეჯეფ ტაიფ ერდოღანის უნივერსიტეტის მიერ ორგანიზებულ თურქული ენის საზაფხულო სკოლაში. საზაფხულო სკოლა 7 აგვისტოს დაიწყო და გაგრძელდება 20 დღის განმავლობაში. საზაფხულო სკოლა სტუდენტებს სთავაზობს თურქული ენის გაკვეთილებს, სხვადასხვა აქტივობას, კულტურულ და სოციალურ ღონისძიებებს.

თბილისის სახელმწიფო უნივერსიტეტსა და ბრიტანულ უნივერსიტეტში, უმაღლესი განათლების ინტერნაციონალიზაციის ხელშეწყობის მიზნით, საერთაშორისო Excellence School-ი ჩატარდა. ღონისძიების თემატიკა მოიცავდა განათლების, ჰუმანიტარული და სოციალური მეცნიერებების მიმართულებით შემდეგ საკითხებს: საპროექტო შეთავაზებების შემუშავება საგრანტო კონკურსებისათვის, საკონკურსო პროექტების მართვის საუკეთესო პრაქტიკები და საკონკურსო პროექტების ფინანსური ასპექტები. საერთაშორისო სკოლაში მონაწილეობდნენ დოქტორანტები და ახალგაზრდა მკვლევრები საქართველოს და საერთაშორისო უმაღლესი საგანმანათლებლო დაწესებულებებიდან. ღონისძიებაში ბსუ-დან ჩართული იყვნენ, სტრატეგიული განვითარებისა და საერთაშორისო ურთიერთობების დეპარტამენტის მთავარი სპეციალისტი ნუნუ ჯაფარიძე, იურიდიული და სოციალურ მეცნიერებათა ფაკულტეტის დეკანის მოადგილე, სალომე კარალიძე და თარგმნისა და ინტერდისციპლინარული კვლევების ცენტრის სპეციალისტი თამთა ნაგერვაძე.

21-28 ივლისს, ბსუ-ს სამეცნიერო კვლევების სამსახურის უფროსი, ზუსტ მეცნიერებათა და განათლების ფაკულტეტის მოწვეული უფროსი მასწავლებელი თამარ მაჭუტაძე ERASMUS + აკადემიური მობილობის ფარგლებში ბუქარესტის უნივერსიტეტში იმყოფებოდა. ვიზიტის ფარგლებში შეხვედრა გაიმართა ფილოლოგიის ფაკულტეტის ადმინისტრაციასთან, დაიგეგმა მომავალი თანამშრომლობის გეგმები. ვიზიტის ფარგლებში ჩატარდა სალექციო კურსები, ხოლო შემაჯამებელი შეხვედრა ფაკულტეტის დეკანის მოადგილის - კატალინ კონსტანტინის ორგანიზებით გაიმართა ბუქარესტის მუნიციპალურ მუზეუმში, სადაც თამარ მაჭუტაძემ გააკეთა მოხსენება საქართველოს კულტურული მემკვიდრეობის შესახებ.

17-21 ივლისს „ერაზმუს+“-ის ადმინისტრაციული პერსონალის გაცვლითი პროგრამის ფარგლებში, ბათუმის შოთა რუსთაველის სახელმწიფო უნივერსიტეტს ვროცლავის ჯანმრთელობისა და სპორტის მეცნიერებათა უნივერსიტეტის საერთაშორისო ოფისის წარმომადგენელი მონიკა კლეშჩი სტუმრობდა. ერთი კვირის განმავლობაში მონიკა კლეშჩი ეცნობოდა სტრატეგიული განვითარებისა და საგარეო ურთიერთობათა დეპარტამენტის მუშაობის სპეციფიკას, ასევე, ის შეხვდა ზუსტ მეცნიერებათა და განათლების ფაკულტეტის დეკანს, პროფესორ ლელა თურმანიძეს მომავალი საერთო საქმიანობის დასაგეგმად.