აჭარის რეგიონული სასკოლო ჩემპიონატი ფუტსალში #1 საჯარო სკოლის გუნდის გამარჯვებით დასრულდა. ფინალურ შეხვედრაში კავკასიის ბიზნესის სკოლა #1 საჯარო სკოლასთან დამარცხდა ანგარიშით 1:3. ჩემპიონატი 15 თებერვალს ბათუმის შოთა რუსთაველის სახელმწიფო უნივერსიტეტისა და აჭარის რეგიონალური ფუტსალის ასოციაციის ორგანიზებით დაიწყო და პირველობისთვის ბათუმის საჯარო და კერძო სკოლების 38 ნაკრები იბრძოდა. გამარჯვებული გუნდები საქართველოს ჩემპიონატში მიიღებენ მონაწილეობას. უნივერსიტეტის ადმინისტრაციის მხარდაჭერით, გამარჯვებული გუნდის წევრები ბსუ-ს სტუდენტებთან ერთად საქართველო-გერმანიის მატჩს დაესწრებიან. უმაღლესი საგანმანათლებლო დაწესებულება ულოცავს #1 საჯარო სკოლის ნაკრებს გამარჯვებას და წარმატებებს უსურვებს.

ბათუმის შოთა რუსთაველის სახელმწიფო უნივერსიტეტისა და აჭარის რეგიონალური ფუტსალის ასოციაციის ორგანიზებით აჭარის რეგიონული სასკოლო ტურნირი გაიხსნა ფუტსალში. ჩემპიონატი 15 თებერვალს დაიწყება და პირველობისთვის ბათუმის საჯარო და კერძო სკოლების 38 ნაკრები იბრძოლებს. ტურნირის გახსნის შემდეგ, უმაღლესი საგანმანათლებლო დაწესებულების ფუტსალის ნაკრებმა შეჯიბრის მონაწილეებისათვის საჩვენებელი თამაში და მასტერკლასი გამართა. ღონისძიება აჭარის განათლების, კულტურისა და სპორტის სამინისტროსა და აჭარის სპორტისა და ახალგაზრდობის საქმეთა დეპარტამენტის მხარდაჭერით ტარდება. გამარჯვებული გუნდები საქართველოს ჩემპიონატში მიიღებენ მონაწილეობას.

ბათუმის შოთა რუსთაველის სახელმწიფო უნივერსიტეტის სტუდენტთა სამეცნიერო ცენტრის, სტუდენტთა მხარდაჭერისა და მომსახურების სამსახურის, ისტორიის, არქეოლოგიის და ეთნოლოგიის დეპარტამენტის ერთობლივი პროექტის „მოგზაურობა საქართველოს ისტორიულ რუკაზე“ ეგიდით, შალვა რადიანის სახელობის ეთნოგრაფიულ მუზეუმში კონფერენცია გაიმართა. სამეცნიერო სესიაზე უნივერსიტეტის ბაკალავრიატისა და დოქტორანტურის საგანმანათლებლო საფეხურის სტუდენტებმა და პროფესორ-მასწავლებლებმა მოხსენებები წარმოადგინეს გურია-აჭარის ისტორიულ ურთიერთობებზე. კონფერენციის მონაწილეებმა ასევე გაიხსენეს ფილოლოგიის მეცნიერებათა დოქტორი, კრიტიკოსი, ლიტერატურათმცოდნე, პროფესორი შალვა რადიანი.

2008 წლის რუსეთ-საქართველოს ომში დაღუპული გმირის, ბსუ-ს სტუდენტის, ვახტანგ გორგასლის I ხარისხის ორდენოსან ამირან მამალაძის ხსოვნისადმი მიძღვნილი ჩემპიონატი ჩატარდა ფუტსალში. ტურნირი ოლიმპიური სისტემით ჩატარდა და მასში ბათუმის შოთა რუსთაველის სახელმწიფო უნივერსიტეტის სტუდენტებით დაკომპლექტებული 32 გუნდი მონაწილეობდა. ფინალურ შეხვედრაში ერთმანეთს გუნდები „NIGGAS”-ი და „ტურიზმი“ დაუპირისპირდა. პირველობა ანგარიშით 5:3, ტურიზმის ფაკულტეტის სტუდენტების სასარგებლოდ დასრულდა. ჩემპიონატი უმაღლესი საგანმანათლებლო დაწესებულების სტუდენტური თვითმმართველობისა და სტუდენტთა მხარდაჭერისა და მომსახურების სამსახურის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტის ისტორიის, არქეოლოგიის და ეთნოლოგიის დეპარტამენტის, სტუდენტთა მხარდაჭერის და მომსახურების სამსახურისა და სტუდენტთა სამეცნიერო ცენტრის ერთობლივი პროექტის „მოგზაურობა საქართველოს ისტორიულ რუკაზე“ ფარგლებში, ზენდიდის ციხის ნანგრევებთან ციალა ბეჟანიძის წიგნის „ზენდიდის ციხე“ წარდგინება ჩატარდა. წიგნი ბეჟანიძეთა გვარსა და მათ საგვარეულო ციხეს ეძღვნება. ისტორიულ წყაროებსა და დოკუმენტებზე დაყრდნობით ნაშრომში აღწერილია გვარის ისტორია, ეტიმოლოგია და აჭარის ერისთავ-ერისთავი აბუსერიძეების საგვარეულო.