ბათუმის შოთა რუსთაველის სახელმწიფო უნივერსიტეტში სტუდენტების ნახატების გამოფენა გაიხსნა. დამთვალიერებელს ერთი კვირის განმავლობაში შესაძლებლობა ექნება გაეცნოს სხვადასხვა უმაღლესი საგანმანათლებლო დაწესებულების ხუთი სტუდენტის 30-მდე ნამუშევარს. ღონისძიება მიზნად ისახავს თვითნასწავლი მხატვრების პროფესიული განვითარების ხელშეწყობასა და მათი შემოქმედების პოპულარიზაციას. გამოფენა უმაღლესი საგანმანათლებლო დაწესებულების სტუდენტთა მომსახურებისა და მხარდაჭერის სამსახურისა და სტუდენტური ასოციაციის ორგანიზებით იმართება.

საქართველოს საუნივერსიტეტო სპორტის ფედერაციის „საუნივერსიტეტო თასი - 2015“-ის ტურნირის მორიგი მატჩი ბათუმის შოთა რუსთაველის სახელმწიფო უნივერსიტეტის გამარჯვებით დასრულდა. უმაღლესი საგანმანათლებლო დაწესებულების ფუტსალის ნაკრებმა თავისუფალი უნივერსიტეტის გუნდი დაამარცხა ანგარშით 2:1. ბსუ-ს სტუდენტები „საუნივერსიტეტო თასი - 2015“-ის მოსაპოვებლად შეხვედრას ნახევარ ფინალში თბილისში, 14 დეკემბერს, 16:00 საათზე თბილისის ივანე ჯავახიშვილის სახელმწიფო უნივერსიტეტის ნაკრებთან გამართავენ.

ბათუმის შოთა რუსთაველის სახელმწიფო უნივერსიტეტის სტუდენტური თეატრის დასმა მაყურებელს მორიგი სპექტაკლი შესთავაზა. უნივერსიტეტის სცენაზე ფრანგული პიესის „ოჯახური იდილიის“ პრემიერა შედგა. რეჟისორები გიორგი ფირცხალაიშვილი და როინ დვალი პიესაზე არაპროფესიონალ მსახიობებთან ერთად ორი თვის განმავლობაში მუშაობდნენ. სხვადასხვა ფაკულტეტის სტუდენტებმა: მარიამ ქიქავამ, თამუნა გორგოშაძემ, ნინო ჩხიკვაძემ, მიხეილ ჯინჭარაძემ და ირაკლი ქათამაძემ ერთმოქმედებიან პიესაში ფრანგული ოჯახის სასიყვარულო ისტორიები წარმოადგინეს. სპექტაკლი ბსუ-ს სტუდენტთა მომსახურებისა და მხარდაჭერის სამსახურის კულტურის ცენტრის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტში "სტუდენტურ-ახალგაზრდული დღეები-2015"-ის მონაწილე სტუდენტებთან შეხვედრა გაიმართა. უმაღლესი საგანმანათლებლო დაწესებულების რექტორის მოვალეობის შემსრულებლმა მერაბ ხალვაშმა ახალგაზრდებს მადლობა გადაუხადა საუნივერსიტეტო ცხოვრებაში აქტიური მონაწილეობისათვის და სიგელები გადასცა. ბსუ-მ რამდენიმე დღის წინ ახალგაზრდული ფესტივალის გრან-პრი მოიპოვა. სხვადასხვა ფაკულტეტის სტუდენტებმა საკუთარი შესაძლებლობები შემოქმედებით, კულტურულ და სპორტულ შეჯიბრებებში წარმოაჩინეს. უმაღლესი საგანმანათლებლო დაწესებულების გუნდებმა პირველი ადგილი დაიკავეს მხიარულ სტარტებსა და მინიფეხბურთში.

საქართველოს საუნივერსიტეტო სპორტის ფედერაციის „საუნივერსიტეტო თასი - 2015“-ის ტურნირის მეორე შეხვედრაზე ბათუმის შოთა რუსთაველის სახელმწიფო უნივერსიტეტის ფუტსალის ნაკრებმა წარმატებულად იასპარეზა. უმაღლესი საგანმანათლებლო დაწესებულების გუნდი ამჯერად, თბილისის სასწავლო უნივერსიტეტის ნაკრებს დაუპირისპირდა და მატჩი ბსუ-ს გამარჯვებით, ანგარიშით 16:5 დასრულდა. უნივერსიტეტის სპორტსმენები „საუნივერსიტეტო თასი - 2015“-ის მოსაპოვებლად მორიგ შეხვედრას 27 ნოემბერს გრიგოლ რობაქიძის სახელობის უნივერსიტეტთან გამართავს.